انسان اه......انسان

صباح الخير

انهارده كنت عاوز اكلمكوا عن الغرائب
وبعدين وقفت ...وبصيت حوليا... لقتنى انا احد الغرائب
مش انا. انا بالذات لاءه.. البنى ادام كله .. الانسان يعنى

تعرفوا ان الانسان هو الكائن الوحيد الى بيقوم بعمل اشياء بدون سبب
اه بدون ابداء اسباب... وبدون داعى اصلا...
وكتير بدون اتنظار نتائج لهذه الافعال...

الانسان هو الوحيد فى خلق الله الذى يتمنى الحياه العشوائيه
والفوضاويه...
الانسان هو الوحيد الذى يحلم بالعوده للوراء.. للماضى
ليس حبا للتاريخ ... ولكن حبا فى لخبطه كيان الوجود


على سيبل المثال

الحيوان مهما كان مفترس وشرس لا ياكل الا اذا كان جعان
ولو شبع تساوى الاسد مع الارنب... الا فى حاله الدفاع عن النفس
حتى الثعبان لا يلدغ ابدا وهو ممتلىء البطن
حتى الحمار... الحمااااار
مايكولش ابدا الا وهو فى حاجه للطعام
كمان فى حاجه كل حيوان او كائن له نوع معين من الطعام ياكله
نقدر نقول مابيغيريش....
مابيعكش يعنى.....
حيوانات بتاكل نباتات يعنى نباتات فقط (زرع

واخرى تاكل لحوم برضه لحوم فقط (فرائس

واخرى حبوب برضه حبوب بس (بتنقر

حتى الحيوانات الى بتاكل زباله متكلش غير الزباله (مزاجه

والف هنا ويحمد ربه

نيجى كده نشوف الانسان
يبدا فى الوجبه بتعته... يقولك انا ديما ابدأ بالشوربه
ولو ست تقولك انا بحب ابدأ بالسلاطه....
ثم يهم فى حشر.. ودفس.. كل ما يقدم له اشى لحمه مشويه ومقليه
ومحمره... وبعدين فراخ... وسمك.... وانواع الخضار.. والروز.. والمكرونه
ويسال مافيش بدنجانه مخلله.... او حته خيار مخلل
طيب كام صباع ورق عنب كده اصله مزز..
وبعدين مافيش مانع من حته رقاق... او جلاش ...او سمبوسك
او كلهم سوا يوانسوا بعض فى بطنه

ولما يملى بطنه تمام... التمام....
يبداء يحلى يا باشا... اه يحلى.....

اشى ام على .... واشى جيلى .... وروز بلبن... وحته بسبوسه
وحته كنافه صغنونه....تمام ياعم كده انت ميه ميه
ناقص حته جاتوة.... او تورته لو فيه يعنى...!

يجى للفواكه ... صوباع موز.. عالشان الكالسيوم... وبرتقاله عالشان فتامين سى
وخوخه علشان الصوديوم....وبطيخ دى عباره ميه ياعم ... هو ده يتحسب...!
طيب خلصت ياعم اتكيفت

نحبس بقى ها؟ شاى ....ولا نسكافيه.... ولا حاجه ساقعه....؟
يقولك نبدا بالبيبسى... وبعدين نسكافيه بلاك .... وخالى الشاى للاخر...!

حبست ياعمنا واخدت واجبك كله تمام التمام ... نتسلى بقى واحنا قعدين
نجيب شويه كاجو .. وشويه لب وسودانى....وشويه مكسرات صينى
نأزأز واحنا قعدين نتفرج على المسلسل

على عمنا الانسان مايخلص الحجات دى يكون معاد الوجبه الى بعدها جه
ماهو المصيبه اننا بناكل بمواعيد مش لما جسمنا يطلب الاكل
ونفضل ناكل طول ماحنا عايشين...
ويفضلوا يحلفوا عليك.. تعدامنى لو ما اكلتش دى
خد دى من ايدى عاوز تكسف ايدى؟؟؟
طب دوق الصنف ده اول مره اعمله جه فى البرنامج على الدش..
المعلم .....يحشر.... ويدفس ..... ويلغ...ويلهط...

والله بستغرب احنا رمضان بيعدى علينا ازاى

بزمتكوا مين اعقل الانسان ولا الحيوان مين بيفهم اكتر ....؟؟؟؟؟؟

نيجى لنقطه تانيه مثال تانى يعنى:-

الحيوان كائن فاهم ذاته وصريح مع نفسه
التزاوج عند الحيوان بيتم من اجل الحفاظ على النوع وعدم الانقراض
دى سبب نبيل جدا للعمليه الجنسيه وهيخليها حاجه محترمه....
وبعدين وده المهم....
لما عدد الحيوانات بيزيد اوى ...
بنلاقى الحيوانات بتعمل مايسميه الانسان انتحار جماعى
بقول الانسان هو الى بيسميه كده....
بس اعتقد ان الحيوانات بتسميه اتاحه فرصه لحياه اخرين....
اوعوا حد يقول انى حيوان وبفهم لغتهم ودماغهم..
لاء انا بقول اعتقد...

نيجى للشمهندس.... الانسان...
اولا الانسان بيمارس الجنس فى المقام الاول من اجل اشباع رغبه
ايوة رغبه تتملكه وتسيطر عليه وتقوده احيانا...!
واخر ما يفكر فيه اثناء ممارسته للجنس هو انجاب الذريه.. الاولاد

الاغرب ان الانسان بيخترع وسائل نتظيم الاسره علشان يجعل الجنس
اكثر حيوانيه (سورى انسانيه) وليجعله بدون اى نتيجه الا اشباع رغبه
وحتى تكون ايضا ممارسه للجنس بلا سبب
بدون هدف... بدون رد فعل... بدون نتيجه تذكر

طيب ولما عدد البشر يزيد ويبقوا مش طايقين بعض يعملوا ايه
ااقولك ياعم
بيعملوا حروب يموتوا بيها بعض
ويخترعوا اسلحه يقتلوا بيها بعض
اه الانسان يخترع سلاح علشان يموت بيه نفسه بس مش بايده لاء بايد غيره
الانسان اجبن من انه يقدم على كده

طيب مثال تالت
تصدقوا ان الانسان هو الكائن الوحيد الى بيختار ينهى حيانه بمزاجه

زى ماقولنا الى بتعمله الحيوانات مش انتحار(ده اسمه اتاحه فرصه للاخرين للحياه
لكن الانسان بيحس ان حياته عبء عليه...
ايوة حياته بتصبح عبء مش قادر يتحمله
فيقدم الانسان على الانتحار ويقرر ينهى حياته...

على امل ان الموت اكثر رحمه من الحياه...

او اكتر رفاهيه
(واهــــــــــــــــــــم... وعايش فى اوهاااااااامه)
بزمتكوا حد عمره سمع عن حمار بيحاول الانتحار.....؟
الله يرحمك يا جــــاهين قال ... مافيش حمار حاول الانتحار

حد سمع ان اسد او زرافه...او غزال اكتئب لدرجه انه شرب سم
او اتفق مع تعبان يعضه بدون مايخد باله

الانسان اغرب مخلوقات الله لانه ابتعد عن الى صنعه (وخلقه )والى كتب الكتالوج بتاعه
ايوة الانسان.. له مخترع وفى كتالوج للانسان...
لكنه فضل مايقراش الكتالوج ده...
وفضل انه يكتشف نفسه بنفسه ... الى حصل انه بوز نفسه
ومحتاج يرجع تانى للمخترع علشان هو بس الى يقدر يصلحه...
ويرجعه لحاله المصنع (على رائى بتوع الموبيل

محتاجين نرجع تانى نعرف ايه الهدف من جودنا...
ووقتها نعرف ان الاشياء الاخرى مجرد اسباب بقاء
اما هدف الحياه فقد حدده من وهب الحياه
وبس.....

وشوش

صباح الخير
انهارده هكلمكوا عن ( اول امبارح
محدش يسأل متكلمتش عنه امبارح ليه؟

قلت افوق من الدهشه الاول علشان اعرف اعبر

.

.

.

اخوكوا اتعزم فى حفله....!
اه حفله بس مش اى حفله..
حفله بتاعه الناس الكبار الجامدين
حفله زى بتاعه ايام زمان
(حفله تنكريه)
تخيلوا بقى....فاكرين ليلى مراد وانو وجدى؟
ايام زماااااان اوى
انا روحت حفله من الحفلات دى
وعالى شوفتو فى الحفله
هو الحقيقه انا ماشوفتش حاجه ولا سمعتش حاجه
مش عاوزين مشاكل....
الحفله كانت فى فيلا كبيره على المحور فى طريق سته اكتوبر
فيلا ايه دى قصر جامد اوى
الجنينه بتاعته اد الحديقه الدوليه كدة
اللهم لا حسد -لم نفسك يا ممكن- بلاش أأر
المهم اظاهر اخوكم علشان متلهف اوى راح بدرى شويه
لاء هو الحقيقه راح بدرى اوى
انا كنت هناك الساعه تمانيه مسائا
ولابس الى على الحبل
البدله اياها الى اشتريتها فى فرح اخويا
دخلت القصر بقلب جامد معزوم ياعم ومعايا كارت دعوة
قابلونى السيكيورتى والبودى جاردز ودلونى على الجنينه
وانتظرت فى الجنينه
بينى وبينكوا لما ملقتش حد ..اتكسفت.. قلت اركن شويه لحد الناس ماتهل
وصل اول الناس يا عمنا الساعه حداشر ونص بالليل
وواضح برضه انه جه بدرى
كان لابس عادى بس سلم عالماشى واختفى
وماشفتوش تانى
على الساعه واحده صباحا بداء المدعوين يجوا
ستات جامده اوى من بتاعه (هوانم جاردن سيتى
لابسين فساتين من الى مابنشوفهاش الا فى عروض الازياء
وهدوم مابتجيش الا فى برامج الموضه بس.
وعمرنا ما بنشوفها فى الطبيعه حتى فى المناسبات الجامده
الفساتين طويله اوى زى فستان الاميره ديانا (فاكرينه).
ولبسين شال خفيف صغير اوى الى كتفهم
وكمان اغلبهم لابسين برانيط على راسهم
ولابسين على عنيهم قناع ايوة بس اكتشفت ان الاقنعه ماركات
يعنى قناع( بيركردان)و(فيرساتشى)و(ايف سان لوران)وحجات كتير كده
وكلهم الميكب بتعهم تقيل اوى ومحدد جدا
يعنى العيون تحتها اشى سواد تقيل اوى... او زرقان جامد... ومنهم فضى جامد اوى.. باين من تحت القناع
كمان الخدود والشعر مرشوش حاجه زى البرونز كده
دول الستات الى هى مدامات او الهوانهم

نيجى للاصغر شويه ..الموزز يعنى
البنات برضه لبسهم غريب بس مش زى التنين
وحده لابسه خدامه وعامله ملامحها اكنها فلبينيه
ووحده لابسه هدموم بتاعه العصور الوسطى فى اوربا
ووحده لابسه كاو بوى
ووحده لامؤخده نسيت تلبس- والعياذ بالله- ال ايه لبس بنات ليل
ووحده لابسه لبس اسواد فاسود
وكتير لابسين عادى بس مش عادى
عادى بالنسبه للحفله لكنه طبعا لبس شاذ جدا بالنسبه لبره الحفله
واغلب البنات رسمين تاتو على دراعهم وصدرهم ولا مؤخذه وسطهم.
الى رسمه برص اه والله برص
والى رسمه اسفل ضهرها حاجه زى سهم كده
والى رسمه اطار رقيق على درعها
والى رسمه خلخال على رجلها
كمان كل البنات لبسين حلق فى مناخيرهم
اولسانهم او لا مؤخده سورتهم
واغلب الروج والمونيكير اسود او حاجه قريبه من الاسود
وعيونهم حوليها هاله سودا
انا ماكونتش بركز معاهم علشان كده ماشوفتش اى حاجه
لان امى بتقرا المدونه بتعتى...فاهمينى طبعا
طبعا كل البنات لابسين وشوش (مسكات)
او رسمين على وشهم اشى قطه او حمامه او طاوس
او اسد او نمر
مش هحكيلكم بقى عن البوفيه الى كان طول شارع قصر النيل
اما المطربين و الفرقه فانا معرفهمش
بيغنوا اجنبى بس
كان واحد كده بيجيتار بيغنى لوحده
وبنت كمان بتغنى لوحدها بس بفرقه بتعزف
وبعدين اربعه بيغنوا سوا مع بعض
نيجى للرجاله
كل الرجاله فى الحفله الى مفروض انهم اجواز الهوانم
واهل البنات
كان اغلبهم عامل قناع على عينه وماسكين سيجار كلهم
كان بعضهم راسم على وشه برضه حاجه مش مواضحه ملامحه
اشى اسد او حمار وحشى او بومه
او لامؤخذه خنزير اوتيس
اخوكم فضل فى دهشه وذهول
ومسبهل وكان باين عليه اوى الحاله دى
بعد شويه كان فيه حفل فوم (رغاوى).
يعنى عقبال حبايبكم حمام السباحه ملينه رغاوى
والولاد والبنات بيدخلوا جوة الرغاوى يلعبوا
يلعبوا ايه ؟؟ معرفش طبعا... بقولكم لابس البدله
المهم انهم يدخلوا ويختفوا اد ما يختفوا... ويخرجوا تانى
والرغاوى كانت عاليه جدا يمكن لحد تانى دور وغويطه بغوط البسين
المهم قولت اتكلم مع حد بدل الوحده دى
اول حد حاولت اتكلم معاه؟
كان الى لابس وش حمار وحشى
فى الاول افتكرنى تبع الامن (بسبب البدله)
بس هو لاحظ ان عضلاتى متنفعش امن خالص
قالى حضرتك معزوم هزيت راسى بمعنى ايوة..
انا - ممكن -
قالى وانا فلان
اترعبت... حضرتك الدكتور فلان؟
قالى: ايوة تعرفنى
قلتله: طبعا.. حضرتك الى عامل كتاب ماده كذا عندى فى الجامعه
وحضرتك جيت محاضره واحده لغيت نص المنهج
كمان حضرتك كنت رجل مهم جدا فى احدى الحكومات
قالى: انت متابع السياسه بقى
قلتله: بمنتهى النفاق حضرتك علامه مهمه يا فندم
قالى: كويس ان الشباب مهتم وبيقرا
بينى وبينكوا خفت اتكلم معاه
وماصدقت جاله موبيل وخلعت منه
حبه ولاقيت واحد مشغبط على وشه
قلت اكلموا
مساء الخير
اهلا ازيك
ازى حضرتك اعرفك بنفسى انا - ممكن-
قالى: وانا فلان الفلانى
اهلا جانبك انا معجب اوى باعمالك
انت متابع الفنون
طبعا ...دانا ذواقه للفن (بكذب )
قالى: برافو برافو
قلت: دى حتى الماسك بتاع حضرتك كله زوق ومعبر اوى
قالى: بجد طب كويس
حسيت انه بينفضلى قلت اشد
ومشيت فى الحفله
لقيت الحته الى فيها المشروبات
كلهم بيشربوا حاجه اسمها تاكيلا
قلت بلاش لحسن تكون خمره
انا اشرب عصير توت
وجبت عصير التوت لونه شبه الخمرا جدا احمر قانى
كل الى يقرب منى يفتكرنى واد شاريب
وحده جت تكلمنى هى بتستاذن تعدى وبتسال عن السوفت درينك
شاورت لها
ميرسى ومشيت
قابلت واحد لابس ماسك اكنه شرير.. عنيف كده ورخم
واتكلمت معاه لاقيته طيب اوى ودمه خفيف
قلت له حضرتك الماسك بتاعك مش لايق عليك خالص
كان هيزعل
استدرجت الموقف قلت له انا اقصد انه عكس شخصيتك
قال ماهو انا بطلع الكبت الى جوايا فى الحفلات دى
بمعنى لو انت شخصيتك ضعيفه وتافه البس هتلر
لو انت مستبد ورخم وغلس البس جحا
لو انت غبى وحمار البس اينشتاين
لو انت ذكى ومركز مرموق البس شحات
قلت والله منطق برضه (بكلم روحى)
الواحد يبعيش فى الجانب الى معاشوش والى بيتمناه
خوفت اقله طب ما بدل ما نلبس ونقلع و كده منغير روحنا ارخص
ومشيت فى الحفله
قالبت واحد تانى شكله محترم اوى
اقرب ما يكون لشكل الزرافه ومش لابس ماسك
اصله بنظاره
اتكلمت معاه وبقوله حضرتك ثابت فى مكانك من بدرى
قالى اصل انك تكون ثابت افضل من تكون بتنقص
وبعدين لما تكون عارف ان اخرك كده وصعب جدا
انك تزيد يبقى الثبات فى حد زاته نجاح
قلت ايه الكلام المجعلص ده
هو مش عارف انى.. سطحى... وتافه؟؟؟
قلت له يافندم انا اعرف ان التطوير مهم حتى الوحد مايزهقش او يملل من حاله
قالى ده مبداء المتحمسين والى قضاياهم بسيطه
قلتله حضرتك بقالك كتير ساكت ومحدش بيهجمك
لامؤخذه فى وزارتك.. ياترى ده لان محدش بيفهم فيها؟
ولا انت الى قررت تبتعد عن الاثاره وتمشى جنب الحيط
قالى: هى الحيط هتشيل مين ولا مين انا غيرت نظام الوزاره وخليته عامل زى نظريه النسبيه بتاعه اينشتين حتى اجدع واحد فى الوزاره مش فهمها
وبكده بعدت خالص عن وجع الدماغ
قولت الراجل ده هيضع نفسه ويضيعنى معاه
اسحب منه على خفيف
شويه وقابلت وحده لبسه وش.... ولامؤخذه بس..!
اه لبسه وش (وهو ده تقريبا كل الى كانت لابساه ).
قلت اشوف النوع التانى من الناس (اقصد الستات)
قربت منها _ وعرفتها بنفسى_ قالتها انا ممكن
قالتلى لاء مش ممكن
قلتلها حضرتك ده اسمى (ممكن )
قالتلى ايه الاسامى دى
ولدك كان يقصد ايه بيه الاسم ده
قلتلها معرفش بس هو غلبان اوى ومعتقدش انه يقصد حاجه وحشه
حتى كتب الشيوعيه والمركسيه والناصريه الى بيقراها
معتقدش انها ممكن تخليه يفكر فى حاجه وحشه
قالتلى هو ابوك شيوعى
قلتلها ياهانم محدش شيوعى الشيوعيه انتهت من زمان
هو بيقرا بيحاول يفهم وانا سيبه براحته
قلتلها على فكره صوت حضرتك مش غريب عليا
قالتلى ايوة انا فلانه
قلتلها عارفك طبعا بتاعه الافلام الشفتشى
الى بتعالج الغرائز الى عند الرجاله
قالتلى كويس انك فهمتها كده
قلتلها اوعى حضرتك تكونى فاكرانى من العيال الى بتخش السيما علشان المناظر ولاعشان اشوف الممثله فلانه قالعه ولا حاجه
ابدا. انا ولا يهمنى صدر. ولا يهمنى ورك .انا الى يهمنى المضمون
انا بدخل افلام حضرتك علشان اقرا الى بين السطور
وبعدين حضرتك ليكى الفضل فى انى اتعلمت ازاى اعرف ابوس اصلا
قبل كده كنت فاكر كل البوس واحد لحد حضرتك ماجيتى وعلمتينى فى افلامك انه كله عن العرب صابون
قالتلى احنا عاوزين البلد يتقدم ومش عاوزين اغتصاب
ومش عاوزين تحرش ومش عاوزين ظلم للمراءه
قالتها انت تقصدى نقدم الاشباع للشباب فمحدش يفكر فى الحجات دى؟
يعنى نعلمهم يتجوزوا عرفى
ونعلم البنات ان غشاء البكاره مالوش علاقه بالشرف.
وانها حره فى جسمها ...ومحدش هيخاف عليها اكتر منها.
ان مش من حق اخوها وابوها يعملوا وصايه عليها...
وكل واحد يهتم بشانه....
ونعرفهم ان علاقه الصحبيه بين الولاد والبنات دى امر اصبح عادى
ونفهمهم ان الوحده الى تتباس وتتحضن بس دى منتهى الطهاره
ونوعيهم ان الراجل الى يعرف وحده بس دى متخلف ورجعى
قالتلى واضح انك مبتفهمش...
وسابتنى وميشيت
قالت لنفسى مانا الى غلطان....حاجه مبفهمش فيها بتكلم فيها ليه؟؟؟؟؟!
وانا بعاتب روحى جاتلى وحده بتقولى انت زعلت الاستاذه
فلانه ليه
صوتها ياجماعه كروان
وهى حلوة بصراحه
قالتها حضرتك الدكتوره فلانه بتاعه البرامج
قالتلى ايون وفلانه صحبتى وانت زعلتها هو احنا جاين نتنكد هنا ولا ننبسط
قلتها والله يا هـــانم مزعلتها
بس انا فكرى محدود اتكلمت على اد ثقفتى وفهمى
ولازم الاستاذه تكون عارفه ان مش كل الناس فى مستواها الثقافى
قالتلى طيب وايه رائيك بقى فى البرامج بتاعتى
الست كانت لابسه لامؤخده لبس مرات الاسد
قويه ومستأسده متوحشه كده.. وفيها كل صفات مرات الاسد
انا اتهاتيت وخوفت منها
قلتلها حضرتك برامجك كلها هادفه دى حتى المذيعه الامريكيه الى اسمها اوبرا بتقلدك
انتى ستار ياهانم وكل افكارك بتتسرق ومحدش يقدر يغمض عينيه ولا يقفل بقه علشان مايفوتش حاجه من برامجك
لكن الى حسيته انك بتعزمى اصحابك بس فى البرامج
وكمان المواضيع كلها ليها علاقه ولامؤخده بقله ادب الشباب مره الموضوع العاده السريه ومره الزواج العرفى
ومره التحرش ومره بنات الليل
انا لما بكون لوحدى فى البيت بجيب البرنامج بتاعك على طول
وبستمتع اوى بكلامك ودلع ضيفوك
بس انا ولا مره قعدت لحد ما اسمع الحلول بتاعه المشاكل دى
يعنى انا وكل الى اعرفهم بنشوف المشكله ونستمتع بالكلام الجامد
ونقوم قبل ما نسمع الحل
وماقبلتش اى حد يعرف الحل الى البرنامج بيطرحه
دى مش عيب فى حضرك دول بتوع الاعداد الله يقطعهم
بينسوا يعمل حل للمشكلات من شده اندمجهم فى الحلقه.
الست بصت عليا من فوق لتحت وسابتنى من غير ولا كلمه
قلت لنفسى ايه الاحراج ده يأرض انشقى وابلعينى
قلت الم نفسى واقعد فى حالى اتابع واتفرج واستمتع
ومنكلمش حد تانى اقفل بقى شويه
نسيت اقولكم ان الحفله كان ممنوع اصطحاب الموبيل ابو كاميرا
وممنوع دخول اى كاميرات فيديو او فوتوغرافيا
وكان الامن بيفتش على الموبيلات الحديثه اكنها متفجرات
وانا بتابع شوفت ناس بتتكلم منهم واحد عنده فضيحه بيع حجات فاسده
للعيانين قلت هو له نفس يسهر ويفرفش
وبعدين قلت انت هتقر على الراجل دى فى اذمه وعادى لما يفك عن نفسه
وشوفت وحده فنانه السى دى بتعها مغرق السوق مع راجل الاعمال الكبير
وبتضحك ولا اكنها عملت حاجه
والحوار بيدور عن ان فى ناس هتخلص الموضوع ده
لان فى ناس كبيره وراه
الغريب انى شوفت واحده بتشتغل فى قناه دينيه بتقدم برامج
ايه الى جبها هنا دى؟!
وبعدين قلت ياواد صاهين ساعه لقلبك وساعه لربك
وكله اكل عيش
وكان واقف معاها فنانه معتزله ومتحجبه
بس حجاب من الى بيثير اكتر من الانجيرى
بيتكلموا عن جوزها الاخير وازى كان بيغير من طفل عنده سبعتاشر سنه
قفشها وهى بتبوسه على السلم
صحبتها بتهزر بتقولها كنتوا على السلم وتحت بير السلم
وقعدوا يضحكوا
وقالت لها بقولك سبعتاشر سنه
وسمعت كمان دكتور نفسانى مشهور ديما على الشاشه بيتكلم مع فنانه كبيره
بتشتكى ان بنتها بتعرف كذا واحد فى نفس الوقت
وبتسئله لحسن يكون ده مرض
الدكتور طمنها وقلها عادى السن ده كده
وقالها بس هى معاهم كلهم ولا مجرد اصدقاء
قالت لاء هى مع واحد بس ولما بتسيبه بتكون مع غيره
لكن بتخرج معاهم كلهم
قلها لاء اطمنى بنتك سلوكها سوى جدا
قالتله طمنتنى دانا كنت خايفه البنت تضيع منى
المهم انا بدا النوم يكبس عليا وبدات اكون مش مركز
قلت يا واد خد بعضك وروح.. المزيكا العاليه كمان صدعتنى اوى
اخدت بعضى وخرجت
اول ما خرجت حسيت انى محتاج هوا كتير مع انى كنت فى جنينه
وقفت على الكورنيش وانا راجع على -الكوبرى يعنى-
وفتحت الازاز واخدت نفس وقلت الحمد لله انى رجعت بالسلامه
اتارى مش كل السفر بالطيرات
دى ممكن الواحد يسافر بعيد اوى اوى وهو على رجله
وان البلد دى غير البلد دى
احنا فى بلدين يا اخوانا

ملحوظه الشخصيات فى المقال ليست
حقيقيه وفى حاله وجود اى تشابـــــــه
بينها وبين اى شخصيه عامه فهـــــــذا
من ضرب الصدفه البحـــــــــــــــته
( مـــــــمـــــــكــــــــن)

الناس بتاكل بعض......مش واكل

صباح الخير

هو احنا صحيح يا جماعه مخلوق محترم؟
اقصد هو احنا كويسين يعنى؟
متفهمونيش غلط ..... الى اقصده؟
يعنى احنا احسن وافضل مخلوقات ربنا؟
وهو احنا اتخلقنا وكل الحجات التانيه اتخلقت لخدمتنا ولمزجنا؟
طيب هو احنا عندنا مبدء؟
طيب هو احنا عندنا ثوابت ومتغيرات؟

والله مانا عارف...
طيب تعالوا نفرض اننا بقدره قادر اتقدمنا فى العلم
(ياعم اتخيل.. بقول اتخيل....هو احنا هنخسر حاجه)

وقدرنا بقدره قادر برضو اننا نوصل لكوكب خارج المجره بتعتنا
واحنا هناك بقى ياعمنا ....لاقينا كوكب صغير مش مشهور ... فيه ناس شبهنا
بس مش شبهنا اوى فى اختلاف
هما اكثر وسامه وجسمهم مش مبعجر زينا
رشاقه يابنى ادم
عضمهم مش من نفس الماده بتعتنا... لأ ماده تانيه لينه
زى الغضرايف كده وارق
دمهم زى الشربات او البن الحليب واحلى
كمان هما طيبين اوى يعنى بيحبو السلام بجد

مش زينا.....

السلام عندهم هدف
لكن

عندنا السلام وسيله إما للهروب من عدو اقوى
او لنيل جايزة زى بتاعه نوبل
لكن هما السلام عندهم اسلوب حياه

المهم انهم انتصوا فى نافوخهم وقرروا يمدوا حبال الصله بينا وبينهم
ويعملوا علاقات متبادله
.(ويكون هناك تبادل خبرات (من طرف واحد طبعا)

واصبح سكان الكوكب ده ريحين جاين علينا فى الارض
وبدأوا يبعتوا علمائهم وخبراتهم علشان يطورونا
ويملوا الدنيا خير وتقدم
طبيعتهم كده

(بعد مرور كام سنه كده)-

كنا عايشين زى الفل سمنه على عسل

المهم
حصلت مشكله بين واحد من البشر
وواحد من كائنات الفضاء
عادى الاخوات بيختلفوا ...ومصارين البطن بتتخانق
الخناقه اشتدت واتطورت وكلمه من ده وكلمه من ده
البنى ادم قام عض الكائن الفضائى ( اه عاضو

اكتشف ان طعم لحمه حلو اوى وجميل حتى وهو (نى
المهم علماء البشر اكتشفوا ان مش بس طعمه حلو
لأ
ده كمان الواد الى عض الكائن كان مريض وخف من مرضه
واصبح زى البغل صحه وعافيه
من اليوم ده اكتشف العلماء بتوعنا ان
اكل لحم الكائنات دىطلع ترياق ضد الموت والشيبه
يعنى الى يكله ولا يموت ولا يعجز خالص


تفتكر احنا هنعمل معاهم ايه؟ ها انطق...مترد؟
مال شفيفك دلدلت كده

هل؟....هل سيستمر السلام بينا وبينهم؟
ولا.... هيصبح عضهم واكلهم هدف؟
احنا فعلا ممكن نحاربهم ونصطادهم؟

اه ممكن
دى ممكن كمان الحكومات تعمل مشروع لتعليبهم وتوزعهم على بطاقه التموين
ممكن كمان يعملوهم عصير... وممكن اكياس زى البطاطس
وممكن حتت صغيره مقرمشه زى البوب كورن
وكمان ممكن محلى بالفواكه للاطفال
ممكن يتباعوا فى الجمعيات الاستهلاكيه لضمان وصلهم للجميع

طيب قتلهم هل يصبح منتهى الوفاء والشجاعه؟
خليك فاكر( ماشوفناش منهم الا كل خير
هل سيصبح الكذب عليهم لاصطيادهم فضيله؟
وهل سيصبح خيانتهم منتهى الوفاء والانسانيه؟

طيب يبقى الكدب اتساوى بالصدق
والخيانه اتساوة بالاخلاص
والقتل اصبح سلوك انسانى محترم (غريزى
وتوفير لحم الكائن الارقى اصبح عمل وطنى
طيب يبقى المفاهيم كده اتغيرت
والثوابت مابقتش ثوابت
عارفين ليه البشر عملت كده؟؟؟؟؟؟

لاء مش لانها بشر
لاء برضه مش لانها غريزة
الاجابه لان البشر خايفه..... ايو خايفه !
خايفه من ايه ؟؟؟

ااقولك خايفه من ايه...

خايفه من امكانيات الكائن الارقى الى جاى من الفضاء.. اوعى تكون نسيته
خايفه الكائن هو الى يبداء بالغدر وهو الى يسيطرعلى الموقف
وهو الى يحكم الانسان والبشر
وساعتها عادى جدا

.ان الكائن ده يعمل حديقه يسميها حديقه الانسان بالجيزة

(zoo)

ونلاقى قفص مكتوب عليه

هذا انسان كذاب الموطن الاصلى اوروبا
قفص تانى

هذا انسان منافق الموطن الاصلى افريقيا
هذا انسان منافق الموطن الاصلى استرليا
هذه انثى انسان نكديه الموطن الاصلى مصر
هذه انثى انسان لسنها طويل الموطن الاصلى مدونه
هذا صغير الانسان الموطن الاصلى اسيا

اه والى عملناه فى عالم الحيوان يطلع علينا ياعم
هو ده خوف الانسان ورعبه من ان الى بيعمله يحصله

الخوف بيغير فينا كتير بيغيرنا احنا نفسنا
بنكون مش احنا ياعمنا بنكون حد تانى.. وحش اوى.. دميم اوى.. معفن جدا
الخوف قادر يحولنا لكائنات مخيفه

كل الى حصل ده بسبب الخوف
خلينا نقولها بصوت عالى احنا مش خايقين....
مش هنتحول مش هنخلى خوفنا يسيطر علينا
هنرجع تانى للبراءه والطيبه والشرف والجدعنه
هنفضل فاكرين ان احنا بنى ادمين

لو حد قالك الناس بتاكل بعض قول..... مش واااكل
وبس

لحم رخيص

صباح الخير
سمعت زمان ان السعوديه حبت تعمل جنينه حيوانات زى بتاعه الجيزة
واستوردت قرود واسود وفيله من افرقيا ودببه من القضب الشمالى وتعابين وكينجارو من استرليا المهم
حارس القرد كل يوم يرمى للاسد سباطه موز علشان ياكل
الاسد طبعا ميكلش
اليوم الى بعده يجبله برضه موووز
والاسد ميكلش
وتلت يوم كذالك
لحد الاسد ما زهق وجاع اوى
راح الاسد فيوم خالى الحارس جاى واستعد.. واراح قفشه
وقاله :انت مبتفهمش؟ انا اسد مش باكل موووز
راح الحارس قاله : وانا اعملك ايه انت جاى بفيزة قرد

انهارده انا فرحان اوى...انا فى منتهى السعاده
حد يزغرت يا بنات حد يخدنى فحضنه ويهانينى
لازم كلنا نبارك لبعض
الحمد لله الحمد لله..... وزاره القوى العامله والتشغيل
قامت بطفره نوعيه وتخطو خطوات واسعه وجريئه
فى اطار رفع مستوى معيشه الافراد محدودى الدخل
كلنا عارفين طبعا ان مصر من اقوى البلاد المصدره
للقوى البشريه واكبر مصدر فى المنطقه للكوادر والخبرات

لكن الان وبعد العمر ده كله
وبعد مصر ما صدرت الدكتور احمد زويل والدكتور فاروق الباز
والدكتور مجدى يعقوب....والدكتور يحى المشد....

محدش يسال مين يحى المشد)...منش عاوز هطل...وكمان كابتن ميدو(احمد حسام)
وكابتن عبد الستار صبرى .. وزيدان.... وحسام غالى وغيرهم
امبارح قريت فى جريده عكاز السعوديه.. ان مصر وقعت اتفاقيه لتوريد عدد
ميه وتمانين الف خدامه للسعوديه

الواحد قلبه انشرح.. اخيرا ..هنخلص من الخدمات الزياده الى عندنا؟
اخيرا الواحد هيصحى من النوم مش هيلاقى تلت خدمات قدام باب الشقه؟
خدمات....؟؟! هى حصلت.. وصل بينا الحال ان افضل ما عندنا هو الخدمات؟!
ميه وتمانين الف خدامه؟؟؟....
هو السعوديه اصلا فيها ميه وتمانين الف بيت او شقه؟
دول كلاهم اربعه مليون نسمه .
محتاجين مننا احنا بس ميه وتمانين الف خدامه؟
والله وراحت على الفلبين

افرحوا ياجماعه هانوا بعض....عاوز الفرحه تبان فعنيكوا
الغريب انى كنت اعرف ان عمل الستات فى الخليج يلزمه محرم
طيب الخدمات دول ايه ملهمش محرم؟ يعنى من غير رجلتهم؟
ماشى
يبقى سنهم فوق الابعين يعنى الوحده منهم عندها تلت اربع عيال

ياترى بقى ياست الوزيره.. هتوفرى بيبى سيتر لولاد الخدمات دول؟
ولا الخدمات قبل سافرهم هيجيبوا خدمات لولادهم واجوازهم
ولا دى خطه للايجاد بديل وخليفه للتوربينى
الله اكبر
منتهى الفخر للعاملين فى السعوديه..

لما يلاقوا فى كل بيت من بيوت جيرانهم خدامه مصريه ياسلام على العزة .....

الله يامصر...ديما وللاده...
وديما عندنا جديد
الشىء المفرح بقى ان مرتب كل خدامه ماشاء الله تمنميت ريال
ايوة ثمانمائه ريال سعودى بحالهم
والعمل والاقامه فى نفس المكان...بمعنى ان العمل اربعه وعشرين ساعه
فى اليوم
الله الله الله يامصر ... ياسلام ياست الوزيره .. فعلا حليتى مشكله البطاله
والقاعده على القهوة....
هما الخدمات الى كانوا مشكله عندنا..؟ وعاوزين نسترهم فى بيوت اسيادهم
السعودين...؟
الواحد كده وهو رايح العمره يحط عينه فى عين اخوة السعودى بقلب جامد
علشان حريمنا الى بتاكلهم وبتشربهم
ياست الدكتور...بزمتك انتى بتلاقى خدامه بسهوله؟.. عندك حق مانتى وزيره

عينى عليكى ياما بتدوخى التلت دوخات لما البت سحر بتتعزز عليكى وتفضلى
ريحه جايه على مكتب المخدماتى وتتصلى( بقداما) الخادمات علشان يشفولك بنت ثابته عندك.. وتحلمى انها تكمل تلت تشهر على بعض
ايه رئيك يا امى لو تعملى فيزا لوحده من المسفرين دول يمكن الدكتوره تحن عليكى بوحده
اتقوا الله فى سمعه مصر يابتوع التشغيل احنا كده بقينا زى الفلبين
الى معندهاش غير الخدمين هما خلاص اتعودوا علــــى
كده... واحنا ملنا خلينا فى مشكلنا ..خلينا نحل مشاكل الشاب
الى مش لاقى يتجوز ..والبنات خريجات صيدله وطب وهندسه وطبعا تجاره وحقوق وكل الكليات الى خلقها ربنا...ياست الدكتور المفروض انك ام وتغيرى على لحم بلدك ... وسمعتها
وبعدين هما هيطلعوا على فيزا قرد...؟ ولا فيزا اسد..؟ وهناك هيشتغلوا وايه قرد ولا اسد.... ولا لاتنين وماخفى كان اعظم...؟؟؟؟؟

فتاوى القهاوى

صباح الخير يا جماعه
انا انهارده والله احترت اتكلم معاكوا فى ايه
لكن بالصدفه صحيت على موضوع غريب
قال ايه
واحد دكتور فى كليه اصول دين طلع على الفضائيات
وبيقول ان لو فى اتنين موظفين زى الست وفاء والاستاذ مخلص
قعدين مع بعض فى مكتب واحد طول النهار وطبعا الشيطان قاعد معاهم

كمان وفاء عقلها بقى يودى وبيجيب ياترى الواد مخلص جاى مستحمى
ولا الرايه مرفوعه عنده فى البيت؟
هو مسبسب اوى انهارده ....يبقى اكيد مستحمى
طيب ياترى هو الواد مخلص زميلى ده بيعمل نفس الحجات الى بيعملها سرحان جوزى؟
ولا فى حجات جديده بيعملوها ... الصراحه سرحان عفريت جن مصور هههههههه
دى صايع.. مترباش ..اصلا ... يالهوى اخرسى بقى يابت بلاش كده

كمان الاخ مخلص بعد ما جه لقى وفاء سرحانه وبتبسم وهى سرحانه فى الموضوع اياه
قال فى نفسه هى بتفكر فى ايه ؟
هى باين عليها بتفكر فى الى عملته امبارح
مع الاستاذ سرحان....
ياترى هى برضه فى البيت كده زى ماهى؟
لاء طبعا كل وحده ليها اسلوبها فى بيتها الى بتعرف بيه تتصرف مع جوزها
ياترى؟ .....يارترى وفاء من جوة كده برضه ولا مختلفه؟- البشمهندس يسرح بخياله-


سيبك من الخيال والواسع ده....

طلع باشا من جامعه الازهر داكتور كبير قال ايه
قالك يبقى حل الوضع ده ان وفاء تاخد مخلص على حجرها
وترضعه لحد مايشبع وينام.. وبعدين تقرعه.. اسمالله عليه لحسن يقشط
وبكده يبقى وفاء ومخلص ... مش هيفكروا فبعض تانى
لانهم شرعا ميجزوش لبعض
( اكن مثلا مخلص كان بيطلب ايد وفاء من جوزها)

مين قالك يا مولانا الشيخ الدكتور ان الموضوع موضوع جواز؟ او يجوز
ولا ميجوزش؟

يبقى كل وحده زميلها بيعكسها فى الشغل تروح توجهه. وتزنقه .وتقله اتفضل ارضع وخلصنى
او اى وحده بتفكر فى زميلها حتى لو انسه وخايفه من الفتنه ..... تاخد زميلها وترضعه
علشان ضميرها يرتاح
ياسلام بقى لما بنت تشتكى لامها ان واحد بيضيقها وبيعكسها... طبعا امها هتقولها يابنتى
ماترضعيه وخلصى نفسك

طيب ازاى حضرتك تفسر قصه الاب الى عمل عملته مع بنته من لحمه ودمه
ايون حضرتك بنته

الاب خمسه وستين سنه.. والبنت تسعتاشر سنه ... رجع ابوها اخر الليل
من فرح شعبى سكران وضارب جوانين بانجو و معاتول وبيهرتل
لاقى البنت نايمه من غير مايشعر عمل عملته
واصبحت البنت حامل من ابوها
وارسلت سؤال للمفتى تساله لو اجهضت الجنين حلال ولا حرام
ومش عارفه تتصرف ازاى
ماهو ابو الطفل هو هو جده

قالت فنفسى لو السؤال ده كان راح للامام ابن تيميه
او الامام البخارى او الامام بن القيم
كان ممكن يعمل ايه او يرد ازاى

والله مانا عارف بس اكيد كان جاله سكر وضغط واكتئاب

الاقصد واضح ان دكاتره الازهر اصبحوا فاضين ماورهمش
حاجه بيدور فى دفاترهم القديمه (زى الخواجه المفلس
ياعم ركز فى مشاكل الحاضر انزل للواقع شوف الشارع

المسلمين والمسحين بيقطعوا بعض فى الصعيد وانت بتتكلم
فى رضاعه الكبير لسه؟
اصحى ياعم الدنيا التغيرت
وكفايانا جرى ورا اضواء الفضائيات اياها
وبعدين ياعم الحاج لما النسوان ترضع الصغيرين
نبقى ندور على مين الى يرضع الكبار

وداعا بايام الامبالاه

لا.... لا ايتها الشرقيه.. يا خمريه البشره.. ويا سوداء العينين
.....لا تحتاجى لان تطاريحنى الفراش حتى تلفتى انتباهى اليكى
فانا ببساطه ليس يلفت انتباهى تشهبك بالغوانى
لست انا من يثيرالجسد فيه كل المشاعر
اسمعى ايتها الشرقيه...
انا اؤمن بان العين بالعين والسمع بالسمع والعقل بالعقل
انا لا اظنك غبيه... ولا اعتصرك...ثم اتركيكى كبقاياى
لن ارتوى بدموعك...
لن احاول تعريتك من قشورك حتى اصل لبذورك
لا ابغى ان اكون فارس وانتى مطيتى
رباه من زرع فيكى تلك الافكار؟؟
يا سيدتى قد احببتك كيانا كاملا
لم اتزوق عسلك الا برضاكى والا بعد استاذانك
مع حلاوته ...فهو ليس احلى ما فيكى
انى ريت فيكى ما لم يراه غيرى
حتى انتى لم تكتشفى فيكى مثل الذى اكتشف
ولا تنسى انى ذهبت الى اماكن فيكى انت نفسك لم تصلى اليها
لكن بر غم عشقى اليكى ....وبرغم رغبتى فيكى
فلن اركع تحت اقدامك كما ترغبين... لن اقبل اقدامك... لن اتمرمغ فى ترابك كما تحلمين
لا لن ابتعد عن شفتيك خوفا من حنقك
نعم اعشقك.. واعشق هوائك.. واغار من التراب الذى تدوسه اقدامك
لكن ابدا يا عشيقتى لست انا من يتسول لحظات معك....
ولن استجدى منك العطف والنجوى والحنان
وانتى كما اردتيها دوما
ان اردتنى كتفا.....اردتك صدرا
ان اردتنى وطن....اردتك بيتا

انا ماالى

ايوة انا مالى...
.متخلينى فحالى ....
انا همشى جنب الحيط...
امال يعنى هو الحيط ايه لزمته لو ما مشيتش جنبه
هو انا يعنى الفلحوس الى هغير الكون...
هو انا المحامى بتاع البشر ده كله...
يعنى هما مش عارفين الصح مــن الغلط ومستنين العبد لله يعلمهم....
بلاش فلسفه وبلاش فتحه صدر خلى كل واحد يتكلم على اد مرتبه او مصروفــه لو كان لسه فى المدرسه..
مين ينحج فى فرنسا ساركوزى ولا ميريت وانا مالى..
مين يتبرع بدمه فى اكياس فاسده..
وانا مالى
رغيف
العيش اتحسن ولا اتدهور وانا مالى..
الدنيا مطرت وانا مالى.. الدنيا حر وانا مالـى.....
طيــب انا عايش ليه.....؟؟؟؟؟
علشان ايه؟ وايه الهدف من حياتى؟
ولا هقول سلبيه ولا هقول نرجسيه
لاء انا بس اتربيت على ان رائى ملوش لزمه
وصوتى الانتخابى مالوش قيمه ولا بيقدم ولا بياخر
كمان فلوسى الى فجيبى متشتريش اكتر من وجبه متوسطه
وفلوسى الى فبيتى او فحسابى متكفيش لجوازة عاديه
طيب ليه بعد كل ده ااقولى مالى....؟
مالى ايه ..
مالى فى جيب غيرى مالى بيتحكم فيه الاخرين
مالى كان عباره عن عمرى المتمثل فى صوره وقت ...
وده ضايع فى عمل لا اقبض منه الا الفتات
ومالى المتمثل فى صوره حقوق لا اعرفها اصلا علشان اطالب بها..
كل ده كويس اوىلكن هو انا هنتظر ينزل ملاك من السما يصلح ده
ولا انا تقى وورع اوى وربنا هيغير كل ده علشان خاطرى؟
لاء يا جماعه طبعا ربنا قادر يغير كل شىء
( لكنه قال( لا يغير الله ما بقوم حتى يغيروا ما بانفسهم )
اه يا جماعه ربنا قادر يغير بس لازم احنا نسعى للتغير...
كمان نتخيل ايه شكل التغير..؟
التغير فى حد ذاته مش هدف.. لكن الهدف هو التغير للاحسن ..
ولازم احنا نعرف الاول ايه هو الاحسن ..وايه الضامن ان الجديد احسن من القديم
يبقى الحل ان كل واحد يغير من نفسه ..
اما مالى... المقصود بيها ان( كل ده مالى ايوة مالى ونص وكل ده انا ليا دعوة....
وهحط مناخيرى فى كل حاجه ...
ايوة مش همشى حنب الحيطه..... وتولع الحيطه بجاز مش همشى جنبها....
انشالله تقع الحيطه على دماغ اصحبها
اوتموت الحيطه من الوحده بدونى