Thursday, June 21, 2007

انسان اه......انسان




صباح الخير

انهارده كنت عاوز اكلمكوا عن الغرائب
وبعدين وقفت ...وبصيت حوليا... لقتنى انا احد الغرائب
مش انا. انا بالذات لاءه.. البنى ادام كله .. الانسان يعنى

تعرفوا ان الانسان هو الكائن الوحيد الى بيقوم بعمل اشياء بدون سبب
اه بدون ابداء اسباب... وبدون داعى اصلا...
وكتير بدون اتنظار نتائج لهذه الافعال
...

الانسان هو الوحيد فى خلق الله الذى يتمنى الحياه العشوائيه
والفوضاويه...
الانسان هو الوحيد الذى يحلم بالعوده للوراء.. للماضى
ليس حبا للتاريخ ... ولكن حبا فى لخبطه كيان الوجود


على سيبل المثال

الحيوان مهما كان مفترس وشرس لا ياكل الا اذا كان جعان
ولو شبع تساوى الاسد مع الارنب... الا فى حاله الدفاع عن النفس
حتى الثعبان لا يلدغ ابدا وهو ممتلىء البطن
حتى الحمار... الحمااااار
مايكولش ابدا الا وهو فى حاجه للطعام
كمان فى حاجه كل حيوان او كائن له نوع معين من الطعام ياكله
نقدر نقول مابيغيريش....
مابيعكش يعنى.....

حيوانات بتاكل نباتات يعنى نباتات فقط (زرع

واخرى تاكل لحوم برضه لحوم فقط (فرائس

واخرى حبوب برضه حبوب بس (بتنقر

حتى الحيوانات الى بتاكل زباله متكلش غير الزباله (مزاجه

والف هنا ويحمد ربه

نيجى كده نشوف الانسان
يبدا فى الوجبه بتعته... يقولك انا ديما ابدأ بالشوربه
ولو ست تقولك انا بحب ابدأ بالسلاطه....
ثم يهم فى حشر.. ودفس.. كل ما يقدم له اشى لحمه مشويه ومقليه
ومحمره... وبعدين فراخ... وسمك.... وانواع الخضار.. والروز.. والمكرونه
ويسال مافيش بدنجانه مخلله.... او حته خيار مخلل
طيب كام صباع ورق عنب كده اصله مزز..
وبعدين مافيش مانع من حته رقاق... او جلاش ...او سمبوسك
او كلهم سوا يوانسوا بعض فى بطنه

ولما يملى بطنه تمام... التمام....
يبداء يحلى يا باشا... اه يحلى.....

اشى ام على .... واشى جيلى .... وروز بلبن... وحته بسبوسه
وحته كنافه صغنونه....تمام ياعم كده انت ميه ميه
ناقص حته جاتوة.... او تورته لو فيه يعنى...!

يجى للفواكه ... صوباع موز.. عالشان الكالسيوم... وبرتقاله عالشان فتامين سى
وخوخه علشان الصوديوم....وبطيخ دى عباره ميه ياعم ... هو ده يتحسب...!
طيب خلصت ياعم اتكيفت

نحبس بقى ها؟ شاى ....ولا نسكافيه.... ولا حاجه ساقعه....؟
يقولك نبدا بالبيبسى... وبعدين نسكافيه بلاك .... وخالى الشاى للاخر...!

حبست ياعمنا واخدت واجبك كله تمام التمام ... نتسلى بقى واحنا قعدين
نجيب شويه كاجو .. وشويه لب وسودانى....وشويه مكسرات صينى
نأزأز واحنا قعدين نتفرج على المسلسل

على عمنا الانسان مايخلص الحجات دى يكون معاد الوجبه الى بعدها جه
ماهو المصيبه اننا بناكل بمواعيد مش لما جسمنا يطلب الاكل
ونفضل ناكل طول ماحنا عايشين...
ويفضلوا يحلفوا عليك.. تعدامنى لو ما اكلتش دى
خد دى من ايدى عاوز تكسف ايدى؟؟؟
طب دوق الصنف ده اول مره اعمله جه فى البرنامج على الدش
..
المعلم .....يحشر.... ويدفس ..... ويلغ...ويلهط...

والله بستغرب احنا رمضان بيعدى علينا ازاى

بزمتكوا مين اعقل الانسان ولا الحيوان مين بيفهم اكتر ....؟؟؟؟؟؟

نيجى لنقطه تانيه مثال تانى يعنى:-

الحيوان كائن فاهم ذاته وصريح مع نفسه
التزاوج عند الحيوان بيتم من اجل الحفاظ على النوع وعدم الانقراض
دى سبب نبيل جدا للعمليه الجنسيه وهيخليها حاجه محترمه....
وبعدين وده المهم....
لما عدد الحيوانات بيزيد اوى ...
بنلاقى الحيوانات بتعمل مايسميه الانسان انتحار جماعى
بقول الانسان هو الى بيسميه كده....
بس اعتقد ان الحيوانات بتسميه اتاحه فرصه لحياه اخرين....
اوعوا حد يقول انى حيوان وبفهم لغتهم ودماغهم..
لاء انا بقول اعتقد...

نيجى للشمهندس.... الانسان...
اولا الانسان بيمارس الجنس فى المقام الاول من اجل اشباع رغبه
ايوة رغبه تتملكه وتسيطر عليه وتقوده احيانا...!
واخر ما يفكر فيه اثناء ممارسته للجنس هو انجاب الذريه.. الاولاد

الاغرب ان الانسان بيخترع وسائل نتظيم الاسره علشان يجعل الجنس
اكثر حيوانيه (سورى انسانيه) وليجعله بدون اى نتيجه الا اشباع رغبه
وحتى تكون ايضا ممارسه للجنس بلا سبب
بدون هدف... بدون رد فعل... بدون نتيجه تذكر


طيب ولما عدد البشر يزيد ويبقوا مش طايقين بعض يعملوا ايه
ااقولك ياعم
بيعملوا حروب يموتوا بيها بعض
ويخترعوا اسلحه يقتلوا بيها بعض
اه الانسان يخترع سلاح علشان يموت بيه نفسه بس مش بايده لاء بايد غيره
الانسان اجبن من انه يقدم على كده


طيب مثال تالت
تصدقوا ان الانسان هو الكائن الوحيد الى بيختار ينهى حيانه بمزاجه

زى ماقولنا الى بتعمله الحيوانات مش انتحار(ده اسمه اتاحه فرصه للاخرين للحياه
لكن الانسان بيحس ان حياته عبء عليه...
ايوة حياته بتصبح عبء مش قادر يتحمله
فيقدم الانسان على الانتحار ويقرر ينهى حياته...

على امل ان الموت اكثر رحمه من الحياه...

او اكتر رفاهيه
(واهــــــــــــــــــــم... وعايش فى اوهاااااااامه)
بزمتكوا حد عمره سمع عن حمار بيحاول الانتحار.....؟
الله يرحمك يا جــــاهين قال ... مافيش حمار حاول الانتحار

حد سمع ان اسد او زرافه...او غزال اكتئب لدرجه انه شرب سم
او اتفق مع تعبان يعضه بدون مايخد باله

الانسان اغرب مخلوقات الله لانه ابتعد عن الى صنعه (وخلقه )والى كتب الكتالوج بتاعه
ايوة الانسان.. له مخترع وفى كتالوج للانسان...
لكنه فضل مايقراش الكتالوج ده...
وفضل انه يكتشف نفسه بنفسه ... الى حصل انه بوز نفسه
ومحتاج يرجع تانى للمخترع علشان هو بس الى يقدر يصلحه...
ويرجعه لحاله المصنع (على رائى بتوع الموبيل

محتاجين نرجع تانى نعرف ايه الهدف من جودنا...
ووقتها نعرف ان الاشياء الاخرى مجرد اسباب بقاء
اما هدف الحياه فقد حدده من وهب الحياه
وبس.....

33 comments:

الحلم العربي said...

متفقة مع حضرتك في معظم الآراء و خصوصا الخلاصة النهائية ...احنا فعلا محتاجين نعيد ضبط أنفسنا على حالة المصنع و نقرأ الكتالوج كويس لأننا بنشغل نفسنا بعشوائية ...
موضوع الأكل ده مشكلة ...بالرغم من انى كنت جعانة و انا بقرأ كلام حضرتك لكن من كتر الكلام عن الأكل حاسة انى خلاص مش قادرة ...كنت هرجع من كتر الأكل اللى في الكلام ...هههههههه

بالنسبة لموضوع العلاقة بين الرجل و المرأة ...أعتقد ان موضوع الحفاظ على الجنس البشري ده سبب من عده أسباب ربنا خلاها في الجواز ....
أصل لو هو ده السبب الوحيد يبقى اللى ما بيخلفوش مافيش سبب لجوازهم
الجواز ليه عدة أهداف أهمها استقرار الانسان و سعادته في الدنيا و طبعا الحفاظ على البشر هدف منهم...

التدوينة جميلة جدا و أفكار حضرتك أجمل
عجبتنى اوي حتة ان الحمار لما بيشبع ما بياكلش تانى
يا ريتنا بس نفهم زي الحمار...ههههه
تحياتي

دنـيـا محيراني(ايناس لطفي said...

انا متفقه معك جدا يا ريت احنا نتعلم شويه من حكمه الحيوانات و علي رايك نتعلم ماناكلش مادام شبعنا ياريت يكون ده في الاكل و بس لا طبعا قيس بقي علي كل شيء في المال و السلطه و الجاه طماعين و بنطبق المثل
البحر يحب الزياده بس عارف الاسلام و الدين عامه اتي عشان يهذب النفس البشريه يعني نرجع لدين صح و نرجع لانسانيتنا صح هانبقي كما خلقنا الله ربنا كرم الانسان و جعل الملائكه يسجدون له اولي بنا ان نعود لطبيعتنا لفطرتنا التي فطرنا الله عليها يا رب
تحياتي لافكارك الجاده المغلفه بالسخريه الاذعه و المبكيه ايضاء

momken said...

الحلم العربي
ـ.ـ.ـ.ـ.ـ.ـ.ـ.
انتى نورتينى يا اجمل حلم عربى بالنسبه للاكل انتى تقصدى انى سديت نفسك ماشى ياستى متشكرين انا عارف كلامى يسد النفس

بالنسبه لموضوع الجواز انا مقصدش الجواز انا اعقد ممارسه الحب (سورى يعنى الجنس نفسه)مش الجواز انتى عندك حق جدا فى موضوع الجواز
انتى نورتى المدون المتواضعه


دنـــيـــا
ـ.ـ.ـ.ـ.ـ.ـ.ـ

انتى فهمتى البوست بتاعى اكتر منى انا شخصيا يا دنيا وعبرتى عنه فكلمتين اد الى اعدت ادش فيه فى سبوره بحلها
تحياتى يا دنيا نورتينى

akeed said...

الموضوع بتاعك ياممكن جميل جداً وبيوصف الجنس البشرى بطريقة سهلة وجميلة

semsem said...

اولا بوست هايل كالعاده
تانيا ايه يا عم اعجابك الشديد بالحيوانات ده
بص يا ممكن انا شايفه ان الانسان مهما كان افضل المخلوقات دا يا راجل الكائن الوحيد اللى ربنا كرمه وخلى الملائكه تسجدله

مش مشكلتنا
الاكل
الانسان بياكل على شان هو فاهم الاكل وانواعه وطعمه مش اى حاجه وخلاص وبعدين الناس اللى بتدفس دى شريحه من الناس مش كلهم يعنى

نجى بقا لنقطه الجنس الله يكسفك يا اخى
الانسان بيمارس العمليه الجنسيه من اجل العاطفه التى بداخله يعنى مش على شان الحفاظ على النوع وبس وبعدين الانسان السوى عادتنا له شريك واحد بس هو من يحتضنه ويعيش معه مش ذى الحيوانات كله عندهم سايح على بعضه
وهو دا اللى بيخل الموضوع ده عند الانسان ارقى
وتقولى حيوانات حيوانات قال
بذمتك عمرك شوفت حيوان مخترع ولا دكتور

بص يا سى ممكن
لو كان فى مشكله فى البشر فالمشكله جوا كل واحد فينا هو اللى ممكن يصلحه
بعقله المميز بيه عن سائر المخلوقات

وفى النهايه اسمحلى اقولك بوست اكتر من رائع

basma saghir said...

ممممممم..متفقة معاك بس مش في كل حاجة..صحيح ان الحيوانات بنتعلم منها كتير..بس متنساش ان ربنا فضلنا عليهم وعلى كل مخلوقاته..ممكن احنا منكنش قدرنا التفضيل واحيانا بنتصرف تصرفات تفوق تصرفات الحيوانات.بس ادينا بنتعلم
وبعدين لما البني ادم بيتجوز بيبقى علشان هو بيحب او على الاقل ميال للطرف الاخر لكن الحيوانات بتتزاوج لمجرد الحفاظ على النسل..في النقطة دي بالذات هما حيوانات واحنا بني ادمين

افكارك عجبتني جدا وطريقة مناقشتك لذيذة

صاحب البوابــة said...

مقال جميل يحمل رؤيا فلسفية

تحياتي

تامر حسين said...

موضوع جميل بس طويل اوي ههههه
تحياتي ليكي

momken said...

akeed
ـ.ـ.ـ.ـ.
متشكرا جدا يا اكيد تشجيعك له عندى منزله عليه ومهمه جدا
انا زرت مدونتك جميله جدا ومتنوعه

اهلا بكم

semsem
ـ.ـ.ـ.ـ.
اهلا ياسمسم منورانى بلسانك الطويل
على العموم كل الناس عارفين اننا مطلقين وبينا محاكم علشان كده واخده عليا.... بهزر يا جماعه سمسم من اعز صديقاتى هنا وهى دعم دائم ليا فى عالم البلجرز الى انا جديد فيه
اولا مش هقولك سبب اعجابى يالحيوانات ياقطه....انا بقى بكلم الشريحه الى بتحب الدفش والحشر الناس التفسه لؤخده ياسمسم...نيجى لموضوع طوله اللسان
الله يكسفى ماشى ياستى انتى بتقولى الانسان بيمارس الجنس بدافع العاطفه وده غلط بدليل ان الانسان بيمارسه احيانا بدون تميز ومع اشخاص اول مره يقبلها وده كتير ماعلينا العاطفه الى بتتكلمى عنها بالنسبه للعمليه الجنسيه اسمها شهوة او رغبه
الى كنت اقصد ان الحكايه دى اصلا اصلها الحفاظ على النوع والحيوان فاهم كده
لكن الانسان عمره ما بيقوم بيها للسبب ده ....نقدك جميل وفادنى جدا وديما كلامك بيعجبنى وبيكلى دماغى ياسمسم
نورتينى مع انك عايشه فى المدونه بتعتى تقريبا

بيسوو
.ـ.ـ.ـ.ـ.ـ

كلامك كله صح وميه ميه يابيسو متفق معاكى جدا
بس انا بتكلم عن الجماع مش الزواج
التزااوج غير الزواج
التزوج هو ممارسه الحب او القائات الحميمه
بخلاف ذلك مافيش اى اختلاف فى كلامنا نورتينى يابيسو

تامر حسين
.ـ.ـ.ـ.ـ.ـ

انا اسف على التطويل يا استاذ تامر هحاول اقصر فى البوستات الجايه
انت نورتنى جدا
نورتونى يا جماعه

momken said...

صاحب البوابــة
.ـ.ـ.ـ.ـ.ـ.ـ.ـ.ـ.ـ

متشكر على مرورك على مدوانتى المتواضعه
وشكرا على تعليقك الجميل الملىء بالعمق والثقافه
نورتنى

Unknown said...

كل الى اقدر اقولة ان فية حديث جميل قوى لو اتبعناة مش هنكون كدة ابدا
نحن قوم لاناكل حتى نجوع واذا اكلنا لا نشبع يعنى منملاش بطننا قوى
وحديث اخر
حسب ابن ادم لقيمات يقمن بها اودة فان كان لابد فاعل فثلث لطعامة وثلث لشرابة وثلث لنفسة
شوف من كام الف سنة حبيبنا الرسول بيقول اية اما موضوع الانتحار فدة لان الانسان عندة عقل وهية دة الامانة الى عرضها ربنا على السماء والارض فابين ان يحملنها فعقل الانسان بيخلية يفكر واحينا عقلة بيوصلة لاشياء غريبة لالحيوان مش حامل هم هينتحر لية بقى
ولا اية

هالة said...

momken
أنت أصلا مفكر
وفعلا الانسان لازم يرجع للكتالوج الإلهي
وان يطبق أوامر ويبتعد عما نهاه عنه.
وعندما يقوم بكل هذا يستحق لقب انسان عن جدارة
موضوع جميل وفقك الله

emos said...

howa enta leek weghet nazar

bs mesh sa7 7'ales 3'eer fe mawdoo3 el akl
ya3ny mawdoo3 el akl sa7
el rasoul 3aleh el salat wasalam 2aal
na7n kawmen law na2kol 7ata nagoo3 w eza 2aklna la nashba3
enma fel ba2y
fa el 7ayawan aslan maye3rafsh enno bel3amaleyya elly howa beye3melha deh bey7afez 3ala abna2 genso heyya ra3'ba wel salaam
enama el ensan
3aref kol shee2 3anha w 3aref enha lamma betzeed betgeeb adrar 3ashan keda fakkar
belnesba lel2ente7ar el 7ayawanat betanta7er 3ala 7asab ma3lomaty 3ashan kebro w 3agezo w mesh 2adreen yatakayafo ma3 el 7ayah
mesh 3ashan yewasa3o le3'erhom
w bs

momken said...

emos
-.-.-.
kalamk kolo sa7
ana 3aref an elansan 3aref kool da
lakeem elansan mesh beyasta7`m ma3lomato dy
bedalel ano bey3mel 7agat tedoro
zay eltad7`en masln

3agbny rayk gedn
anata nawarteny

semsem said...

ماشى اممكن انا لسانى طويل
طب رد يا فالح
لما العمليه الجنسيه الغرض منها الحفاظ على النوع والحيوان فاهم كده طبعا على شان حيوان
ليه ربنا جعلها من المتتع الموجوده فى الجنه ووعد الرجال بالحور العين

قولى بقا على شان الحفاظ على النوع

وبعدين هى الناس لاقيه تاكل لما تقولى دفش وحشر واكل
ان شاء الله ان الناس دى تموت من التخمه على شان سايبه الناس التانيه من غير اكل

اه احنا مش بنا محاكم متنساش معاد
الجلسه الجايه فى المحكمه
بتاعه قطيعه الخلع
ههههههههههههه\
هههههههههههههه
هههههههههههه
ابقى قول لسانى طويل تانى

momken said...

semsem
.ـ.ـ.ـ.ـ

طبعا موضوع المحاكم مش هتكلم فيه علشان ماثرش على راى المحكمه وطالما الموضوع فى ساحه القضاء مش هتكلم غير لما ينتهى

ياستى انا ماقولتش ان العمليه الجنسيه
لازم تتم للحفاظ على النوع فقط
الى اقصد ان الحيوان فاهم ده وحافظ عليه لكن احنا بقينا نعمل لاالحكايه دى ونسينا الغرض الاساسى منها
بدليل انتشار الزنا والرزيله فى المجتمعات وانتشار الغانيات فى الشوارع بامره موضوع هاله سرحان بتاع فتيات الليل
اصبح موضوع رخيص ومبتزل والموضوع اصلا مفروض انه راقى ومحترم
بس

momken said...

هالة الدسوقي
.ـ.ـ.ـ.ـ.ـ.ـ.

كلامك تمام ياهاله انتى فهمتى الى بين سطور ملامى
تحياتى
انتى نورتينى يا هاله

semsem said...

اعترف

اقنعتنى بس برضو يا ممكن انا كنت بتكلم على اساس ان الناس بطبعتهم اسوياء هى دى الفطرة
تعمل ايه بقا فى واحده بتشوف دائما الجانب الايجابى من الحاجات
لانى بصراحه بعتبر الناس اللى انت بتكلم عنهم دول مش بنى ادمين اصلا

mariam said...

حاجه غريبه فعلا
موضوع جديد و متميز
الأنسان بيتصرف تصرفات غريبه فى احيان كثيره
خصوصا موضوع الأكل

تحياتى

momken said...

semsem
.ـ.ـ.ـ.ـ

عندك حخق ياسمسم انا برضه من رائيك
انا فى منتهى السعاده برائى فنانه زيك
وديما رئيك مهم عندى

تحياتى


mariam
.ـ.ـ.ـ.ـ.

متشكر على ائيك يامريم انتى نورتينى ورائيك شجعنى جدا على الاستمرار

نورتى المدونه المتوضعه

حواء said...

ايه الفلسفة دى كلها .. بس فيها كتير صح وبصراحة مفتكرش حد فكر فى اللى انت قلته ده قبل كدة .. وعليك شوية تعبيرااااات انما ايه فى الجون .. برافو عليك موضوع جديد وصح .. تحياتى

Unknown said...

كل الى اقدر اقولة ان فية حديث جميل قوى لو اتبعناة مش هنكون كدة ابدا
نحن قوم لاناكل حتى نجوع واذا اكلنا لا نشبع يعنى منملاش بطننا قوى
وحديث اخر
حسب ابن ادم لقيمات يقمن بها اودة فان كان لابد فاعل فثلث لطعامة وثلث لشرابة وثلث لنفسة
شوف من كام الف سنة حبيبنا الرسول بيقول اية اما موضوع الانتحار فدة لان الانسان عندة عقل وهية دة الامانة الى عرضها ربنا على السماء والارض فابين ان يحملنها فعقل الانسان بيخلية يفكر واحينا عقلة بيوصلة لاشياء غريبة لالحيوان مش حامل هم هينتحر لية بقى
ولا اية

سكينة said...

ممكن على فكرة يا ممكن يكون ده السبب أن الصينيين فاهمين تميز الحيوانات وعشان كده بيصنفوا البني آدمين حسب الحيوانات
ثم لا يا سيدي الحيوانات أيضا بيجيلها اكتئاب واسأل أي بيطري في الحتة عندك
ثم لو الحيوانات عاشات ما نعيشه من متناقضات كانت بالتأكيد هتنتحر بنسب أعلى من البني آدمين ومش تفتكر أن بتكلم بلسان البني آدمين أني بفهم لغتهم أبدا صدقني وبالعكس جهلي ده يمكن هو سبب اكتئابي

momken said...

bocycat
.ـ.ـ.ـ.ـ
ولافلسفه ولا حاجه يابوسى انا على ادى حالى ومتشكر جدا لتشجيعك وللمجامله

نورتينى يا بوسى

ايوية
.ـ.ـ.ـ.ـ

صلى الله عليه وسلم .....صدقت ياسيدى يارسول الله... صلوات ربى وسلامه عليه

نورتينى يا ايويه
تحياتى


سكينة
.ـ.ـ.ـ.

عندك حقياسكينه بسالحاله الى بتصيب الحيوانات شبه الاكتئاب مش اكتئاب حقيقى غير انها عمرها ما ادت للتفكير فى انهاء الحياه طوعا
الصنين شعب كويس بس برضه انا ارفض تساوى الحيوان بالانسان الذى فضله الله على جميع خلقه حتى الملائكه

نورتينى يا سكينه
تحياتى

Hadota ... حدوتة said...

احييك اولا على البلوج الجميل دا
ثانيا البوست حلو اوى وبيدل ان الموضوع شاغل بالك
بس الحكاية ابسط من كده
ان الانسان ربنا وهبه عقل فبيشغله فى الاختراعات والافتكاسات
وبيحاول يمتع نفسه بالدنيا على قد ما يقدر
وربنا لا ياخد عليه شىء زى دا الا اذا وصل حد السفه والبذخ زى منت بتوصف

الدين حدد كل شىء وقال الوسطية خير الامور
والرسول عليه الصلاة والسلام قال نحن قوم لانأكل حتى نجوع
وبالنسبة للجنس فهوا بيشبع جوانب نفسية للانسان الى جانب الجانب الحيوانى زى منت سميته

اما بالنسبة للجزء التالت انت عارف واحنا كلنا عارفين
ان الانتحار حرااام

الموضوع عاوز شويه تفكير من الانسان وتشغيل عقل ومخ قبل الجرىء وراء الاهواء

تحياااتى

ta5areef said...

momken
دى اول مرة ازور مدونتك
هى رائعة

انا معاك كمان ان الانسان ساب الكتالوج بتاعه اللى هو القرآن اللى لو حد عاش بيه ان شاء الله هيكون اسعد الناس

بس انا بقي مختلف معاك ان الانسان هو الكائن اللى بيعمل كل حاجة كده من غير داعى بالعكس الانسان هو الكائن الوحيد اللى بيعمل كل حاجة لسبب معين

ممكن يكون السبب ده حاجة وحشة بس هو ده مخه او عقله اللى ربنا ميزنا بيه

ربنا لما قسم العقول ع البشر كل واحد عجبه عقله وقال انا اعقل واحد ولما قسم الارزاق عليهم كل واحد معجبوش رزقه

هه؟؟

momken said...

Hadota
ـ.ـ.ـ.ـ.
نورتينى يا حدوته كلامك كله صح ماشاء الله عليكى... لو كنت سمعت تعليقك قبل ما ادون البوست ده كنت كتبت كلام تانى كتير اوى وكان شكل البوست ممكن يتغير خالص

نورتينى فى اول زياره
تحياتى

تخاريف دكتور
.ـ.ـ.ـ.ـ.ــ.ـ.

يادكتور انت شرفت البلوج بتاعى المتواضع بزيارتك الكريمه واتمنى متكونش الاخيره
بس الغريب ان كلامك غير اسمك خالص
كلامك مافيهوش اى تخارف دى منتهى العقل والرزانه ربنا يزيدك

انت نورتنى
تحيات

شمعة أمـــــل said...
This comment has been removed by the author.
شمعة أمـــــل said...
This comment has been removed by the author.
شمعة أمـــــل said...

انا شايفه اننا لازم نرجع للقرأن والسنه اللى هنلاقى لكل شئ حل
وعلى فكره موضوع العلاقات بين الرجل والمراه دى حاجه بترجع لكل انسان وهو اللى المفروض يميز ما بين الصح والغلط
وبالنسبه للاكل افتكر اننا بناكل عشان نعيش مش بنعيش عشان ناكل بس تقول لمين ;)
وعلى فكره احنا اكتر شعب بناكل مع ان الرسول صلى الله عليه وسلم قال فيما معناه(نحن قوم لا ناكل حتى نجوع) وده اللى المفروض يحصل
بس فعلا زى ما تخاريف دكتور بيقول(ان ربنا لما قسم العقول ع البشر كل واحد عجبه عقله وقال انا اعقل واحد ولما قسم الارزاق عليهم كل واحد معجبوش رزقه)وربنا يهدى الجميع
واتمنى منك المزيد من البوستات الحلوة

momken said...

angle_bero
.ـ.ـ.ـ.ـ.ـــ.

كلامك جميل يا ومعقول جدا وكل الى انتى شيفاه ده صح
جزاك الله خير
وصدق رسول الله صلى الله عليه وسلم فيما قال

بس المشكله فى استخدام المخ ان المخ ده هو الى هدى الانسات لعباده بقره والمخ هو الى هدى الانسان لعباده صنم او جبل او تمثال مخ الانسان انا شايف انه ناقص وعاجز... لسبب بسيط هو ان مخ الانسان موجود ومع ذلك اكتر من نص تصرفات الانسان خطاء منها محاربه الانسان بنى جنسه واهله احيانا
ومخ الانسان هو الى هداه لخيانه بلده
ودينه وخيانه نفسه احيانا
انتى نورتى البلوج المتواضع

تحياتى

Bossy said...

السلام عليكم

اسلوب في السرد ماشاء الله
وعرضك للموضوع جميل جدا
نيجي بقي للانسان
انا دايما كنت بقول ليه اما نيجي نشتم انسان نقوله يا حيوان
مع ان الحيوان ماشاء الله بيحاول يستغل قدراته علي قد ما يقدر علي عكس الانسان اللي معطل كل قدراته
الانسان ربنا كرمه بالعقل
بس سوري في ناس هي اللي بتهين نفسها وتعطل العقل دا
يبقي في الحاله دي من الصح اما نحب نحتقر اي حاجه نقول عليها بني ادم
بس التعميم نسبي
يعني مش كل البشر كده
ولا ايه
ممكن ان شاء الله

momken said...

Bossy
.ـ.ـ.ـ.ـ
اسف فى التاخير عن الرد بس انا فى سفر

انا متسكر جدا على كلامك الجميل
وعندك حق جدا فى رائيك بالنسبه للحيوان والانسان
نوؤتينى يا بوسى