Tuesday, April 28, 2009

حــــــــــــــــــــــــوار



هو انت بتحبنى؟....!!!!

قالتها وبين وجهى ووجهها عده سنتيمترات...هواء انفسها يملاء وجهى ... وعينها تحاصر عينى فلم أجد أى مهرب من ملاحقه عيونها لعينى


تردد السؤال فى راسى. كصدى الصوت
مر شريط حياتى كاملا امام عينى فى لحظه واحده......كمن يعيش اخر لحظاته ويلهث كى يبقى
عرق جبينى...واحمر وجهى ولمعت عينى...وتلاحقت انفاسى


حاولت كعادتى ان ابحث عن رد من تلك الردود التى تزيد من ارصدتى وفى نفس الوقت اخرج من ذلك
الموقف الدرماتيكى
فوجدتنى اقول....وبدون اى سيطره على كلماتى

لا اعرف.. إلا أنى أريد ان أبقى معك دائما
او على الاقل بالقرب منك

أُريد ان اعرف عنك كل الاشياء.. حتى ادق التفاصيل
أجد متعه غريبه عندما يكون الكلام عنك
او تكونى انتى موضوع الساعه ومحور حديث الرفاق

أريد ببساطه ان تتكلمى وانصت جداً ولا تتوقفى عن الكلام
اريدك ان تتحدثى عن اشيائك البسيطه.... أبداً عندى ليست تافه

فقط اريد ان أكون افضل من اجلك
اريد ان افعل اشياء تنال رضاكى
وافعل اشياء عجيبه فقط كى احصل على ابتسامه شفتيكى

اتمنى فقط ان تكونى اقرب..واقرب وادنى..بل اكثر قرباً...وان يصل قربك منى حد الالتصاق
احلم ان اضمك..وان تشبع منك ضلوعى ..و يطمئن قلبى...وترتوى الحنايا...ويهدأ الشوق

لا اعلم يا سيدتى ان كنت احبك ام لا فانا لم اتزوق بعد طعم الحب
فلا تسالى عن السعاده من لايعرفها

غايه علمى
أنى احب ما تحبينه ...وأريد ما تريدينه..وأنطق الكلام الذى تنطقينهُ فى نفس الوقت

اريد ان املاء رئتى بهوائك...واسمعك وانت تغنين لى اغنياتك المفضله

وان ارقص معكى ليله كامله حتى تشرق الشمس او نسقط من التعب

احب ان تسالينى كل الاسئله التى تملاء عقلك


رغم تحفظى على الاجابه عن استفسراتك التى لا تنتهى ابداً

اريد ان احدثك حتى ينتهى الكلام على لسانى ...او ينفذ مخزونى من حروف الهجاء
اريد ان اللمسك...احسك ...اشعر بك...اجــــدك... ولا افقدك

حتى لا أمسى بدونك....شعر مطموس الكلمات...وكتابُ منزوع الاوراق


Thursday, April 16, 2009

عملـــت.... شوبنــــج




صباح الخير

قبل اى حاجه يا جماعه احب اعترف لحضراتكم انى مجنون بالحجات الحديثه (التيتيت تيتيت يا معلم) يعنى بحب.... التيلفونات.... والابتوب... والستلايت...و,البلاى استيشن
وحتى.... الكنتالوب.... والكلمنتينا....و البليت فودز

لكن
....!

والاعتراف بالحق فضيله...! انا بتعلم بصعوبه شديده جداً -امكانيات بقى
-
يعنى على ما اتعلم على حاجه يكون طلع الى احدث منها ...والناس بطلوا يستخدموها اصلاً

المهم طقت فى دماغى اغير موبيلى بواحد تانى شكله يخض...
وفيه كل حاجه وبيدخل على النت من اى حته بالويرليس ببلاش وجى بى اس وثرى جى وسيبيان
وحركات كتير

المهم طبعا انا اخدت الموبيل وقعدت استكشفه...وادوس على الزراير...
وكل ما يفتح ويندوز ادخل وكل ما يطلع رساله اقبلها واقول اوكيه من غير ما اقرا

بعد ما خلصت لعب قولت الباقى اكتشفه وهو فى ايدى مع الايام....
لكنى حسيت كده انه بعافيه....
حكم انا عاطفى اوى تجاه الحجات بتعتى وبحس بيها جداً
لاقيته عمال يطلع نغمات عجيبه وكل شويه يعمل رنه وميسكتش الا لما ادوس على الزرار
انا قلت يمكن بيهرج معايا.. او بيرحب بيا ..او دى طريقته فى التعرف على الناس...
او التلفون اتجنن
وحسيت كده اسمالله على مقام حضرتكوا.....انى مش عارف فيه اى حاجه
وانى بعرف فى الموبيلات زى حضراتكوا ما بتعرفوا فى اللغه البرتغاليه
وحلمت ان الزمن رجع للوراء علشان مجبش الموبيل ده
او حتى اعرف ارجعه للشركه تانى
بس اقولهم ايه؟ انا مش فاهم فيه؟
كلا الباتا وحاشا وماشا
الا كرامتى
لحد ما ربنا رزقنى بواحد ابن حلال صحبى مجنون تكنلوجيا ( جينياس)الواد ربنا يهديه بقى مسك الموبيل بمنتهى
الاستهتار واكنه اريكسون سته تمنيتين
...
وقالى بمنتهى السخريه دى الى معصلج معاك يا مان؟؟
!
قلتله وانا بتصنع الادب... ايوة حضرتك

قالى شوف يا بنى
انت تدوس هنا وبعدها تعمل كدا وبعدها كذا ولما يجيلك ماسيدج تعمل كذا
ولما يوصلك ميل تعمل مش عارف ايه
وقعد يلعب فى ام الموبيل ويقولى ايه ده دى فيه خاصيه كذا وفيه مش عارف ايه الى ممنوعه فمصر وفيه كمان كذا
وقالى ما معناه انت هتعمل بكل الحجات دى ايه -ولسان حاله بيقولى دى خساره فيك
وانا من غيظى قلتله دى فيه اظهار رقم الطالب
-
المهم مفهمتش منه ايها حاجه
مجرد انه جه اتمنظر قدامى انه بيعرف فى حجاتى اكتر منى وذلنى

اصبحت بعد ما كنت جايب موبايل ومش فاهم فيه
لاء ...
الناس كمان عرفت انى مش فاهم
يادى الفضيحه ام جلاجل يا دى الجرسه ام حناجر

بالظبط بالظبط.. زى شيخ غفر كفر البلاص لما يجيب كمبيوتر وعليه ويندوز اكس بى

القصد من الرغى ده كله عاوز اقول لاصحابى الى فى منتهى الكرم ...
.اى حد بعتلى اس.ام.اس.ولسه انا مرضيتش عليه ميقلقش اكيد هارد فى يوم من الايام لما اعرف افتح الماسيدج
والى بعتلى ام. ام. اس. ميقلقش اكيد هشوفه بس كله بامر الله

اما الى بعتولى ميلات او فايلات شارنج فون
مش عاوز حد يفتح بقه ومن سكات كده ..يبعتوها تانى ومن غير تريقه
لانها اكيد اتحذفت
ومحدش يتريق و بلاش سفاقه...عادى بتحصل
وربنا هيكرمنى بحد ادبسه فى الموبيل ده وارجع لعقلى تانى

وعلى رائى المثل من فات نوكيا تاه
وبس

Sunday, April 5, 2009

رســـــــــــــــــــــــــــــــــالـــــــــــه



الرساله دى بمناسبه زواج اعز صديقاتى...او صديقه عمرى


روح


صاحبه مدونه حلم الشتاء
والى هتتجوز يوم الجمعه الموافق 10/4



والرساله مش ليها هى..... لكن لزوجها الكريم




وايضاً

لكل شاب فى سن الزواج

اخى الشاب الذى تعدى سنه واحد وعشرون سنه واستطعت البأه

اعلم يا اخى ان فتاتك واهلها انتظروك طويلاً وقد ارتضوا دينك وخلقك
وسيقدمون لك اغلى ما يملكون عن طيب خاطر لتسكن اليها ولتكون لها اهلا بعد الاهل
وامناً وحضناً وملازاً...وتكون هى لك ارضاً.. وحدائق.. لتحرس فيها بتقوى الله
وتحسن غرسها
اهدوك العزيزة الغاليه وصاحبه دلال ابويها.... لتشقى معك وتكافح وتجاهد وتستمر سنه الله فى ارضه

قد لقنوها حسن المعامله لك وطاعتك .....وعليك انت حسن القوامه والمعاشره

واعلم اخى ان الرجوله غير الذكوره....

فالذكوره ماهى الا الفحوله

اما الرجوله فهى تعنى الرحمه والحكمه.

..وبالرجوله تحمى بيتك من اعاصير وتقلبات الزمان
وبرحمتك تأسر حبيبتك وتضمن ودها وانجذابها لك دائماً

واعلم يا اخى ان كل بنات حواء ترجو رضا الله برضا زوجها...
وانت عليك ان تكرمها كما اكرمها اهلها
ولا تكن ابدا حائط يسد عليها طريق النعيم والسعاده فى الدنيا والاخره
واعلم
ان قوة الشخصيه والرجوله ليست فى التحكم والتسلط
ولا فى صلابه الرأى والصياح
لكن الرجل يميزة هدؤه وحلمه وصبره واهم من كل هذا تسامحه


واعلم يا اخى اننا جميعاً غير مبرائون من الاخطاء فليتسع صدرك لهفواتها
ولتكن لها زوجاً و مرشداً....ودللها اذا احسنت ..وشجعها اذا انجزت...وساندتها اذا اخفقت
وترفق بها اذا اهملت وتذكر قول رسول الله داوماً(استوصوا بالنساء خيراً

واعلم يا اخى ان الله لم يخلق النساء لخدمه وراحه الرجال
فهى ليست خادمه ولا مربيه اطفال
لكنها زوجه وحبيبه وشريكه حياه سعيده

واعلم يا اخى ان كل جميل يجذب نظر الناس
فحصن بيتك واهلك ونفسك بذكر الله من عيون الناظرين
حتى يحفظكم من شر الناس فاغلب الناس تستكثر الخير على العباد

اخى الغالى اعلم انه من اليوم ستكون كل امور بيتك سراً
فلا يتدخل بينكم احداً اياً كان واعلم ان لكل مشكله الف حل
ولكن بالحكمه وبتحقير حجم المشكلات والتغلب عليها

واخيراً اخى


انهنيئك بدخولك عالم المسئوليه وتوديعك عالم الصبا

واهنئك بنعيم الدنيا وحسن ثواب الاخره

واهنئك باجمل من رأت عينيك وارتاح لها قلبك

واهنئك بالراحه والسكينه والموده والرحمه والذريه التى وعدكم الله بها

وعقبالى