Tuesday, June 5, 2007

الناس بتاكل بعض......مش واكل



صباح الخير

هو احنا صحيح يا جماعه مخلوق محترم؟
اقصد هو احنا كويسين يعنى؟
متفهمونيش غلط ..... الى اقصده؟
يعنى احنا احسن وافضل مخلوقات ربنا؟
وهو احنا اتخلقنا وكل الحجات التانيه اتخلقت لخدمتنا ولمزجنا؟
طيب هو احنا عندنا مبدء؟
طيب هو احنا عندنا ثوابت ومتغيرات؟

والله مانا عارف...
طيب تعالوا نفرض اننا بقدره قادر اتقدمنا فى العلم
(ياعم اتخيل.. بقول اتخيل....هو احنا هنخسر حاجه)

وقدرنا بقدره قادر برضو اننا نوصل لكوكب خارج المجره بتعتنا
واحنا هناك بقى ياعمنا ....لاقينا كوكب صغير مش مشهور ... فيه ناس شبهنا
بس مش شبهنا اوى فى اختلاف
هما اكثر وسامه وجسمهم مش مبعجر زينا
رشاقه يابنى ادم
عضمهم مش من نفس الماده بتعتنا... لأ ماده تانيه لينه
زى الغضرايف كده وارق
دمهم زى الشربات او البن الحليب واحلى
كمان هما طيبين اوى يعنى بيحبو السلام بجد

مش زينا.....
السلام عندهم هدف
لكن
عندنا السلام وسيله إما للهروب من عدو اقوى
او لنيل جايزة زى بتاعه نوبل
لكن هما السلام عندهم اسلوب حياه

المهم انهم انتصوا فى نافوخهم وقرروا يمدوا حبال الصله بينا وبينهم
ويعملوا علاقات متبادله
.(ويكون هناك تبادل خبرات (من طرف واحد طبعا)

واصبح سكان الكوكب ده ريحين جاين علينا فى الارض
وبدأوا يبعتوا علمائهم وخبراتهم علشان يطورونا
ويملوا الدنيا خير وتقدم
طبيعتهم كده


(بعد مرور كام سنه كده)-

كنا عايشين زى الفل سمنه على عسل

المهم
حصلت مشكله بين واحد من البشر
وواحد من كائنات الفضاء
عادى الاخوات بيختلفوا ...ومصارين البطن بتتخانق
الخناقه اشتدت واتطورت وكلمه من ده وكلمه من ده
البنى ادم قام عض الكائن الفضائى ( اه عاضو


اكتشف ان طعم لحمه حلو اوى وجميل حتى وهو (نى
المهم علماء البشر اكتشفوا ان مش بس طعمه حلو
لأ
ده كمان الواد الى عض الكائن كان مريض وخف من مرضه
واصبح زى البغل صحه وعافيه
من اليوم ده اكتشف العلماء بتوعنا ان
اكل لحم الكائنات دىطلع ترياق ضد الموت والشيبه
يعنى الى يكله ولا يموت ولا يعجز خالص


تفتكر احنا هنعمل معاهم ايه؟ ها انطق...مترد؟
مال شفيفك دلدلت كده

هل؟....هل سيستمر السلام بينا وبينهم؟
ولا.... هيصبح عضهم واكلهم هدف؟

احنا فعلا ممكن نحاربهم ونصطادهم؟

اه ممكن
دى ممكن كمان الحكومات تعمل مشروع لتعليبهم وتوزعهم على بطاقه التموين
ممكن كمان يعملوهم عصير... وممكن اكياس زى البطاطس
وممكن حتت صغيره مقرمشه زى البوب كورن
وكمان ممكن محلى بالفواكه للاطفال
ممكن يتباعوا فى الجمعيات الاستهلاكيه لضمان وصلهم للجميع


طيب قتلهم هل يصبح منتهى الوفاء والشجاعه؟
خليك فاكر( ماشوفناش منهم الا كل خير
هل سيصبح الكذب عليهم لاصطيادهم فضيله؟
وهل سيصبح خيانتهم منتهى الوفاء والانسانيه؟

طيب يبقى الكدب اتساوى بالصدق
والخيانه اتساوة بالاخلاص
والقتل اصبح سلوك انسانى محترم (غريزى
وتوفير لحم الكائن الارقى اصبح عمل وطنى
طيب يبقى المفاهيم كده اتغيرت
والثوابت مابقتش ثوابت
عارفين ليه البشر عملت كده؟؟؟؟؟؟


لاء مش لانها بشر
لاء برضه مش لانها غريزة

الاجابه لان البشر خايفه..... ايو خايفه !
خايفه من ايه ؟؟؟
ااقولك خايفه من ايه...

خايفه من امكانيات الكائن الارقى الى جاى من الفضاء.. اوعى تكون نسيته
خايفه الكائن هو الى يبداء بالغدر وهو الى يسيطرعلى الموقف
وهو الى يحكم الانسان والبشر
وساعتها عادى جدا
.ان الكائن ده يعمل حديقه يسميها حديقه الانسان بالجيزة
(zoo)

ونلاقى قفص مكتوب عليه

هذا انسان كذاب الموطن الاصلى اوروبا
قفص تانى
هذا انسان منافق الموطن الاصلى افريقيا
هذا انسان منافق الموطن الاصلى استرليا
هذه انثى انسان نكديه الموطن الاصلى مصر
هذه انثى انسان لسنها طويل الموطن الاصلى مدونه
هذا صغير الانسان الموطن الاصلى اسيا

اه والى عملناه فى عالم الحيوان يطلع علينا ياعم
هو ده خوف الانسان ورعبه من ان الى بيعمله يحصله

الخوف بيغير فينا كتير بيغيرنا احنا نفسنا
بنكون مش احنا ياعمنا بنكون حد تانى.. وحش اوى.. دميم اوى.. معفن جدا
الخوف قادر يحولنا لكائنات مخيفه

كل الى حصل ده بسبب الخوف
خلينا نقولها بصوت عالى احنا مش خايقين....
مش هنتحول مش هنخلى خوفنا يسيطر علينا
هنرجع تانى للبراءه والطيبه والشرف والجدعنه
هنفضل فاكرين ان احنا بنى ادمين

لو حد قالك الناس بتاكل بعض قول..... مش واااكل
وبس

8 comments:

رينـــــــــــا said...

بص يابنى
والله لولا ان ربنا كرمنا
واننا افضل خلق الله
وان دا رأى ربنا
كنت زمانى قلتلك ان الحييوانات بتعامل بعضها احسن ما احنا بنتعامل
الله المستعان

دنـيـا محيراني(ايناس لطفي said...

انت عندك حق ايوه عندك حق بس لو افترضنا و تخيلنا برضه ان الكائن التاني ده و احد مننا هانتعامل معه برضه بنفس الطريقه يعني العمليه مش مين الاي قدمنا العمليه في افكارنا و اخلاقنا الاي انحدرات و خلتنا ناكل في بعضنا برغم ان الرزق بكل انواعه هي في ايد ربنا و مكتوب من يوم ما اتخلقنا يعني مهما عملت يا بني ادم مش هاتاخد غير رزق بس الموضوع مش رزق و بس احنا كمان بناكل في اعراض و شرف و سمعه بعض ده غير الحسد و الغيره و الزنب من تحت لتحت ليه بينا كده بس في النهايه اي واحد رافض الاساليب ده لازم يبتدا بنفسه يمكن يكون لسه في امل لازم يكون في امل

semsem said...

هههههههههه
يع مبحبش الكائنات الفضائيه نايه
فى مشوى
بس مش عارفه انت مستغرب كل الاستغراب ده ليه
هو مش فى اكله لحوم البشر وجيوب البشر
وكل حاجه فى البشر
فلا داعى للكائنات الفضائيه

momken said...

رينا
.ـ.ـ.ـ.ـ
عندك حق جدا وربنا قال( وكان الانسان اكثر شىء جدلا) الى لفت نظرى كلمه شىء ربنا الى خلقنا هو الى صنفنا اننا مجرد شىء


دنيا
ـ.ـ.ـ.ـ
الله عليكى يا دنياانتى دنيا حلوة اوى وعميقه اوى ياريتك دنيتنا كلنا

semsem
ـ.ـ.ـ.ـ.ـ.

عندك حق ياسمسم بس انا اخترت كائنات فضائيه كارمز مصدهاش نفسها بس حبيت اجيب للانسان حد مافيش بينه وبين الانسان منافسه او وجه مقارنه علشان ميجبش الغلط على الاخر

والله ياجماعه نورتوا البلوج بتاعى المتواضه واستفدت جدا من تعليقاتكم

ابو العربى said...

مش واكل
كلامك فيه بعد غريب اخد عقلى بجد والله مقدرش غير انحنى ليك انت جامد جدااااا
والله البعد الى فى القصه بتعتك عملى حاله من الصمت والزهول

تحياتى

momken said...

ابو العربى
ـ.ـ.ـ.ـ.ـ.ـ.

كلامك هو الغذاء الحقيقى لافكار ممكن وهو الدافع له للاستمرار

انت نورتنى ودعتنى دفعه جامده جدا للاستمرار
شكرلاا

Anonymous said...

انت يا ممكن خاتنى افتكر حجات كنت نسيتها بسبب الخوف وكنت بدأت اكل زى الناس ما بتاكل
بس لانى كل شئ اتساوى ومبأش فى مبادئ او قيم او حتى عرفان بأى شئ بس كل اللى اقدر اقوله ليك انى هحاول اقول ................لاء مش واااااااااااااكل

momken said...

Anonymous
.ـ.ـ.ــ.ـ.ـ
انت مورنى يا مجهول ومتشكر على كلامك وربنا يهدينا جميعا