Thursday, April 16, 2009

عملـــت.... شوبنــــج




صباح الخير

قبل اى حاجه يا جماعه احب اعترف لحضراتكم انى مجنون بالحجات الحديثه (التيتيت تيتيت يا معلم) يعنى بحب.... التيلفونات.... والابتوب... والستلايت...و,البلاى استيشن
وحتى.... الكنتالوب.... والكلمنتينا....و البليت فودز

لكن
....!

والاعتراف بالحق فضيله...! انا بتعلم بصعوبه شديده جداً -امكانيات بقى
-
يعنى على ما اتعلم على حاجه يكون طلع الى احدث منها ...والناس بطلوا يستخدموها اصلاً

المهم طقت فى دماغى اغير موبيلى بواحد تانى شكله يخض...
وفيه كل حاجه وبيدخل على النت من اى حته بالويرليس ببلاش وجى بى اس وثرى جى وسيبيان
وحركات كتير

المهم طبعا انا اخدت الموبيل وقعدت استكشفه...وادوس على الزراير...
وكل ما يفتح ويندوز ادخل وكل ما يطلع رساله اقبلها واقول اوكيه من غير ما اقرا

بعد ما خلصت لعب قولت الباقى اكتشفه وهو فى ايدى مع الايام....
لكنى حسيت كده انه بعافيه....
حكم انا عاطفى اوى تجاه الحجات بتعتى وبحس بيها جداً
لاقيته عمال يطلع نغمات عجيبه وكل شويه يعمل رنه وميسكتش الا لما ادوس على الزرار
انا قلت يمكن بيهرج معايا.. او بيرحب بيا ..او دى طريقته فى التعرف على الناس...
او التلفون اتجنن
وحسيت كده اسمالله على مقام حضرتكوا.....انى مش عارف فيه اى حاجه
وانى بعرف فى الموبيلات زى حضراتكوا ما بتعرفوا فى اللغه البرتغاليه
وحلمت ان الزمن رجع للوراء علشان مجبش الموبيل ده
او حتى اعرف ارجعه للشركه تانى
بس اقولهم ايه؟ انا مش فاهم فيه؟
كلا الباتا وحاشا وماشا
الا كرامتى
لحد ما ربنا رزقنى بواحد ابن حلال صحبى مجنون تكنلوجيا ( جينياس)الواد ربنا يهديه بقى مسك الموبيل بمنتهى
الاستهتار واكنه اريكسون سته تمنيتين
...
وقالى بمنتهى السخريه دى الى معصلج معاك يا مان؟؟
!
قلتله وانا بتصنع الادب... ايوة حضرتك

قالى شوف يا بنى
انت تدوس هنا وبعدها تعمل كدا وبعدها كذا ولما يجيلك ماسيدج تعمل كذا
ولما يوصلك ميل تعمل مش عارف ايه
وقعد يلعب فى ام الموبيل ويقولى ايه ده دى فيه خاصيه كذا وفيه مش عارف ايه الى ممنوعه فمصر وفيه كمان كذا
وقالى ما معناه انت هتعمل بكل الحجات دى ايه -ولسان حاله بيقولى دى خساره فيك
وانا من غيظى قلتله دى فيه اظهار رقم الطالب
-
المهم مفهمتش منه ايها حاجه
مجرد انه جه اتمنظر قدامى انه بيعرف فى حجاتى اكتر منى وذلنى

اصبحت بعد ما كنت جايب موبايل ومش فاهم فيه
لاء ...
الناس كمان عرفت انى مش فاهم
يادى الفضيحه ام جلاجل يا دى الجرسه ام حناجر

بالظبط بالظبط.. زى شيخ غفر كفر البلاص لما يجيب كمبيوتر وعليه ويندوز اكس بى

القصد من الرغى ده كله عاوز اقول لاصحابى الى فى منتهى الكرم ...
.اى حد بعتلى اس.ام.اس.ولسه انا مرضيتش عليه ميقلقش اكيد هارد فى يوم من الايام لما اعرف افتح الماسيدج
والى بعتلى ام. ام. اس. ميقلقش اكيد هشوفه بس كله بامر الله

اما الى بعتولى ميلات او فايلات شارنج فون
مش عاوز حد يفتح بقه ومن سكات كده ..يبعتوها تانى ومن غير تريقه
لانها اكيد اتحذفت
ومحدش يتريق و بلاش سفاقه...عادى بتحصل
وربنا هيكرمنى بحد ادبسه فى الموبيل ده وارجع لعقلى تانى

وعلى رائى المثل من فات نوكيا تاه
وبس

104 comments:

نـــــور said...

:))

والنبى؟
لما انتوا مابتفهموش فى الحاجات دى بتجيبوها ليه؟
فكرتنى لما غيرت موبايلى بموبايل حقير اسلك بيه لحد مااشترى واحد جديد قام اخويا فضل يتريق عليه ويقول ليه مدايقك ده حتى فيه خاصيه الاتصال بالغير وارسال الرسائل القصيرة ههههههه

وبعدين موبايل حقير وصعب وهتعمل ايه بده كله
ماتجيب حاجه سمبل وخلاص لازم تتمنظر يعنى؟
ربنا يهديك ياللى مش منكن

واهو على رأى المثل
من فات سامسونجه تاه :))

-عليك غرامة تأخير ياهندسه لو جيت عندى هضربك-

نـــــور said...

نسيت اقولك
اول تعليق
YEEEEEEEEES
I GOT IT :)

نـــــور said...

نسيت اقولك برضو
كل مااتصور شكلك وانت زى الواد اللى بيعيط علشان مش عايز يستحمى ده بفطس من الضحك هههههههه

صحيح عرت ان عيد ميلادك كان قريب ده حقيقى؟؟
لوكان يبقى كل سنه وانت طيب

يلا نور بالتلاته اهو
ايتها خدمه

سمكه واحده said...

سيبك انت هو نوكيا وبس
ثم مش ده التليفون بتاعي ولا ايه؟
(وش مطلع لسانه)
ياسيدي تعيش وتجيب ولا يهمك
وبعدين جمايل ايه بس !هو في جمايل بين الاخوات انت اخ عزيز وغالي
ولو عليا واقدر انت عارف كنت عملت اكتر من كده
وش مبتسم
نجملك بجد وحقيقي بقي وحاجه تانيه خاالص في فرحك ان شاء الله
بس انوي انت بس وملكش دعوه وانت هتشوف
ربنا يسعدك ويدوم الود
تحياتي

نظره عين said...

انت مش ممكن ياممكن انت حسستنى ان ان احنا فى زمن مفيهوش اختراعات اساسا حسستنى ان احنا فى زمن القرن قبل الميلادى هه يلا بقى دنيا
كلامك جميل ياممكن ورائع وطريقتك فى الكلام تحفه
سلامى ليك

موناليزا said...

ههههههههههههه
ضحكتنى بجد
بس ازاى يهون عليك موبايك القديم بسهولة كدة؟

semsem said...

هههههههههههههه
يا اين الايا ممكن كده انا عرفت رناتى ومكالناتلى بتروح فين اكيد اكيد الموبيل الجديد بيعملها ربلاى ويرجهالى تانى

وانا اللى عانل اقول ممكن اللى مش ممكن

يالا اهو كله موبيل

تصدق انا تلفونى جاله حاله هبل مستعجل اتارى زعلان من الرنات اللى نبيتردش عليها
بقا يشتغل لنا اهزو بس تقولش موبيل رقاصه

يالا حسن الختام

وحشنى موت موت موت


خلى بالم من نفسك سا ممكن يا ابن طمط ام ممكن

قلب ينبض لله said...

هو الموبايل دا نوعه أيه:)

الأول قبل أي حاجة خلينا نقول مبروك علي الموبايل الجديد

وبعدين نيجي بئي لمشكلتك
أنا شايفة أن عندك أصرار وعزيمة أنك هاتفضل ورا الموبايل دا لحد ماتعرف تتعامل معاه كويس وبعد كدا هاتقرر أذا كنت تبعه ولا لآ
أصل ما أعرفش ليه حاسة أنك مش الناس اللي بتنسحب من أول فشل أو جوله

سيبك أنت الف مبروك برده:D علي الموبايل

جنّي said...

السلام عليكم

لكل اداة هدف من استخدامها لكل شخص وبالتالي علي ان ابحث عما اريده منها وبلاها الباقي ..

انا بعمل كدا بستعمل الخواص التي اريدها فقط

موجة said...

متشكرة على سؤالك يامستحيل عليا
وربنا يخرجك من المحنة دى على خير
عشان تبقى تسمع كلامى
اقولك يامستحيل بلاش تحط نفسك فى المستحيل
تقولى لاء مش ممكن
يامستحيل بلاش
تقولى لاء
دانا رجل المهام الصعبة
عموما ادى اخت اللى ميسن\معش كلام موجة
تحياتى ليك

maha zein said...

عاتشي
وماله
جيب واخرب وبوظ
واللى متغاظ يفرقع
الا ما كنتش تدلع نفسك مين هيدلعك

جيب وبظ يا ممكن
جيب واخرب
بقولك
انا كنت مزنوقة في لاب توب كده عوزة ابوظه
اصلي بيني وبينك حسة اني عاوزة اخرب حاجة كده
متسلفنيش اي حاجة من عندك اخربهالك وارجعها تاني

يا عالم يا اشرار

همسات دافئه said...

هههههههه
تعيش وتاخد غيرها
كلنا هذا الرجل يافندم
وهابي برثداي لو كان عيد ميلادك قريب فعلا:)

سلامي
شيماء:)

Anonymous said...

اية الشطارة دى بتفهم بالموبايلات زى مااحنا بنفهم اللغة البرتغالية دة انت كدة فوق ممتاز

فشكووول said...

هههههههههههههه
موضوعك يضحك بس عادى يامان بتحصل مع الكل بس ايه الموبيل العجيب ده اللى مش فاهم فى حاجه ولا هو صناعه كفر البلاص
اخوك صعلوك

فراشة said...

مش عيب يا ممكن انك تكون مش عارف فيه بس حاول يعنى ممكن تلاقى شخص تانى يحاول يساعدك فى التعامل معاه وايه المشكلة لو حتى كتبت خطوات التشغيل بس عشان الاحراج يا ريت تختار شخص امين ميفضلش فى الرايحة والجاية يقولك انك ماكنتش فاهم حاجه فيه
وبعدين فى حل تانى ممكن تعمل سيرش على النت عن نوع موبايلك وتمشى معاه خطوة خطوة
تحياتى

مجداوية said...

السلام عليكم

من فات نوكياهو تاه

:)
:)

أضحك الله سنك

طيب وليه متتعلمش يعني هو صاحبك الأروبه ده زايد عنك إيه ,هو بس مش محبط نفسه زيك كده أصل الايحاء مهم جدا في كل حاجة وقدرات البني آدم ميعرفش مداها إلا حين الاضطرار أنه يستخدمها
بمعنى وحاضربلك مثل
أنا مثلي رجلي بتوجعني وبمشى على مهلي لكن لو فيه خطر حتبص تلاقيني بأجرى زي حصان السبق جالى منين بقى العافية دي دي اسمها قدرات مخزنة بندعي إنها مش موجودة فينا لكن ربنا سبحانه وتعالى خلقنا كلنا زي بعض بس فيه ناس كسلااااااااانه وناس بتحاول تستكشف قدراتها

أنصحك بإنك تجيب البامفلت بتاعه وتقرا جزئية جزئية وتطبق اللي فهمته عملي وخطوة خطوة وللو غلط حاول تاني وتالت لحد ما تجيبها لأن اللي عمل التليفون ده عمله لبني آدم عادي مش إليان من كوكب تاني وإلا كانوا كتبوا عليه مُصنّع فقط للحاصلين على جائزة نوبل

!!!

ومتنساش عقل رجل وقلب إمرأة ميستعصاش عليه حاجة يا مان

ايه الناس المكبرة دي !!
:)
:)

متبعهوش واتعلم

للعلم فرحة لا تعادلها فرحة

ولما حتعرف تشغله حتحس فرحة الطفل بدخوله الملاهي

المهم مبروك الموبايل ال 8 سلندر ده وألف شكر على سؤالك أنا جيت خصوووووصي لشكر حضرتك والحمد لله مفيش حاجة بس مشغوله لأني على سفر للقاهرة لحضور زفاف ابنة أختي
والعقبى لك إن شاء الله

يومين كده وأرد على باقي التعليقات بإذن الله


وربنا يبارك في عمرك يارب
و

بس

البِـئرُ والظمّأْ said...

هههههههههههه
عسل بجد
هههههه


مش انت
لا...الكلام
:)
شويه شويه هتعرف
متقلقش


زيزي

dina said...

ههههههههههههههه
من فات نوكيا تاه فعلا....الحمد لله....نكياوية و افتخر
:d

رؤية said...

الف مبروووك
وما تقلقش
هاتبقى احسن منه فيه

بص اصبر

^_^

تحياتى

زهور الامل said...

هههههههههههههههههههههه
يعني رناتي دي كلها راحت هدر
وانا اللي ظلمتك وقولت مابيردش عليا ليه هو انا وحشة ولا ايه
لا حول العالم
مالها عربية 128 بتمشي وزي الفل
وماله موبايل نوكيا ستة ميه بيقول الوووووووووووووو
لازمتها ايه الفزلكة بقى
على العموم تعيش وتشتري وتبوظ وتتعلم
تحياتي

roma said...

عادى ولا تاخد فى بالك ولا تخلى حاجة تاثر فيك بتحصل فى احسن العائلات كلنا ممكن نجيب حاجات جديدة وبنبقى مش فاهمين فيها حاجة وبعد كدة كل حاجة بتظهر وانت كمان ما تقلقش بكرة كل حاجة تبقى كويسة معاك وربنا ما يحوجكش لحد ابد ومبروك بقى التليفون

الفراشة الصغيرة said...

هههههههههههههههه

يا نوكيا يا بلاش

والدنيا من غيره متتعاش

موجة said...

ازيك يا مستحيل
وازى موبيلك الى مغلبك
بقولك ايه
انا هعرض عليك صفقة
انا هشترى منك الموبيل ده وهخلصك منة
فى مقابل انك هتشكرنى طبعا ع الجميل اللى هعملهولك
ايه رايك
صفقة مربحة
مش كدة
متزعلش يامستحيل
كلنا لها

ست البنات said...

salmu alikom

:D :D :D
7elwa 2wy ezhar raqam eltaleb dy :D
ana badawar 3la mobile gdeed hab2a a7'od ra2y sa7bak b2a 2abl ma ashtery

take care

Anonymous said...

هاهاهاهاهاهاهاهاهاهاهاها
هاهاهاهاهاهاهاهاهاهاهاها
هاهاهاهاهاهاهاهاهاهاهاها
مساء النور و الانوار
و صباح الفل و الازهار
انا قرات الرسالة و الله مش عارف كام مرة
و مش عاوز اقولك انا كنت بضحك ازاى
قلبى عندك
كل نوكيا و انت طيب ....... يا راجل يا طيب
MMS

akeed said...

ههههههههههههه

اولا ازيك يا ممكن ممكن اسال سؤال هو النوكيا اللى كان معاك كان نوعة اية اكيد كان موبايل خشب وبيشتغل بحجر طورش ومفهوش اظهار رقم الطالب .

عزيزى ممكن التكنولوجيا وخاصة فى مجال التليفون المحمول بتتطور تطوات غير طبيعية احنا زمان كنا نعرف معظم انواع الموبيلات لا الان نوكيا وهى الاشهر اصبح فيها موديلات كثيرة جداً ما نعرفش اسمها اية والامكانيات ايضاً مختلفة و لاكن العبرة فى شراء التليفون الجديد هى ان تحدد استخدامك الاول ثم تختار الموديل الذى يناسب الاستخدام .


تحياتى على البوست

ريمان said...

ههههههههههههههههههههههههههههههه



مادام مش بتفهم فيه بتجيبوا لييييييييه


هههههههههههههههههههه


يلا تعيش وتاخد غيرها

خليك مع نوكيا اضمن

انا جيبت موبايل ساجم ويا ريتنى ما جيبته عماله الف محافظات مصر على انى الاقى كفر ليه مش لاقيه

ولا حتى وصله ولا اى شىء

مقطوع من شجره

والله اتخنقت منه

ههههههههههههههههه


تحياتى ليك

وشكرا لسؤالك عنى

Esraa Hamed said...

ههههههههههههه

انا بردو متفقة معاك جدااااااا في مبدأ من فات نوكيا تااااااااااه

prince4ever said...

يا جدع في حد يجيب اريكسون و يفوت النوكيا
النوكيا بالنسبه للمصريين زي العيش البلدي لاغنى عنه
طب انا بعرف شويه في البرتغالي...عيب ولا ايه يا برنس
هات نوكيا و ريح دماغك...او سامسونج...او بلاك بيري...حلو و مفهوم وبيكلم ويقول بابا و ماما..
سلام

قوس قزح said...

عارف انا بقى مشكلتى مع التليفونات الجديدة التاتش دى
كل ما اجى ادوس حاجة ادوس حاجة تانية خالص
ولو معها قلم اجى استخدمه احس انى زى الباشكاتب بتاع زمان و مفروض احط القلم ورا ودينى

ماله النوكياااااا
سماعة خضرا تتصل و سماعة حمرا تقفل
بس خلاص
هنعوز ايه اكتر من كده

معلش تعيش و تاخد غيرها
ابقى دور على النت على المانويل بتاعه و اقرا فيه كلمتين يمكن ينفعوك :)

تحياتى

أحلى حياة said...

ههههههههههه
"دى فيه اظهار رقم الطالب" بالضبط بالضبط بالضبط "استك منه فيه"
ههههههههههههه لا كان رد جااامد
افحمته بجد
:DDD

Anonymous said...

اهو ده بقى المنظرة وده اكبر مظاهر الفرق بنا وبين الغرب وتطورهم فهم ينتجون ونحن نستهلك هم يستخدمون ما يحتاجون اما نحن فنجرب كل شئ
مدام مش لازمك امكانياته يبقى ميلزمكش
والاهم حاول تقرا الرسائل اللى بتجيلك

ايمان مجدى said...

دى اخرة التكنولوجيا
:)))
هى التكنولوجيا كده مبهدلة كل الناس
مممممممم, ممكن تبقى تفكر تقتلها ده طبعا لو عرفت
ربنا يقويك على الموبايل الجديد
تحياتى

زُمُرده said...

بقى ممكن ..ان ممكن ..مش لاقي حل ممكن ..لهذا الموبايل اللي مش ممكن

انت عامل ايه دلوفتي؟؟

اولا جيت امسي عليك واشكرك انك لسه فاكرني
ثانيا هان عليك موبايلك القديم ازاااااي
ده انا لما باظ موبايلي يوم معرفتش انام وفضلت اتخيل انس بسمع رناته
بقى كده تفرط فيه يا مااااااان
عموما مبروووووووووووك الجديد وربناا ييسر فهمه عليك
ثالثا
عايز تتمنظر اتمنظر بس قبلها اتعلم علشان محدش ييجي يتمنظر بكلمتين ومعلومتين عليك ولا ايه رأيك؟؟

في كتالوج ونت وناس اسعى واعرف موبايلك

سؤال هامشي
ليه الناس بتسعى لامكانيات اكتر بكتيييييييير من احتياجاتهم مهما كلفتهم ؟؟

Hadota ... حدوتة said...

لما انتوا مالكوش فى التكنولوبيا بتجيبوها ليه
بص بقي
انا عندى الحل
انت تجيب الموبايل وسبهولى بقى
انا هجيبلك اوله من اخره
عييييييييييب عليك يا ممكن
انت عارفنى لما احشر نفسي فى حاجة
:D


اوعى تخاف مش هيبقى موبايل بالشوربة .. ولاموبايل بالزبادى


انا مستغربة بس خاصية اظهار رقم الطالب دى .. انا خايفة البتاع دا يبقى مصفة وعامل نفسه موبايل

:D


انا حسة ان الموبايل دا واكل يا جدعان .. متوتورناش يا نااااااس
:D


بوست دمه خفيف جدا


تحياتى



ME
حدوتة سابقا

إيمان قنديل said...

تصدق أنا بحب النوكيا لأنه سهل وموش معقد زي الموبيلات التانيه


وفعلا من فات نوكيته تاه


وادي جزاء اللي مايسمعش كلمه ماما تقولها



بصراحه البوست حلو ودمه خفيف وخلاني اضحك من قلبي

أنا برضه ساعات تحصل معايا الحاجات دي وأموت من الغيظ وأنا بأتذلل لولادي يفهموني بيشتغل أزاي

Unknown said...

اللي بتعرفه
أحسن من اللي ما بتعرفوش:)

momken said...

نـــــــــــــور
ــــــــــــــــــــــ

انتى يعنى وخدانى وش وعماله تلطشى فيا شمال ويمين

فى ايه يابشمهندسه انتى؟

اولاً لما كنت زمان مش عاوز استحمى مكونتش بعيط علشان امى مش بتاكل من الكلام ده انا كنت ببساطه بهرب منها واستخبى لحد ما تنشغل وتدخل المكتب

ثانياً
انتى تعلقى فى اى ترتيب لانك دائماً فى المقدمه بالنسبه ليا

اخيراً

انا ياستى الموبيل القديم بتاعى هو احدث تراز فى نوكيا....n97
...دى القديم

اما الجديد فكان اتش بى ودى اول مره اشوفه وعجبنى سمكه وشكله
اما مقريتش الكتالوج ليه لانه كبير جدا جدا

ولغات غريبه اوى ومش معمول بمواصفات خليجيه او عربيه

بس ياستى

منورانى


تحياتى

momken said...

نـــــــــــــور
ــــــــــــــــــــــــ

وانتى طيبه يانور انا عيد ميلادى فى شهر فبراير يعنى من شهرين

وعلى العموم هاتى خمسين جنيه اشترى الى عاوزة


تحياتى

momken said...

سمكه واحده
ـــــــــــــــ

الحقيقه انا حبيت اغير نظام حياتى ومنها انى اتحرر من نوكيا
ومن توشسيبا( الابتوب يعنى

قرت انضم الى فريق اتش بى

هى دى كل الحكايه
ياستى نجملك احنا انشاء الله فى الليله الكبيره

الليله الكبيره دى اوبريت بتاع صلاح جاهين ومكاوى

انتى منورانى

تحياتى

momken said...

نظره عين
ــــــــــ

لو رحتى دبى يا نظره عين هتكتشفى اننا فعلا عايشين من زمان واننا ناس قديمه اوى

الحجات الواو الى عندنا محطوطه فى المتحف هنا وتعتبر تاريخ

متشكر اوى على تشجيعك وكلامك الجميل

تحياتى

momken said...

موناليزا
ــــــــــــــ

اصلا الموبيل الى كان معايا مافيش عشره مابينا

انا كنت لسه جايبه برضو وملحقش يبقى صحبى خالص

علشان كده سيبتوا ببساطه

دى العشره متهونش برضو

انتى منورانى

تحياتى

momken said...

semsem
ــــــــــــــ


بلاش كذب يا سمسم الرنات بيتجى عادى جداً
وانتى متصلتيش بيا خالص

وموبيلك ملوش حق يزعل ابدا بتاتاً

وانا اصلا زعلان منك علشان بتقولى ان انا ليا ناس ناس
وانتى متاكده انك من اعز الناس وبتستهبلى

اخبار شوشو ايه؟

انتى كمان وحشتينى جداً
تحياتى

momken said...

قلب ينبض لله
ـــــــــــــ

نوعه اتش بى

الله يبارك فيكى ياستى

انا اصلا ممكن اصرف نظر عن عمليه بيعه
لان العيب مش فى الموبيل
العيب كان فيا انا
وكنت متغاظ وكنت مشغول جداً لدرجه معنديش وقت اكتشفه

ربنا يجعلنى عند حسن ظنك

الله يبارك فيكى ياستى


تحياتى

momken said...

جنّي
ــــــــــــ

اقتناء التكنلوجيا فى حد ذاتها هدف

ومعرفه الجديد هدف بلا اصراف ولا اسفاف

انا زى ما قلت بحب الجديد والحديث
بحب التطور
والا انتى طالما مرتاحه فى الميل بتاعك عملتى اكونت على الفيس بوك ليه؟
ها
ها؟

الاكتشاف هو طريق البشر للتطور والتجديد

يعنى لو حد لاقى انه مش محتاج التلفزيون ومش محتاجه وبعد عشرين سنه اخترع تيلفزيون وطلع بيه للعالم وقلهم اخترعت حاجه مش هتصدقوها
ويكتشف انهم بيشوفوا التافزون من قبل هو ما يتولد واخترعه قديييييم ومتخلف
دى غلتطه
لانه لم يجارى التطور الموجود سواء موافق عليه او رفضه


انتى منورانى

تحياتى

momken said...

موجة
ـــــــــ

سؤالى عنك واجب عليا كمان سؤالى عنك من حقك عليا

وعدم سماعى الكلام طبع فيا اعمل ايه فنفسى بقى

بس سيبك انتى مش هغلب فيه

انتى نورانى يا موجه

بالنسبه لموضوع جوزك انتى وحبيبه من راجل واحد انا جاهز وتحت امركوا اتجوزكوا واحده وعليها وحده بونص
علشان متتفرقوش طول عمركوا
هههههه


تحياتى

momken said...

maha zein
ـــــــــــــــ


والله انتى الى فهمانى

لو مكونتش اجيب وابوظ واخر مين الى هيبوز ويخرب والشركات دى هتدفع مرتبات الموظفين منين

الازمه الماليه خاربه الدنيا ومعتمدين عليا
يعنى اكسفهم؟؟؟

بالنسبه لموضوع الابتوب؟؟؟؟

يحنن

انتى تقولى كلمتين كويسين وفى الاخر تقلبينى فى الابتوب
دى حبيبى مقدرش اسيبه لحظه

منورانى يا دكتوره مهاميهو

ولا نقول يا شيخه مها
ربنا يهديكى يا مها
تحياتى

momken said...

همسات دافئه
ـــــــــــــــــ

اهلا يا شيمو ايوة عيد ميلاد فات وانتى مجتيش كتبناكى غياب

بس الجاتوة بتاعك فى التلاجه
والشتندوتشات رمنيها علشان باظت

والله ياستى ليكى وحشه

كل سنه وانتى طيبه يا ادفى همسات

تحياتى

momken said...

بنوتة مصرية
ــــــــــــــــــ

دى انتوا كده فهمتواغلط
انا طبعاً بفهم فى الموبيلات
لكن الموبيل الجديد اعتقد اغلبنا ميعرفش فيه كتير
هو
iPAQ 914

دى موديله
اما بالنسبه للبرتغالى فانا شكلى متورط ولا حاجه؟؟؟؟

انتى منورانى

momken said...

فشكووول
ـــــــــــــ

الحمد لله يا استاذ فشكول كنت فاكر انا لوحدى

( بقينا اتنين يانااااس)

لاء ياسيدى هو امريكى ونوعه اتش بى
وموديلهiPAQ 914

انت منورانى

تحياتى

momken said...

فراشة
ــــــــــــــ

والله انتى بنت حلال مصى
هو ده الى حولت اعمله

وصحبى جه واتريق عليا زقعد يلعب بالموبيل
وفى الاخر ولا فادنى بحاجه

ياله انا اعتمد على نفسى هى يعنى فيزيا

انتى منورانى

تحياتى

momken said...

مجداوية
ـــــــــــــ

الاستاذ ماجده المعداوى

اسعدك الله فى الدنيا والاخره وكتبك من السعداء

اهو انا باخد بنصيحتك وبتعلم...وانا مش محبط ولا حاجه انا بس بحب اكون صادق مع نفسى وبلتمس العذر من الناس الى انا حذفت ميلاتهم ومسيدجاتهم


والف سلامه على رجل حضرتك شفاك الله وعفاكى
والقاهره كانت منوره بوجودك فيها ياستى

لو شوفتى البولشورات البامفلت بتاعه التيلفون تتخضى بس برضوة هكتشفه

الا قوليلى صحيح
هو الطفل لما بيدخل الملاهى بيفرح ازززاى؟؟؟؟
ربنا يبارك فى حضرتك

تحياتى

momken said...

Meekness
ــــــــــــــ

منا كمان عسل مش كلامى عسل يبقى انا زى كلامى

بس انتى مكسوفه تقولى لحسن اتهمك بانك بتغزلينى مثلا

ازيك يا زينب عامله ايه

حاضر ياستى هستنى ونشوف هتعرف عليه ولا لاء

منورانى

تحياتى

momken said...

dina
ـــــــــــــ

منا كمان كنت بافتخر لانى مجربتش الا نوكيا شويه وابل مكنتوش شويه

لكن اتش بى روعه يا بنتى

هو الى معايا دلوقتى جريبه احساس تانى
وموديله
iPAQ 914

هيعجبك اوى ويناسيكى نوكيا خالص

تحياتى

momken said...

رؤية
ـــــــــ

اللهم اجعلنا من الصابرين

نصيحه جميله يا رؤيه تسلمى ياقمر


تحياتى

be pleased said...

مبروك الموبايل الجديد يا فندم :)

مبسوطة إنى اتكعبلت فى المدونة دى ..

و إن شاء الله هبقى زبونة دائمة ..

Anonymous said...

معلش بقى هتعمل ايه اهو قدر ومكتوب لازم ترضى بيه ومتزعلش اكيد هتعرف كل حاجه فيه ودى اخر مرة تجيب حاجه عشان شكلها عجبك بعد كده متبصش للمظاهر اصل ساعات بتودى فى داهيه
خيرها فى غيرها يا ممكن

مونيكا

فكرة من الزمن ده said...

بجد ضحكتني والوقت متاخر
لا وكل اللي في البيت صحي وضحك كمان
ربنا يكرمك
وينتعلك الموبايل بالسلامة من كل المسيدجات والميلات اللي متحوشة جواه دي
وحقيقي اجمل حاجة في موبايلك واللي مخليني عايزة اشتري واحد زيه
انه بيظهر رقم الطالب
دي خاصية ما حصلتش يارجل
تحياتي

D:D:D:

momken said...

زهور الامل
ـــــــــــــــ

ازيك يا نونو عامله ايه ياسكر
والله وحشانى جدا

ياستى العريبه 128 طلع الى احسن منها129
ونوكيا واحد وستين ضبل زيرو كلع الى اقوة منه واحد وستين زيرو واحد

وعلى العموم انا اكتشفت ان كلهم بيقولوا الو

انتى منورانى يا نونو

تحياتى

momken said...

roma
ــــــــــــ


الله يبارك فيكى ياستى

متشكرين على الدعم المعنوى

وعقبال الدعم الفنى بقى

منورانى

تحياتى

momken said...

الفراشة الصغيرة
ـــــــــــــــــــــ


عندك حق يا فراشه بس اتش بى طلع تحفه فعلا
بس مش عاوز اعملهم اعلانات الا لما يطلعوا فلوسهم

منوانى
تحياتى

momken said...

موجة

ــــــــــــــ

طيب هو الاتفاق ده نهائى ولا ممكن ندخل فى مساومه ونفاصل وحجات كده

طبعا انا بشكرك من دلوقتى

والتلفون وصاحب التلفون يكون ليهم الشرف انهم يكونوا محل اهتمام حضرتك

(كل قوتى يا عبداللعال)

منورانى يا بشمهندسه

فكرتى فى عرضتوا عليكوا؟

وش بيغمز

تحياتى

momken said...

ست البنات
ــــــــــــــــــ

عليكم السلام ورحمه الله وبركاته

اظهار رقم الطالب بتكون فى الموبيلات الجامده بس

وبتكون موبيلات غاليه جداً كتقلش عن تمانيه وتلاتين جنيه ورقه واحده

وخالى بالك اظار رقم الطالب بنفسه لحد يكون بيجيب اى رقم وخلاص

منورانى ياست البنات

تحياتى

momken said...

Anonymous
ـــــــــــــــــ

باشا
ازيك يا مان

انا لاحظت انك مش عاوز تقول اسمك قلت احترم خصوصياتك يا متر

عامل ايه عندك
اخبار بانكوك ايه ياباشا احكيلى احكيلى

موضوع انى انا ووئل نجيلك تايلاند اعتقد صعبه بالنسبه ليا فى الوقت الحالى بس معششه فى دماغ وائل جدا وبياخد خطوات علشان يجيلك

طمنا عليك يا باشا

منورانى

تحياتى

momken said...

akeed
ــــــــــ

اهلا يا اكيد... ياسيدى عمره مقبوله انشاء الله ويارب ترجع بالف سلامه

بالنسبه للتلفون الى كان معايا هو
n97 و n73
بيشتغل بالطاقه الشمسيه

اعتقد انى بحتاج اعلى تقنيه فى مجال الاتصالات
ماهو مش معقول هدفع المبلغ الكبير ده وانا مش محتجها

وبينى وبينك هو كبير فعلا

منورانى
ومبروك العمره

تحياتى

momken said...

ريمان
ـــــــــــ

اهو انا اول لما ارجع مصر هدور على كافر برضو ليه يا ريمان

بس فى كفرات بتمشى على كل حاجه القماش البسيطه دى

سؤالى عن حضرتك واجب وشرف كبير لشخصى البسيط

تحياتى

momken said...

Esraa Hamed
ــــــــــــــــــ

اهلا يا دكتوره

نوكيا هو انا خلفت الا نوكيا
دى روحى روحى روحى

شرف كبير ليا ان نتفق منورانى يا اسراء

تحياتى

momken said...

prince4ever
ـــــــــــــــــ

لاء طبعا مينفعش حد يجيب اريكسون
دى اشاعه يا برنس

انا بقى معرفش فى البرتغالى الا كلمتين

مانويل جوزيه....وكريستيانو رونالدو

بالنسبه للموبيلات الى بتقول بابا وماما

ماشاء الله ربنا يخلى فى موبيلات كمان حلوة بتجرى كده

هههههههههههه

منورانى يا برنس

تحياتى

momken said...

قوس قزح
ــــــــــــ

حاضر يا ستى

وانا الى كنت عامل حسابى ان انتى الى هتفهمينى عليه

بس ياله خيرها فغيرها

بقولك ايه تشترى الموبيل بتاعى؟


ههههههههههه

تحياتى

momken said...

أحلى حياة
ـــــــــــــــــ

ايوة طبعاً

اظهار رقم الطالب اشده ويلسعنى
هو مين؟ الطالب طبعاً

ههههههههههه

انتى منورانى


تحياتى

momken said...

hend...hanady
ــــــــــــــــــ


عارفه يا هنادى

عندى صديق فنلدى كان شايل موبيل نوكيا قديم شويه
فانا استغربت انت من فلنده بلد نوكيا ومش شايل موبيل جامد ليه؟
قالى انه محتاج ده بس

لو محتاج اكتر كنت جيبت اعلى

وقالى ان اغلب فيلنده مش بتشترى اى موبيل الا لما يثبت كفائته عالميا

منورانى

تحياتى

momken said...

ايمان مجدى
ـــــــــــــ

اه يا ايمان

خصوصا انى بحب الحجات الجديده زى ما اعترفت فى اول البوست

امين وان شاء الله يانا يا هو

ومش هسيبوا الا لما اجيب اخره

تحياتى

Anonymous said...

من انا؟؟؟

انا واثقه ان دماغك هتجيبو

ومن خرج من داره اتقل تفكيرة فى جديده

متزعلش اوى مسيرك هتفهم فى تليفونك

الجديد كل حاجه(التليفون وبس) هو مش

برده جميل زى اللى فات اصل النوكيا

لا يعلا عليه ولو جبت ميت تليفون

عمرة ما هيكون احلى واجمل من النوكيا
اشطه يا مان

تقديرى واحترامى

Jana said...

بقى فيه اظهار رقم الطالب!!؟
يا راجل!؟
ههههههههههههه

عندك حق النوكيا نوكيا برده
انا موبايلى نوكيا قديم ..مريحنى جدا ..مش محتاجة اى خواص جديدة ..حتى الكاميرا باصور بالكاميرا الديجيتال..والرنة اغنية نزلتها زمان ..ولو جبت واحد جديد برده حانزل نفس الرنة
.لا لا متفكرش برده مش حابدل
:)

ملحوظة ..
استاذ سعيد الفاضل وزميلنا الكريم صاحب مدونة "جنى" هو صاحب التعليق الاول مش انا
انا جنى من غير شدة ..وهو جنّى بالشدة
:)))))

انت عرفت منين انى عملت اكاونت عالفيس بوك
ها؟
ولما عرفت مضفتنيش ليه؟
ها؟
ها!!!؟

mahasen saber said...

طب انا جيت اهه

اه انا جيت متأخره شويه بس اسمه جيت

ونورت طبعا

اروح ااقرا وارجعلك البوست مبدئيا ضحكنى على غير العاده يعنى بوستاتك اغلبها غوامق ومخطط

ما علينا ااقرا وارجع

mahasen saber said...

اضهار رقم الطالب هههههههههه

لا ده بجد موبايل فلته

تعيش وتشترى غيره بعدين متحسسش نفسك باعجز كده هيجيلك يوم وتفهم

mahasen saber said...

عارف بئه صورت الولد فكرتنى بابنى بالضبط وهو داخل يستحمى

بيحسسنى انى مدخلاه جوانتنامو مش الحمام وبانيو ورغاوى ودلع


وممكن فكرتنى لان الولد فيه شبه من ابنى

MǿиY El-Shreef said...

ههههههههههه

معلش معلش

بكره تلاقي واحد مالوش فيها وعايز يتمنظر يقوم شاريه منك :D

وبعدين ياممكن لو ليك حاجه عند الكلب قوله ياسيدي

يعني كنت جيت ع نفسك شويه وقلت للواد يفهمك

ههههههه

معلهش :D

اول زياره ومش الاخيره

وربنا يبارك ف ستيته بتقرب البعيد :D:D:D

(Joudy) said...

لا ما تقلقش بس انت حاول وبسرعة قبل ما يروح عليك الموبايل وتلاقى العيال الصغيرة بكره شيلينه وبعدين تعالى هنا هو داء عندك اسمه اشترى الجديد يعنى لو قالولك ان فى سم جديد وله مفعول أكيد هتروح تشتريه لا والمصيبة لا تفكر تجربه يا خوفى منك يا بدران ههههههههههههههه

حلوة ودمك خفيف بس عقلك عقل أطفال هههههههههههههههههه

تقبل مرورى

دمت بكل خير وسعادة

momken said...

زُمُرده
ـــــــــــــ

اهلا يا ست زمرده منورانى بعد طول غياب

لاء ياستى فى ميلون حل بس انا حبيت اشريكوا فى مشكلتى

الله يبارك فيكى يا ستى

بالنسبه للتتالوج....ايون التتالوج مفهمتش منه اى حاجه

الناس بتسعى للجديد علشان متتخلفش عن ركب الحضاره ياست زمرده

والا كان زمنا بنسافر نعمل العمره على الجمل لو مكنش واحد زى حالاتى اشترى عريبه ظياط

منورانى

تحياتى

momken said...

ME
ــــــ

بنشتريها علشان بتوع التكنولوبيا ياكلوا عيش
اصل الى ليهم فى التكنولوبيا معهمش فلوس وبيحسبوها

بالنسبه لموضوع مناخير مش متاكد بس الى اعرفه ان تيلفونى مش كبير للدرجه دى

يا ست مى
انا اتاكدت قبل ما اشتريه انه مش ادوات منزليه خاااالص
والرجل جاب رغيف عيش وحلف عليه انه موبيل وهيشتغل فى الاخر

منورانى يا استاذه مى

الى هى حدوته اسكوب سابقاً
تحياتى

momken said...

GHARAM
ـــــــــــــ

والله تعليق رفع روحى المعدنيه

مطلعتش لوحدى اهو
عاوز اعمل بوست وازعق بعلو صوتى واقول للناس الى بتتريق عليا

( بقينا اتنين يا غجر)

منوارنى يا غرام

بوستك الاخير روعه

تحياتى

momken said...

مياسي
ـــــــــــــــ

عندك حق بس انا عندى حب استطلاع وبحب اكتشف الى معرفوش

ممكن يكون ميزة
وممكن يكون عييييييب كبير

منورانى فى اول زياره


تحياتى

momken said...

be pleased
ـــــــــــــــــــ
منورانى وانا فى منتهى السعاده بزيارتك الكريمه

وانا من موقعى هذا بشكر المدونه الى كعبلتك وهصرفلها مكافاءه بوستين تلاته

زيارتك دايما بتسعدنى

تحياتى

momken said...

Anonymous
موتيكا
______________

حاضر يا مونيكا خدى الكوبيل ده وهاتى تلت تلاف درهم وانا اخد بنصحتك ولا عاوزة اخد بنصيحتك ببلاش كده؟؟؟؟

خيرها فيها مش فى غيرها ان شاء الله

منورانى

momken said...

فكرة من الزمن ده
ـــــــــــــــــ

يعنى اختصرى وقولى فرجتى علينا الناس

ماشى ياستى ربنا يسعدكم كمان وكمان

وميكونش حد دعى عليا علشان صحيتهم

طبعا موبيل فيه اظهار رقم الطالب هو انا هشترى كده اى كلام
دى تحفه معماريه

منورانى يا احلى فكره

تحياتى

momken said...

Anonymous
ـــــــــــــــــ

الحقيقه انا لسه مش عارف انت مين؟
اصل الكلام مش واضح خالص

ايون تيلفونى القديم كان نوكيا

الجديد مش نوكيا دى اتش بى

اشطه....الكلمه دى بتعتى

تحياتى

momken said...

Jana
ــــــــــــ

ازيك يام جنى
منورانى

طبعا النوكيا مكتسح فى مصر
لكن الشعور بالملل من اى حاجه بيخلى الواحد عنده شغف للتغير
لانه بيتوقه انه لما يغير هيكون شعوره افضل واحسن

انا زيك بالظبط التون مش بغيره وكل لما اغير موبيل بيكون التون هوهو تقريبا

النغمات الى بحبها مش بحب اغيرها

معلش انا خلط بينك وبين سعيد المره دى بس انا هاروح اعتذر له
انتو ا لاتنين ولاد حلال

ازاى مضفتكيش ضفتك طبعا

الفيس بوك بتاعى momken momken

تحياتى

momken said...

mahasen saber
ــــــــــــــــــ

محاسن الجميله

انتى تيجى فى اى وقت ولازم يكون عندك يقين انى دايما منتظرك

وفعلا انتظارك جميل مش زى اى حد
والى اجمل من انتظارك فقط هو قدومك الرائع


ايون يا محاسن تيلفونى فيه اظهار رقم الطالب
لو مش مصدقه تعالى اشتريه بفلوس كتير

ماشى ياستى متنتظرك لما تخلصى قرايه

تحياتى

momken said...

mahasen saber
ــــــــــــــــــ

بالنسبه للصوره

شرف كبير لينا انها تشبه ابن حضرتك
وطبعا لازم الولد يطلع ماشاء الله امور لمامته الى منوره كل الشاشات

انا بقى لما كنت باجى استحمى كنت بهرب من اصله مبضيعش وقت فى العياط كمان العياط مبيجبش مع امى ربنا يخليهالى

انتى منورانى

تحياتى

momken said...

MǿиY El-Shreef
ــــــــــــــــــــ


هو واضح ان ربنا سمع منك ولقيت الواحد الى مالوش فيه


ايه رائيك تشترى تيلفونى الجديد


ههههههههههه
منورانى

تحياتى

momken said...

(Joudy)
ـــــــــــــ

عقل اطفال؟؟؟؟

ومنك انتى تحديداً يا جودى؟؟؟

ماشى
هى يعنى شتيمه اطفال اطفال
حتى الاطفال احباب الله

بس انا مش عارف يروح عليا الموبيل ازاى؟
هو انا كسبته فى مسابقه مثلا وهيسحبوة تانى؟؟؟
ايون يا ستى داء عندى
انا بحب الجديد
بس موضوع السم ده افكر فيه

انتى رائيك ايه اشتريه بالنص
انتى تدوقيه وانا ادفع الفلوس
من باب المشاركه


منورانى
تحياتى

Joudy said...

أقولك ايه شكلك دعيت عليا مش عارفة أدخل بلوجر ساعتها لو دعواتك مستجابة ليا طلب ادعى لى انى أنجح السنة دى بتقدير حلو وأقدر أكمل دراسات عليا.....

هو حد يطول يكون طفل ياريت أرجع طفلة تانى الله عليها أيام

Joudy

فشكووول said...

العلم نور هههههههههههههه بس على فكره لمعلوماتك العربيه مابتمشيش فى الميه ههههههههه .
تحياتى
صعلوك

momken said...

Joudy
ـــــــــــــــ


بدعيلك والله يا جودى
يارب نتجحى علشان نرتاح من التوتر الى بتعمليه لكل المدونين

اما بالنسبه للرجوعك تكونى طفله
لاء ياستى انتى كده زى الفل خليكى كده احسن

منورانى ياجودى

تحياتى

momken said...

فشكووول
ـــــــــــــــ

العلم نورون فعلاً

العريبه بتمشى فى الميه ياعم فشكول ولا انت مامشت فى شوارع القاهره

انت تقصد مش بتمشى فى المحيط

ماشى ياعم
بس انا اعرف منين ان مثلث برمودا ميجليش هو صلاح سالم مثلا ولا المحور
محدش ضامن حاجه فى البلد دى


منورنى يا فشكول

تحياتى

dodda said...

هههههههههه
بجد البوسن لذيذ جدا
ومسيرك توصل ولا تزعل نفسك

مبروك ع الموبايل الجديد

رحلتنا في الحياة said...

هههههههه معلش تعيش وتاخد غيرها انا بحب الحاجات الحديثة اى نعم وعندى نوعا ما هوس بس الحمد لله يعنى بفهم فيها بسرعة وبقدر اتعامل معاها بسهولة
هى مسالة وقت وهتتعود على كل حاجة
مرسيى للمرورك على المدونة

momken said...

dodda
ــــــــــــ

الله يبارك فيكى يا دودو

انتى بس ادعيلى

تحياتى

momken said...

ايوشة

ــــــــــــــ

ايوشه اهلا بيكى فى اول زياره

انا كمان بفهم بس انتى متعوده على نوكيا مثلا
فكرى تمسكى اتش بى وهتلاقى روحك حتى مش عارفه تحفظى الموديل بتاعه

منورانى

تحياتى

مهرة سالم said...

السلام عليكم....
ها طمني رجعت لنوكيا ولا لسه
.......
صحيح من فات النوكيا تاه...
......
دمت بخير

momken said...

نهــــــــــار
ــــــــــــــــــ

الحقيقه مرجعتش
انا اتعودت على التلفون الجديد

انا بحب نوكيا جداً
لكنى شغوف بالتغير


تحياتى

ســـــــهــــــــــر said...

يا فرحه ما تمت خدها ( الجينيس ) و طارت

هو مش الموبايل بيقول الو
خلاص يبقى كفايه

مبروك

momken said...

ســـــــهــــــــــر
ـــــــــــــــــــــــــ

طب يرضيكى انتى انى ادفع مبلغ كبير كده وفى الاخر اقول الو

طب مكنت جيبت 5110 وارتحت

بس والله كلامك فى محله اهو انشالله افمه القرن القادم

هيروح منى فين؟


تحياتى