Wednesday, June 13, 2007

وشوش




صباح الخير
انهارده هكلمكوا عن ( اول امبارح
محدش يسأل متكلمتش عنه امبارح ليه؟
قلت افوق من الدهشه الاول علشان اعرف اعبر
.
.
.

اخوكوا اتعزم فى حفله....!
اه حفله بس مش اى حفله..
حفله بتاعه الناس الكبار الجامدين
حفله زى بتاعه ايام زمان
(حفله تنكريه)
تخيلوا بقى....فاكرين ليلى مراد وانو وجدى؟
ايام زماااااان اوى
انا روحت حفله من الحفلات دى
وعالى شوفتو فى الحفله
هو الحقيقه انا ماشوفتش حاجه ولا سمعتش حاجه
مش عاوزين مشاكل....
الحفله كانت فى فيلا كبيره على المحور فى طريق سته اكتوبر
فيلا ايه دى قصر جامد اوى
الجنينه بتاعته اد الحديقه الدوليه كدة
اللهم لا حسد -لم نفسك يا ممكن- بلاش أأر
المهم اظاهر اخوكم علشان متلهف اوى راح بدرى شويه
لاء هو الحقيقه راح بدرى اوى
انا كنت هناك الساعه تمانيه مسائا
ولابس الى على الحبل
البدله اياها الى اشتريتها فى فرح اخويا
دخلت القصر بقلب جامد معزوم ياعم ومعايا كارت دعوة
قابلونى السيكيورتى والبودى جاردز ودلونى على الجنينه
وانتظرت فى الجنينه
بينى وبينكوا لما ملقتش حد ..اتكسفت.. قلت اركن شويه لحد الناس ماتهل
وصل اول الناس يا عمنا الساعه حداشر ونص بالليل
وواضح برضه انه جه بدرى
كان لابس عادى بس سلم عالماشى واختفى
وماشفتوش تانى
على الساعه واحده صباحا بداء المدعوين يجوا
ستات جامده اوى من بتاعه (هوانم جاردن سيتى
لابسين فساتين من الى مابنشوفهاش الا فى عروض الازياء
وهدوم مابتجيش الا فى برامج الموضه بس.
وعمرنا ما بنشوفها فى الطبيعه حتى فى المناسبات الجامده
الفساتين طويله اوى زى فستان الاميره ديانا (فاكرينه).
ولبسين شال خفيف صغير اوى الى كتفهم
وكمان اغلبهم لابسين برانيط على راسهم
ولابسين على عنيهم قناع ايوة بس اكتشفت ان الاقنعه ماركات
يعنى قناع( بيركردان)و(فيرساتشى)و(ايف سان لوران)وحجات كتير كده
وكلهم الميكب بتعهم تقيل اوى ومحدد جدا
يعنى العيون تحتها اشى سواد تقيل اوى... او زرقان جامد... ومنهم فضى جامد اوى.. باين من تحت القناع
كمان الخدود والشعر مرشوش حاجه زى البرونز كده
دول الستات الى هى مدامات او الهوانهم
نيجى للاصغر شويه ..الموزز يعنى
البنات برضه لبسهم غريب بس مش زى التنين
وحده لابسه خدامه وعامله ملامحها اكنها فلبينيه
ووحده لابسه هدموم بتاعه العصور الوسطى فى اوربا
ووحده لابسه كاو بوى
ووحده لامؤخده نسيت تلبس- والعياذ بالله- ال ايه لبس بنات ليل
ووحده لابسه لبس اسواد فاسود
وكتير لابسين عادى بس مش عادى
عادى بالنسبه للحفله لكنه طبعا لبس شاذ جدا بالنسبه لبره الحفله
واغلب البنات رسمين تاتو على دراعهم وصدرهم ولا مؤخذه وسطهم.
الى رسمه برص اه والله برص
والى رسمه اسفل ضهرها حاجه زى سهم كده
والى رسمه اطار رقيق على درعها
والى رسمه خلخال على رجلها
كمان كل البنات لبسين حلق فى مناخيرهم
اولسانهم او لا مؤخده سورتهم
واغلب الروج والمونيكير اسود او حاجه قريبه من الاسود
وعيونهم حوليها هاله سودا
انا ماكونتش بركز معاهم علشان كده ماشوفتش اى حاجه
لان امى بتقرا المدونه بتعتى...فاهمينى طبعا
طبعا كل البنات لابسين وشوش (مسكات)
او رسمين على وشهم اشى قطه او حمامه او طاوس
او اسد او نمر
مش هحكيلكم بقى عن البوفيه الى كان طول شارع قصر النيل
اما المطربين و الفرقه فانا معرفهمش
بيغنوا اجنبى بس
كان واحد كده بيجيتار بيغنى لوحده
وبنت كمان بتغنى لوحدها بس بفرقه بتعزف
وبعدين اربعه بيغنوا سوا مع بعض
نيجى للرجاله
كل الرجاله فى الحفله الى مفروض انهم اجواز الهوانم
واهل البنات
كان اغلبهم عامل قناع على عينه وماسكين سيجار كلهم
كان بعضهم راسم على وشه برضه حاجه مش مواضحه ملامحه
اشى اسد او حمار وحشى او بومه
او لامؤخذه خنزير اوتيس
اخوكم فضل فى دهشه وذهول
ومسبهل وكان باين عليه اوى الحاله دى
بعد شويه كان فيه حفل فوم (رغاوى).
يعنى عقبال حبايبكم حمام السباحه ملينه رغاوى
والولاد والبنات بيدخلوا جوة الرغاوى يلعبوا
يلعبوا ايه ؟؟ معرفش طبعا... بقولكم لابس البدله
المهم انهم يدخلوا ويختفوا اد ما يختفوا... ويخرجوا تانى
والرغاوى كانت عاليه جدا يمكن لحد تانى دور وغويطه بغوط البسين
المهم قولت اتكلم مع حد بدل الوحده دى
اول حد حاولت اتكلم معاه؟
كان الى لابس وش حمار وحشى
فى الاول افتكرنى تبع الامن (بسبب البدله)
بس هو لاحظ ان عضلاتى متنفعش امن خالص
قالى حضرتك معزوم هزيت راسى بمعنى ايوة..
انا - ممكن -
قالى وانا فلان
اترعبت... حضرتك الدكتور فلان؟
قالى: ايوة تعرفنى
قلتله: طبعا.. حضرتك الى عامل كتاب ماده كذا عندى فى الجامعه
وحضرتك جيت محاضره واحده لغيت نص المنهج
كمان حضرتك كنت رجل مهم جدا فى احدى الحكومات
قالى: انت متابع السياسه بقى
قلتله: بمنتهى النفاق حضرتك علامه مهمه يا فندم
قالى: كويس ان الشباب مهتم وبيقرا
بينى وبينكوا خفت اتكلم معاه
وماصدقت جاله موبيل وخلعت منه
حبه ولاقيت واحد مشغبط على وشه
قلت اكلموا
مساء الخير
اهلا ازيك
ازى حضرتك اعرفك بنفسى انا - ممكن-
قالى: وانا فلان الفلانى
اهلا جانبك انا معجب اوى باعمالك
انت متابع الفنون
طبعا ...دانا ذواقه للفن (بكذب )
قالى: برافو برافو
قلت: دى حتى الماسك بتاع حضرتك كله زوق ومعبر اوى
قالى: بجد طب كويس
حسيت انه بينفضلى قلت اشد
ومشيت فى الحفله
لقيت الحته الى فيها المشروبات
كلهم بيشربوا حاجه اسمها تاكيلا
قلت بلاش لحسن تكون خمره
انا اشرب عصير توت
وجبت عصير التوت لونه شبه الخمرا جدا احمر قانى
كل الى يقرب منى يفتكرنى واد شاريب
وحده جت تكلمنى هى بتستاذن تعدى وبتسال عن السوفت درينك
شاورت لها
ميرسى ومشيت
قابلت واحد لابس ماسك اكنه شرير.. عنيف كده ورخم
واتكلمت معاه لاقيته طيب اوى ودمه خفيف
قلت له حضرتك الماسك بتاعك مش لايق عليك خالص
كان هيزعل
استدرجت الموقف قلت له انا اقصد انه عكس شخصيتك
قال ماهو انا بطلع الكبت الى جوايا فى الحفلات دى
بمعنى لو انت شخصيتك ضعيفه وتافه البس هتلر
لو انت مستبد ورخم وغلس البس جحا
لو انت غبى وحمار البس اينشتاين
لو انت ذكى ومركز مرموق البس شحات
قلت والله منطق برضه (بكلم روحى)
الواحد يبعيش فى الجانب الى معاشوش والى بيتمناه
خوفت اقله طب ما بدل ما نلبس ونقلع و كده منغير روحنا ارخص

ومشيت فى الحفله
قالبت واحد تانى شكله محترم اوى
اقرب ما يكون لشكل الزرافه ومش لابس ماسك
اصله بنظاره
اتكلمت معاه وبقوله حضرتك ثابت فى مكانك من بدرى
قالى اصل انك تكون ثابت افضل من تكون بتنقص
وبعدين لما تكون عارف ان اخرك كده وصعب جدا
انك تزيد يبقى الثبات فى حد زاته نجاح
قلت ايه الكلام المجعلص ده
هو مش عارف انى.. سطحى... وتافه؟؟؟
قلت له يافندم انا اعرف ان التطوير مهم حتى الوحد مايزهقش او يملل من حاله
قالى ده مبداء المتحمسين والى قضاياهم بسيطه
قلتله حضرتك بقالك كتير ساكت ومحدش بيهجمك
لامؤخذه فى وزارتك.. ياترى ده لان محدش بيفهم فيها؟
ولا انت الى قررت تبتعد عن الاثاره وتمشى جنب الحيط
قالى: هى الحيط هتشيل مين ولا مين انا غيرت نظام الوزاره وخليته عامل زى نظريه النسبيه بتاعه اينشتين حتى اجدع
واحد فى الوزاره مش فهمها
وبكده بعدت خالص عن وجع الدماغ

قولت الراجل ده هيضع نفسه ويضيعنى معاه
اسحب منه على خفيف

شويه وقابلت وحده لبسه وش.... ولامؤخذه بس..!
اه لبسه وش (وهو ده تقريبا كل الى كانت لابساه ).
قلت اشوف النوع التانى من الناس (اقصد الستات)
قربت منها _ وعرفتها بنفسى_ قالتها انا ممكن
قالتلى لاء مش ممكن
قلتلها حضرتك ده اسمى (ممكن )
قالتلى ايه الاسامى دى
ولدك كان يقصد ايه بيه الاسم ده

قلتلها معرفش بس هو غلبان اوى ومعتقدش انه يقصد حاجه وحشه
حتى كتب الشيوعيه والمركسيه والناصريه الى بيقراها
معتقدش انها ممكن تخليه يفكر فى حاجه وحشه
قالتلى هو ابوك شيوعى
قلتلها ياهانم محدش شيوعى الشيوعيه انتهت من زمان
هو بيقرا بيحاول يفهم وانا سيبه براحته
قلتلها على فكره صوت حضرتك مش غريب عليا
قالتلى ايوة انا فلانه
قلتلها عارفك طبعا بتاعه الافلام الشفتشى
الى بتعالج الغرائز الى عند الرجاله
قالتلى كويس انك فهمتها كده
قلتلها اوعى حضرتك تكونى فاكرانى من العيال الى بتخش السيما علشان المناظر ولاعشان اشوف الممثله فلانه قالعه ولا حاجه
ابدا. انا ولا يهمنى صدر. ولا يهمنى ورك .انا الى يهمنى المضمون
انا بدخل افلام حضرتك علشان اقرا الى بين السطور
وبعدين حضرتك ليكى الفضل فى انى اتعلمت ازاى اعرف ابوس اصلا
قبل كده كنت فاكر كل البوس واحد لحد حضرتك ماجيتى وعلمتينى فى افلامك انه كله عن العرب صابون
قالتلى احنا عاوزين البلد يتقدم ومش عاوزين اغتصاب
ومش عاوزين تحرش ومش عاوزين ظلم للمراءه

قالتها انت تقصدى نقدم الاشباع للشباب فمحدش يفكر فى الحجات دى؟
يعنى نعلمهم يتجوزوا عرفى
ونعلم البنات ان غشاء البكاره مالوش علاقه بالشرف.
وانها حره فى جسمها ...ومحدش هيخاف عليها اكتر منها.
ان مش من حق اخوها وابوها يعملوا وصايه عليها...
وكل واحد يهتم بشانه....
ونعرفهم ان علاقه الصحبيه بين الولاد والبنات دى امر اصبح عادى
ونفهمهم ان الوحده الى تتباس وتتحضن بس دى منتهى الطهاره
ونوعيهم ان الراجل الى يعرف وحده بس دى متخلف ورجعى
قالتلى واضح انك مبتفهمش...
وسابتنى وميشيت
قالت لنفسى مانا الى غلطان....حاجه مبفهمش فيها بتكلم فيها ليه؟؟؟؟؟!
وانا بعاتب روحى جاتلى وحده بتقولى
انت زعلت الاستاذه
فلانه ليه
صوتها ياجماعه كروان
وهى حلوة بصراحه
قالتها حضرتك الدكتوره فلانه بتاعه البرامج
قالتلى ايون وفلانه صحبتى وانت زعلتها هو احنا جاين نتنكد هنا ولا ننبسط
قلتها والله يا هـــانم مزعلتها
بس انا فكرى محدود اتكلمت على اد ثقفتى وفهمى
ولازم الاستاذه تكون عارفه ان مش كل الناس فى مستواها الثقافى

قالتلى طيب وايه رائيك بقى فى البرامج بتاعتى
الست كانت لابسه لامؤخده لبس مرات الاسد
قويه ومستأسده متوحشه كده.. وفيها كل صفات مرات الاسد
انا اتهاتيت وخوفت منها
قلتلها حضرتك برامجك كلها هادفه دى حتى المذيعه الامريكيه الى اسمها اوبرا بتقلدك
انتى ستار ياهانم وكل افكارك بتتسرق ومحدش يقدر يغمض عينيه ولا يقفل بقه علشان مايفوتش حاجه من برامجك
لكن الى حسيته انك بتعزمى اصحابك بس فى البرامج
وكمان المواضيع كلها ليها علاقه ولامؤخده بقله ادب الشباب مره الموضوع العاده السريه ومره الزواج العرفى
ومره التحرش ومره بنات الليل
انا لما بكون لوحدى فى البيت بجيب البرنامج بتاعك على طول
وبستمتع اوى بكلامك ودلع ضيفوك
بس انا ولا مره قعدت لحد ما اسمع الحلول بتاعه المشاكل دى
يعنى انا وكل الى اعرفهم بنشوف المشكله ونستمتع بالكلام الجامد
ونقوم قبل ما نسمع الحل
وماقبلتش اى حد يعرف الحل الى البرنامج بيطرحه
دى مش عيب فى حضرك دول بتوع الاعداد الله يقطعهم
بينسوا يعمل حل للمشكلات من شده اندمجهم فى الحلقه.
الست بصت عليا من فوق لتحت وسابتنى من غير ولا كلمه
قلت لنفسى ايه الاحراج ده يأرض انشقى وابلعينى
قلت الم نفسى واقعد فى حالى اتابع واتفرج واستمتع
ومنكلمش حد تانى اقفل بقى شويه
نسيت اقولكم ان الحفله كان ممنوع اصطحاب الموبيل ابو كاميرا
وممنوع دخول اى كاميرات فيديو او فوتوغرافيا
وكان الامن بيفتش على الموبيلات الحديثه اكنها متفجرات
وانا بتابع شوفت ناس بتتكلم منهم واحد عنده فضيحه بيع حجات فاسده
للعيانين قلت هو له نفس يسهر ويفرفش
وبعدين قلت انت هتقر على الراجل دى فى اذمه وعادى لما يفك عن نفسه
وشوفت وحده فنانه السى دى بتعها مغرق السوق مع راجل الاعمال الكبير
وبتضحك ولا اكنها عملت حاجه
والحوار بيدور عن ان فى ناس هتخلص الموضوع ده
لان فى ناس كبيره وراه
الغريب انى شوفت واحده بتشتغل فى قناه دينيه بتقدم برامج
ايه الى جبها هنا دى؟!
وبعدين قلت ياواد صاهين ساعه لقلبك وساعه لربك
وكله اكل عيش
وكان واقف معاها فنانه معتزله ومتحجبه
بس حجاب من الى بيثير اكتر من الانجيرى
بيتكلموا عن جوزها الاخير وازى كان بيغير من طفل عنده سبعتاشر سنه
قفشها وهى بتبوسه على السلم
صحبتها بتهزر بتقولها كنتوا على السلم وتحت بير السلم
وقعدوا يضحكوا
وقالت لها بقولك سبعتاشر سنه
وسمعت كمان دكتور نفسانى مشهور ديما على الشاشه بيتكلم مع فنانه كبيره
بتشتكى ان بنتها بتعرف كذا واحد فى نفس الوقت
وبتسئله لحسن يكون ده مرض
الدكتور طمنها وقلها عادى السن ده كده
وقالها بس هى معاهم كلهم ولا مجرد اصدقاء
قالت لاء هى مع واحد بس ولما بتسيبه بتكون مع غيره
لكن بتخرج معاهم كلهم
قلها لاء اطمنى بنتك سلوكها سوى جدا
قالتله طمنتنى دانا كنت خايفه البنت تضيع منى
المهم انا بدا النوم يكبس عليا وبدات اكون مش مركز
قلت يا واد خد بعضك وروح.. المزيكا العاليه كمان صدعتنى اوى
اخدت بعضى وخرجت
اول ما خرجت حسيت انى محتاج هوا كتير مع انى كنت فى جنينه
وقفت على الكورنيش وانا راجع على -الكوبرى يعنى-
وفتحت الازاز واخدت نفس وقلت الحمد لله انى رجعت بالسلامه
اتارى مش كل السفر بالطيرات
دى ممكن الواحد يسافر بعيد اوى اوى وهو على رجله
وان البلد دى غير البلد دى
احنا فى بلدين يا اخوانا


ملحوظه الشخصيات فى المقال ليست

حقيقيه وفى حاله وجود اى تشابـــــــه
بينها وبين اى شخصيه عامه فهـــــــذا
من ضرب الصدفه البحـــــــــــــــته
( مـــــــمـــــــكــــــــن)

34 comments:

semsem said...

وهو مين بقى اللى كان عازمك فى الحفله الجامده دى
مش ممكن يا ممكن دا يكون بجد
ولا ليه ممكن ما هى كل حاجه بقيت ممكن
بوست هايل جدا
تحياتى

bastokka طهقانة said...

ههههههههههههه
فكرتني بعبد الحليم في فيلم اللي كان طالع مخترع و راح لصاحب الشركة يقدم له المشروع بالبدلة القديمة افتكروه متنكر في دور موظف فقير
ههههههههه

برص؟؟ لا يا سيدي ده تمساح بس الخمرة و الستات سخطوه
ههههههههه



اوروفوار

دنـيـا محيراني(ايناس لطفي said...

انت يا عم ممكن الحكايه ده حقيقي و لا خيال الحفله ممكن اما الناس برضه ممكن علي العموم ده تخيل حلو اوي قصه طريفه من تاليفك واضح هاتكون واد قصاص كويس اوي انا بتكلم بجد
اسلوبك حلو بجد ماحسيتش بملل خالص و شفت في خيالي الناس الاي كنت بتقصدهم اعتقد ممكن تكون مؤلف جيد يا ممكن انا بقول ممكن :(

momken said...

semsem
ـ.ـ.ـ.ـ.ـ.
نورتينى يا سمسم ومتشكر على رائيك الجامد الى عزمنى العضو المنتدب فى الشركه الى انا احد مديريها ولو عرف انى فضحته كده على البلوج قليل ايما علقنى

طهقـــــانه
ـ.ـ.ـ.ـ.
هههههههههه ايوة افتكرت الفيلم بتاع حليم الى كانت فيه ايمان
بس عندى كانت نيتهم كويسه افتكرونى احد رجال الامن سيكيورتى ايام عبد الحليم المعازيم كانوا سوزج نورتينى يا بسكوته وتحياتى لطهقان

دنيــــــا
ـ.ـ.ـ.ـ.ـ.ـ.

ياستى الحفله حقيقيه وكل الى فيها حصل لكن للامانه انا حكيته بطريقتى علشان ياخد طعم ولو وسحنه (ممكن)بس
اما بالنسبع لانى اكون مؤلف فادى شهاده انا اعتز بيها من وحده انا بعتبرها الاكثر متعه ضمن جميع البلوجر
نورتينى يا دنيا

Ahmed Shokeir said...

بتفكرني بفيلم مهم جدا لستانلي كوبرنيك عمل ضجة جامدة جدا بطولة توم كروز ونيكول كيدمان
اسمه
Eyes wide shut
الفيلم كله بيدور عن نوعيه الحفلات دي ودخله واحد زي حضرتك بس خلسة وبطريق الخطأ .. وماشاهده يشيب له الولدان من الرجال والسيدات في قمة السلم الإجتماعي
وكان سيقضي نحبه عندما إكتشف انه دخل الحفل بالتدليس وتحول الفيلم بعدها لقمة الإثارة مع هؤلاء مرتدي الماسكات وإسم الفيلم موحي بذلك

أحييك واسمحلي اضعه عندي في

Post of the day

سكينة said...

مش ممكن يا ممكن مامتك بتقرأ المدونة
:)
يمكن للإنسان أن يسافر وهو في مكانه جملة قوية وصادقة
ويا رب يكثر من الساعات الممكنة في حياتك وحفلاتك

Anonymous said...

يا بني

نص الشخصيات الي ذكرتها

ماتت
او هاجرت
او تحددت اقامتها
انت متأكد ان الكلام دا حصل أول امبارح ؟

عجايب

momken said...

Ahmed Shokeir
ـ.ـ.ـ.ـ.ـ.ـ.ـ.
يارتنى دخلت خلسه يابو حميد انا دخلت رسمى واتفجاءه اكتر من بطل الفيلم الى ذكرته
طبعا يابو حميد اتفضل البوست الى يعجبك
نورتنى يابو حميد

سكينة
ـ.ـ.ـ.ـ.
ايوة يا سكينه امى بتقرا المدونه
ومتشكر على تشجيعك ومساندتك كلامك دافع قوى ليا للاستمرار خصوصا انى لسه جديد
نورتينى يا سكينه

طهقان
ـ.ـ.ـ.ـ.
طوطو.... انت نورتنى وشرفتنى جدا بمطلعتك مدونتى المتواضعه هههههههه يمكن هربوا وحضروا الحفله يا طوطو

شرفتنى بالزياره

الحلم العربي said...

تدوينة جميلة جدا جدا
لدرجة انى مش عارفة ده حقيقى و لا خيال

تحياتي للطريقة الشيقة
و انصحك ما تروحش الحاجات دي تاني

شكرا

حواء said...

ههههههههههههههههه مش ممكن بجد حكاية جامدة جدا هو انت مين بالضبط شكلك كدة منهم ومتخفى هاهاهاهاهااااااااا .. لا بجد حلوة اوى,,, تحياتى

أميرة حسين said...

صباح الفل :)

شوف بقى يا عم ممكن
بقى انا بقالي يجي سنة مبدخلش المدونة بتاعتي و لا بكتب فيها حرف
وكل ما حد يبعتلي رد تجيلي رسالة على الميل اروح ابص و امشي
اكتئاب متعرف ، زهق متعرف ، غلاسة متعرف برضه

انما قلت كفاياني تدوين ، مليش نفس
والنهاردة الصبح بابص على الميل كالعادة
وقاعدة يابني لا بيا و لا عليا
الاقي الرد بتاع حضرتك على اخر بوست في المدونة
و بصراحة يعني اخجلتم تواضعنا برد سعادتكم الجميل :)

قمت من باب الفضول كده دوست على اسم حضرتك ( ممكن ؟؟ ممكن ايه بالظبط يا خويا ولا مؤاخذة)
:)
مدونتك جميلة جدا يا ممكن
و بصراحة اول مدونة تشدني اني اقرا من فترة طويلة

البدراوى said...

هايل بجد والله
أسلوبك رائع جدااااااااااااا
بس يا هل ترى فعلا الناس دى موجودة فى الواقع بالشكل ده ولا ده خيال من الكاتب
عموما ده يدل أن بلدنا أصبحت مجتمعين متناقضين تماماا وربنا يستر

momken said...

الحلم العربي
ـ.ـ.ـ.ـ.ـ.ـ.

لاء ياستى حقيقه بس اغرب من الخيال والغريب انها بتحصل فى بلد مش لاقى ياكل
انا كنت بسال نفسى متخفين من مين يكونش هاربينين من حد
حاضر هسمع نصيحتك ومش هاروح هناك تانى
بس ... اصل... طب ممكن كمان مره بس؟

نورتينى


bocycat
ـ.ـ.ـ.ـ.ـ.

مهم الا مهم دانا مهم جدا اوى خالص
دانا اهم من اى واحد منهم...ههههه
بالزمه لو مهم با بوسى كنت هاروح بالبدله واعمل فيها عبده المهم
لو كنت مهم كنت روحت بتى شيرت وبنطلون يوزد

شرفتينى بزياردتك


أميرة حسين
ـ.ـ.ـ.ـ.ـ.

خساره كبيره انك بتطلى تكتبى انتى موهوبه كمان كلامك لازم يخرج والناس تشوفه
انا شخصيا استمتعت جدا فى المدونه بتعتك مع ان تواريخها قديمه اوى بس حبيت اطلع على كل البوست الى فيها واعلق على اغلبه
وانا بقولك اهو يا اميره ((((لو مرجعتيش تدونى زى زمااان... هنحط السيخ المحمى فى صرصور ودنك))))

وقد اعذر من انذر

والله شرفتونى بزيارتكم

momken said...

البدراوى
ـ.ـ.ـ.ـ.ـ.

الحجات دى واقيعه يا بدراوى بس انا عملتها بطريقتى واسلوبى
انت عندك حق فعلا احنا عايشين فى بلدين مالهمش اى علاقه ببعض

البلد الاولى بتسمع نشره الاخبار والعراق وفلسطين ودارفور
والبلد التانيه بتسمع النشره الاقتصاديه وهيرمس وحديد عز والمصر يه
للاسمنت والمصريه الاتصالات
ناس بيهمها الناس وناس بيهما فلوس الناس
ربنا يستر

semsem said...

سوال كمان بس شركات ايه اللى بتعزم فى الحفلات الجامده دى على شان انا ناويه استقيل من شغلى قريب

وبعدين حفله واحده وعملت فيك كده
انا كل يوم ستين حفله وبشوف الوشوش الحقيقيه مش المستخبيه
مبيحصليش كده

momken said...

semsem
ـ.ـ.ـ.ـ.

انتى بتنقى ياسمسم ماشى
طيب قدمى استقلتك اخربى على نفسك ياسمسم

وبعدين كل يوم ستين حفله ايه انتى شغاله فين
هو اليوم عندك كام ساعه
ربنا يسعد ايامك ديما يا سمسم
تحياتى

semsem said...

لا مش هقولك شغاله فين
بس ما هى الدنيا كلها حفلات الناس الماشين فى الشاعر وطريقتهم كانهم فى حفله
الناس اللى بيجى مكتبى كل يوم وكانهم اعتاده التمثيل والحفلات ومش عرفين انا المسرح بيفتح باليل بس مش الصبح كمان
ماشى يا عم مشيها 30 حفله
وهستقيل بردو
انا موظفه حكوميه وميهمنيش

momken said...

semsem
ـ.ـ.ـ.ـ.
ماشى ياست سمسم انا بقى مش هاجى مكتبك خالص والا هيبقى فيلم كوميدى
واو عاوزانى اجى مكتبك يبقى لازم تقطعى تذكره

مواظفه حكومه يبقى ممكن تكونى وزيره
يارب تطلعى وزيره ياسمسم ومتخفيه
لو طلعتى وزيره ممكن ننزل البلوج بتاعتى فى القناه التانيه الى محدش بيشوفها
هههههههههه

صاحب البوابــة said...

ويمضي العمر بتلك البلاد

والكل فيها يرتدي الأقنعة

ولا يخلعها إلا في القبر !!!

-------

تحياتي لقلمك المبدع

momken said...

صاحب البوابــة
ـ.ـ.ـ.ـ.ـ.ـ.ـ.ـ.ـ.

اعتقد يا صاحب البوابه لن يخلعوا الاقنعه فى القبر وستكون وقتها مفروضه عليهم ورغما عنهم وكل من ارتدى قناع الظلم فى الدنيا سيقابل به ربه ويوفى حسابه وهم لا يظلمون

تحياتى يا صاحب البوابه
تورتنى

semsem said...

لا وانا يرضينى بردو تيجى لحد عندى وادفعك تذكرها الدعوات كلها تحت امرك
ههههههه
عرفت كده انا شغاله فين

بردو مش هقولك
وبعدين انا فاضلى لسه شويا على وزيرة دى احتمال التغيير الجاى

تحياتى

Anonymous said...

سلام عليك يا ممكن
ده انت طلعت مهم اوي بقي عشان تروح حفلة زي دي ...انا عارفة ان البلد فيها بلد تانية منعرفهاش ...بس مش للدرجة دي
.......
إسقاطاتك علي شخصيات المجتمع جميلة جدا
للاسف ده واقعنا ...يا نتعايش
معاه ..يا نحاول نصلحه
..
يا تري في الاخر مين اللي ..هيصلح مين بطريقته ؟؟؟؟
.....
الكلام علي لسان بعض الشخصيات زي صاحب وجه الظرافة و صاحب الوجه الشرير عجبني جداااا
نظرية و الله و واقع

جميل اوي اسلوبك يا ممكن
حقيقي جميل
مبسوطة لاول زيارة عندك و فرحانه بزيارتك لمدونتي و ان شاء الله تتكرر الزيارات قريب
:)


سلام
مها

momken said...

semsem
.ـ.ـ.ـ.ـ.
اه عرفت شغاله فين ياسمسم
طالما عندك دعوات كتير يبقى شغاله فى جامع
وبتدعى للناس كلها

momken said...

maha
.ـ.ـ.ـ.ـ.ـ

كلامك كله جميل يا مها ومعقول جدا بس يارب احنا الى نغير ومنتغيرش
تبقى ليله طين لو المجتمع كله بقى كده

ياستى انا ولا مهم ولا حاجه
دى حفله اتعزمت فيها يمكن بطريق الخطا

نورتينى

semsem said...

يا ريت اكون شغاله فى جامع

momken said...

semsem
.ـ.ـ.ـ.
ياسمسم انتى زى الملايكه ودعواتك مقبوله فى اى مكان

تحياتى

Anonymous said...

مبروك عليك العزومة دي لا جازت المباركه
المهم بوست جامد موووت
و أجمد ما فيه ان الماما بتاعة انت بتقراً البلوج بتاعك
انا بقي الحجه " حكم قراقوش" بتخليني انا اللي اقرا لها
بجد استمتعت بوجودي عنك شويه
:)))

Unknown said...

انا لآخر لحظه قبل ما أقرا تعليقاتك كنت فاكراها من خيالك

بس كده شكلها باظت ..

أهو ده الشخص اللي استحاله تكون لقيته هناك عمر طاهر

بس عاوزه أقولك علي حاجه ..

انت لبست وش من غير متحس
حطيت ورنيش من غير ما تقصد

عموما حاول تبعد عن الورنيش لان مهما عملت عمره ما بيعيش ..

ياسمين

Anonymous said...
This comment has been removed by a blog administrator.
Unknown said...

أما كانت حتة حفلة!!
إنما أيه عظمة على عظمة
مش يقولولى عيد ميلاد وهابى
بيرث داى وماعرفش ايه؟ادى الحفلات
والأ فلا :)

Frankie said...

semsem ـ.ـ.ـ.ـ.ـ. نورتينى يا سمسم ومتشكر على رائيك الجامد الى عزمنى العضو المنتدب فى الشركه الى انا احد مديريها ولو عرف انى فضحته كده على البلوج قليل ايما علقنى طهقـــــانه ـ.ـ.ـ.ـ. هههههههههه ايوة افتكرت الفيلم بتاع حليم الى كانت فيه ايمان بس عندى كانت نيتهم كويسه افتكرونى احد رجال الامن سيكيورتى ايام عبد الحليم المعازيم كانوا سوزج نورتينى يا بسكوته وتحياتى لطهقان دنيــــــا ـ.ـ.ـ.ـ.ـ.ـ. ياستى الحفله حقيقيه وكل الى فيها حصل لكن للامانه انا حكيته بطريقتى علشان ياخد طعم ولو وسحنه (ممكن)بس اما بالنسبع لانى اكون مؤلف فادى شهاده انا اعتز بيها من وحده انا بعتبرها الاكثر متعه ضمن جميع البلوجر نورتينى يا دنيا

سكاي للتنظيف said...

كشف تسربات المياه
شركة نقل اثاث بالرياض
شركة تخزين اثاث بالرياض
شركة تخزين عفش بالرياض
شركة تنظيف فلل بالرياض

شركة تنظيف منازل بالرياض
شركة تنظيف موكيت بالرياض


شركة تنظيف بيوت بالرياض



افضل شركة تنظيف في الرياض
شركة تنظيف منازل بالرياض

شركة رش مبيدات بالرياض
شركة مكافحة حشرات بالرياض
شركة عزل خزانات بالرياض
‫كشف تسربات المياه



ترميم المنازل

jaki said...

عزيزنا العميل هل تبحث عن شركة نظافة تقدم لك كافة الخدمات التنظيفية بكامل الكفاءة والجوده ؟ هل تبحث عن شركة تقوم بتنظيف شقتك او فلتك او مجلسك ؟
هل تبحث عن شركة تقدم لك خدمات تنظيف الموكيت والسجاد والوجهات الزجاجية وغيرها ؟
اذا فانت علي موعد مع شركة النظافة المثالية والتى تقدم لك خدماتها بجودة متناهية النظير واسعار لن تجد لها مثيل في اي شركة اخري
تهتم شركة النظافة المثالية بكسب ثقة عملائها الكرام والعمل علي تلبية كافة احتياجاتهم بالشكل المرضي والمقنع
اتصل بنا عزيزنا العميل ولا تتردد في الاستعانة بشركتنا
مايميز شركة ا لنظافة المثالية
الخدمة
تهتم الشركة بتقديم خدمة علي اعلي مستوى كما ان خدماتها لا تقتصر فقط علي اعمال النظافة فقط بل تمتد لتشمل خدمات العزل والمكافحة وغيرها
الكفاءة
تتميز الشركة بالكفاءة والجودة في اداء العمل
الخبرة
الشركة لديها خبره واسعة وباع طويل في مجال التنظيف
فريق العمل المتكامل
الشركة لديها فريق عمل مميز ومتكامل من المخصصين والفنيين والعماله المدربة
الاسعار
تقدم الشركة خدماتها بأسعار مناسبه وفي متناول جميع العملاء
المعدات
تستخدم الشركة المعدات والالات الحديثة والمتطورة في التنظيف
رد فعل العميل
تهتم الشركة بمعرفة رد فعل العميل عن الخدمة المقدمة من قبل الشركة
مجتمع العمل
تهتم الشركة بدراسة مجتمع العمل ومعرفة ماينقصه من متطلبات
الشكاوى
تهتم الشركة بتلقي شكاوى العملاء والعمل علي فحصها جيدا
المقترحات
تتلقي الشركة مقترحات العملاء الكرام وتعمل علي تنفيذها بقدر المستطاع
افضل شركات عزل حراري بالخبر
تقدم الشركة خدمة كشف تسربات المياه الداخلية او الخارجية الظاهرة والعمل علي اصلاحها والتخلص من كافة مشلات الروائح الكريهه وارتفاع فاتورة المياه وظهور بقع الرطوبة في الاسقف او الجدران او علي الحوائط
كما نقوم بالعديد من الخدمات التى قد تساعدك لحياة كريمة مثل
افضل شركات عزل مائي بالخبر
افضل شركات عزل فوم بالخبر
افضل شركات عوازل بالخبر
افضل شركات تخزين اثاث بالخبر
افضل شركات مكافحة العته بالخبر
افضل شركات مكافحة البق بالخبر
افضل شركات مكافحة الصراصير بالخبر




afaf elgamal said...


شركة تنظيف خزانات بالرياض مع العزل والتعقيم
شركة عزل خزانات بالرياض
شركة مكافحة حشرات بالرياض
شركة كشف تسربات يالرياض
شركة تنظيف فلل بالرياض
شركة رش مبيد بالرياض
شركة نقل اثاث بالرياض
شركة تنظيف وصيانة مكيفات بالرياض
شركة تنظيف مجالس بالرياض
شركة تنظيف موكيت بالرياض