Sunday, March 14, 2010

فهمى نظمى رسمى




صباح الخير
ولا اقلكم نهاركوا جاز
طبعا لا يخفى على القاصى والدانى النجوميه اللوزعيه التى حتط على السيد وزير الزفت فى هذه الوزاره النظيفه..ولا بلاش النظيفه
لايفتكرونى اقصد حد بعينه خلينا نقول الوزاره الطويله اوى واطول من الليله السودا كمان
وكلمه وزير الزفت دى مش طوله لسان..ولا شتيمه...ولا قله ادب بتاتاً
حاشا وماشا
انا متربى واهلى صرفين عليا صفائح دمويه قلبهم والبلازما كمان

لكن لايخفى على علم حضارتكم ان الزفت احد مستشقات البترول
الراجل ياخوانا نجم فوق العاده...حتى ان نجوميه سيادته
تعدت نجوم السينما..والكليبات..والكوره كمان

تصوروا وصلت نجوميته لدرجه ان الحكومه محتاره فى شغلانه لاخوة
وليه لاء
وازى ميكونش نجم وسيادته بيطلع علينا كل يوم بتصريح ويقول
اكتشفنا بير زفت جديد او زودنا انتاج الزفت
و يعلن ان شركه فرانسيه باست ادينا علشان نسمح لها تنقب عن الزفت فى صحرينا

لحد الواحد ماقرب يعتقد انه عايش فى الخليج
وكنت هاتهاور وهانزل ادور على خادمات امريكيات يخدوموا امى فى البيت
بدل ماهى متمرطه فى البحث عن خادمات من الارياف وابقى انا الكفيل بتعهم
طبعا مش بترول يا اخوانا-ادونا فرصتنا بقى- اله

الراجل بقدره قادر اصبح واثق من نفسه ثقه منقطعه النظير

وكل منكلمه فحاجه يرد بعنطظه وفشخره وانعره
نقوله سيادتك بتصدر غاز لاسرائيل ليه
يرد يقول براحتى
نقوله الغاز واقف على المستوطن الاسرائيلى ارخص من المستوطن بتعنا الى فشبرا البلد
يقول ولسه..! اتوا لسه شفتوا حاجه
نقوله طب سيادتك لم نفسك ووقف مد الغاز
يقول اذا كان عجبكم
وهكذا لحد ما قلبنا وجعنا مع جنابه

والحقيقه الراجل من حقه يتفشخر ويتبعجر ويتمنظر ويتمرع مرعه بنت البنوت يوم الصباحيه
مالراجل مغرقنا فخير وزاره الزفت بتعته وخيره
والحقيقه وزارته هاديه ورايقه اخر روقات...دحتى من شده شده الرخاء تلت اربع شركات بطلت انتاج الزفت واتجهت لممارسه لعبه كوره القدم وليه لاء طالما فلوس ملهاش صاحب - العب يا حبيبى العب حـــلاوتتتتتك

وطبعا الدنيا حلوة والعيشه طريه والحياه كوول اخر حاجه
اذ فجأتا يطفو على السطح ما يعكر صفو وزير الزفت الهمام
وهذا المنغص يظهر فى صوره انبوبه البوتاجاز
ونمى لسمع سياده وزير الزفت ان لسه فى شرذمه من المواطنين بيولعوا فى بيوتهم بانبوبه البوتاجاز
وكمان فى قله مندسه هى المسئوله عن افطار الشرذمه اولانيه وبيفطروهم فول وطعميه
واتضح انهم بيعتمدوا اعتماد كلى وجزىء على انبوبه البوتاجاز فى سلق الفول
وقلى الطعميه...يعنى الشعب مهدد ميفطرش يا سيادتك
طب الفطار مقدور عليه لكن الحموم ايون الحموم بلا نستحمى كمان؟
طيب بلاش نلبى نداء الطبيعه ولا دى تعتبر سفاله وقله ادب
وسيادته هيعرف منين ان الانبوبه مهمه لاتمام عمليه نضح الطعام ماهو جنابه بياكل -استغفر الله العظيم ديلفرى-ايوة
اغلب اكلهم ديلفرى -والعياذ بالله-ربنا يكفينا الشر
الراجل مكنش يعرف واتفاجأ بالتخلف..واندهش لما لاقى الناس بتشتكى ان الانبوبه وصل سعرها اربعين جنيه
وقال فى عقل باله ايه يعنى اربعين جنيه دانا بديهم تيبس للولد الى سايق الفيزبا بتاع - اللهم احفظنا - الديلفرى
وطبعاً نتيجه للازمه.....وحقناً للدماء امام مستودع الانابيب ...الناس بدأت تتصرف
وبدئوا يكلوا الطعام من غير طهى (لاء يا خفه مش بياكلوا سوشى)لانهم ببساطه ميعرفوش يعنى ايه سوشى
بيكلوا جبنه وزيون ..او سلطه خضرا...او فسيح وملوحه
حتى الفول والطعميه اتحرموا منه
الناس الغلسين اتصرفوا لحد الازمه متنتهى واهو كل الحكايه كام واحد مات وخلاص بسبب الانابيب
اهو علشان تعرفوا ياغجر الازمه الى حصلت فى حاجه مش بتروح اسرائيل ولا نيله

الراجل كتر خيره وزهزه عصره وينصره على مين يعديه - هاى هىء - حل المشكله
وزود الانانيب فى المستودعات وبعد الطابور ما كان معدل التاخير فيه حوالى الف راجل فى طابور الرجاله
والف ست فى طابور الستات
حصل انجاز كبير وخطى خطوة عظيمه للامام وحدث طفره نوعيه كبرى
ازاى؟؟
ربنا وفقه ونصره نصره قويه الطابور دلوقتى اصبح خمسين لكلا الطرفين
اخذاً بمبداً الاستخدام العادل
وده بفضل خطته الرائده وحلوله غير النمطيه للازمات
ومرت عده سعات بعد مرور الازمة
وكمان دقايق كتير اوى دى غير الثوانى الى مقدرتش احصرها
اذ فاجاتاً يظهر خابور تانى غير الخازوق الاولانى ينغص على الراجل صفو الحياه
ال ايه محطات البنزين مفيهاش جاز
جاااااااااااز..ايون جاز سولار يعنى
بقى تصحوا الراجل من النوم وتزعجوه علشان جاااز يا ولود ال تييييت؟؟
ايون يا ساده البلد مافيهاش جاز
اما اننا شعب مشاغب ورخم صحيح...هو لسه فى حد بيستخدم الجاز
الى حصل ان البلد وقفت بسبب الجاز واكتشفنا فجاتاً
ان الاتوبيسات والميكروباسات وعربيات النقل الجماعى بتشتغل بالجاز
طبعا الناس كلها مش عارفه تروح الشغل بسبب الجاز
كمان عربيات النقل الثقيل والخفيف والنص نقل بتعمل بالجاز
بالتالى مصانع سته اكتوبر والعاشر من رمضان مش عارفه تسوق بضعتها
خسائر فادحه
كمان حضرتكم المخابز الى بتعمل عيش بلدى بتشتغل بالجاز
يعنى فوق مافيش فول وطعميه وهنا مافيش عيش
ايه الوكسه دى
كمان ودى مصيبه لوحدها مولدات الطاقه الاحتياطيه بالمستشفيات بتعمل بالجاز
تخيلوا بقى الكوارث
يعنى مافيش شغل ولا مواصلات ولا عيش واحتمال مافيش نور كمان
يبقى مافيش مشكله ياجماعه الموضوع بسيط

طيب انا مش هش هسال ليه المشاكل دى كلها ظهرت فى وزاره الزفت بعد حكم المحكمه بوقف تصدير الغاز لاسرائيل
ومش هاكون شرير واقول انه بيضغط على القضاء او بيعاقب الراى العالم الى حرك القضيه

وبعدين فيها ايه يعنى شويه ناس مش عارفه تمون عربيتها
والراجل مالو..حد قلهم يشغلوا عربيتهم بالجاز
ومالوا عصير القصب
انا شخصيا هاجرب احط فى عربيتى عصير قصب
واركن قدام فرغلى...واقوله...فاوول ياعم فرغلى...وياريت يكون من غير تلج
وبما ان العصير جاى من القصب..والقصب طالع من الارض..والاض عباره عن طين
فانا من موقعى هذا اقترح انشاء وزاره ونسميها وزاره الطين علشان تتميز عن وزاره الزراعه
ونعين وزير يكون اسمه وزير الطين
ونحط صلحيات بقى لسياده وزير الطين ونخفف العبىء عن وزير الزفت
اما لو وزير الزفت زعل
ممكن ندمج الوزارتين ونخلى سيادته يمسكهم
ونسميها وزاره زفت الطين
ويبقى سيادته
وزير زفت الطين
والدنيا تحلو ونعوم على وش الفته وتبقى مليطه

كان معكم ممكن بافكاره اللولبيه لحل المشكلات الوزاريه




102 comments:

زهور الامل said...

وعلى رأي مستر عمرو اديب:
ايه ياعم وزير التموين مفيش عيش ليه والناس بتموت في طوابير العيش يقولك ماهي الناس اتفزلكت واتكبرت وبطلت تخبز في البيوت
نروح لعمو وزير الزفت في ايه يا عمو وزير الزفت انبوبة الغاز شحت من السوق ليه وسعرها بقى نار
قالك نعمل ايه للشعب اللي بيخبز في البيوت وبيستهلك انبوبة الغاز في خبيز العيش وكمان الشعب بيستهلكها في الطبيخ
واذ فجاة الواد مودي اخويا يروح يجيبلنا انبوبة غاز نبص نلاقيه راجع هدومه متقطعة وراسة متعورة من اثر الخناقة اللي كانت في طابور انابيب الزفت دي
واللي متعرفهوش يا ممكن كمان ان انبوبة الغاز بتيجي ناقصة نصها ماهي بقت خراب يا دنيا خراب
لان الموزعين بقوا بيفتحوها ويملوا منها بوابير الغاز الصغيرة ويرجعوا يبرشموها تاني
وكمان بقت في ظاهرة غريبة اوي
كل لما امي تيجي تركب انبوبة الغاز للبوتاجاز او الفرن نبص نلاقيها مفيصة سوري على اللفظ بس انا بسمعه كدة
مفيصة بقى يعني بطلع الغاز منها لان مفتحها غير محكم يعني ممكن تفرقع في اي لحظة وتدمرنا وتدمر البيت والشارع كمان
نيجي نرجعها للبيه الموزع يقولك لالالالالالالالا ماليش دعوة انا مستلمها من الشركة كدة اخدها يعني اشربها ولا ايه
يعني مفيش غاز ولو فيه بيكون غالي جدااااا وكمان مفيش ضمير في برشمة الانبوبة كمان يعني بيدوروا ازاي يموتوا الشعب الغلبان باي طريقة ممكنة

ده بالنسبة لانبوبة الغاز
نيجي بقى للمواصلات
نفسي في يوم قبل ما اموت مايحصلش خناقة في المواصلات بسبب الاجرة اللي غلوها جدااااااااااا تبعا لغلو سعر الجاز السولار اللي بتمشي بيه العربية
كل يوم خناقة بين السواقين الغلابة وبين الركاب الاغلب منهم
وكل ده بسبب وزير الزفت بتاعنا اللي مش عارف يخطط صح ومعتقدش اصلا انه يعرف يعني ايه فرن عيش ولا ميكروباص ولا توكتوك

ياااااااااااااه انا رغيت كتير اوي وطولت عليك مع ان لسة جوايا كلام كتير اوي من اثر المعاناه اللي بنعانيها

معلش بقى استحملني

موضوعك المرة دي بجد جااااامد وانت اتكلمت فيه بمنتهى الموضوعية والوضوح

تسلم ايدك وعودا حميدا لمدونتك الرائعة يا ممكن وعقبال رجوعك لمصر بالسلامة باذن الله

تقبل تحياتي

الزهرة البرية (Joudy) said...

أهلا ممكن إيه ده غياب ورجوع بافتكاسات لايمكن حد يفكر فيها غيرك تصدق أهو إحنا بقى من مستخدمين البتوجاز بعيد عنك كان شهر بصراحة فظيييييييييييييع وأخر بهدلة والحمد لله عدى بخسائر فادحة أما بقى الجاز فأعتقد إن قطع النور اللى كل يوم ده أكيييييييد بسببه أما بقى العيش فالنهاردة لقيت بابا بيقول حاجة غريبة إن فى أزمة فى العيش الفينو بمشتقاته تقريبا بردو كده الجاز هو السبب ربنا يستر

تحياتى
Joudy

ملحوظة أنا غيرت مدونتى وحسابى لو ناوى تزورنى ابقى اعمل كليك على الاسم هتلاقينى فى مدونتى الجديدة " على جناح يمامة"

gogo!sf said...

اولا الف حمد الله على السلامه يا سى الاستاذ ممكن افندى
ويارب مش تغيب تانى اوى كده


رغم انى فى بعض الملاحيظ على كام كلمه
كده الا انى واثقه انك اكيد متعصب جدا من كل ده

انت اتكلمت عن كل حاجه احنا بنعانى منها يوميا فعلا

بس المشكله مش فى وزير الزفت ده المشكله الاكبر فى الشعب اللى المفروض انه دايق البهدله... الناس دى لو تعمل انقطاع عن الشى اللى ذاد تمنه ذياده عن اللزوم ممكن يكون فى رد فعل ايجابى

انما احنا بنشتكى وبس ومش بنعمل حاجه
وانت قولت ان فى بعض من الناس استغنت عن الغاز وعن البوتوجاز اصلا هو طبعا لفترة مؤقته بس لو الكل عمل كده ممكن يكون فى امل

الناس للاسف بتشتكى وبتشترى فى نفس الوقت

يعنى هو ليه حق يعمل اكتر من كده طالما احنا اللى مدينلو الفرصه وغير كده طول ما احنا ساكتين يبقى لسه هنشوف اكتر

على العموم ابقى مونلى معاك من عند فرغلى عشان انا بحب الكوكتيل بتاعه جدا بس تفتكر العصير افيد للعربيات ولا الكوكتيل اصل انا بخاف على عربيتى اوى

وبعدين انت مالك ومال الدليفرى من فضلك يا ممكن عشان ده صحبى جدا


احترامى وتقديرى ليك ولموضوعاتك

جوجو

just waiting said...

ياممكن المشكله مش في وزير الزفت لوحده المشكله فيهم كلهم بقت حاجه تقرف مش عارفه احنا لسه عايشين ازاي في البلد دي
انا عندي فكرة حلوة علشان نبقى اغنيا احنا نلمهم كلهم ونربطهم في ميدان عام وسوري يعني نقول ان التفه بربع جنيه وشوف هنلم كام وهديك نسبه
ابسط ياعم :)
تحياتي ليك

Anonymous said...

ههههههههههههه

ويا ريت نطلق على الحكومه حكومه الزفت والطين والهباب نظرا لتألقها في مثل هذه المشاكل

تحياتي

قلب ينبض لله said...

فعلا كان في مشكلة قريب جدا في نقص الجاز
وكانت محطات البنزين في كل مكان مليانة عربيات وميكروباصات واتوبيسات وخنائات ايه كتيير جدا
وقريت تصريح لوزير الزفت:) ان مفيش نقص في الجاز ولا حاجة انما هي فترة والجاز هايملي البلد

فكرة حلوة بتاعة وزارة زفت الطين دا
دا حتي والله هما هايبدعوا فيها جامد

فكرتني بعذب شو لما كان بيقلد عبدالرحمن الأبنودي وبيقول
قابلت ستات من بلدنا وقولتلهم مساء الطين
قالولي كيف تقولنا مساء الطين
قالهم مالكوا مالكوا الطين دا هو اللي بنزرع فيه الورد والفل والياسمين وبدل ماقولكوا يامساء الورد والفل والياسمين قولتلكوا مساء الطين
يعني هي هياها زي ما انت قولت دا :)

استمتعت بقرائتي لسطور التدوينة:)

ليله شتاء said...

السلام عليكم
ألقى نظره سريعه شويه وحول من وزير الزفت لوزير اللقاءات التلفزيونيه ووزير التصريحات الوهميه
ههههههههههههه

تحياتي

Remas said...

اهلا بيك بعد غياب
وبجد موضوع حلو اوى

انا فعلا زيك شايفه ان كل المشاكل دى بدات بعد الحكم الصادر

يعنى توقيت غريب شويه يدعونا للتساؤل

انا فؤجيت بموضوع الجاز دا لما المدارس اتصلت بينا وقالو انننا لازن نودى اولادنا وناخدهم لان الباصات مش هاتودى ولا هاتجيب علشان مش في جاز

بجد شئ مش ممكن يا ممكن

بس عاجبانى اوى الوزارة دى

واعتقد انها هاتكون الوزارة الوحيدة اللى عندنا اسمها لايق عليها واسم على مسمى بجد

تحياتى ليك وياريت مش تتاخر علينا تانى يالموضوعات الحلوة دى

سما said...

مممممممممممممممممكن رجع يا رجاله
انت فين يا ممكن افندى من زمان كدا تزعل الحكومه منك ايه اللى انت كاتبه دا بابا وماما يزعلوا يا ممكن ممكن كدا بردوا تؤتؤتؤتتؤتؤ انا زعلت قوى منك يا جماعه انا معاااااااااااااااااااهم
على فكرة انت شكلك متغظ قوى على العموم اللى اتكلمت عنه دا حاجه بسيطة اللى بيحصل فى الصعيد ارزل من كدا مليون مرة يا ريت على وزارة الزفت بس كانا نقدر نستحمل شويه وبعدين هو فيه فول بيتسلق يا ممكن بجد اثبتلى ان ليك خبرة فى الطبيخ وهو اللى بياكل الطعميه ممكن يغيرها بجبنه وكمان زتون لا عنك فكرة عن الاسعار فعلاااااا وبعدين اصلا ما المخابز كدا كدا مش شغاله ايه الجديد مش عشان مفيش جاز عشان مفيش دقيق الحمد لله انى بعرف اخبز يا جماعه اللى عاوزانى اعلمها انا ممكن اساعدكم
ممكن افندى دمت فى ابداع
تحياتى وجوباتى

مجداوية said...

السلام عليكم

لالالالالالالالا

متنكرش إن وشه فوتوجينيك ولا تقولي حسين فهمي ولا فريدة فهمي

وبعدين احنا الشعب ملناش نعترض ولا نناقش الناس العترة الحلوين دول لأن دي أمور سيادية من أسيادنا

حابس حابس



أطلب العفو والسماح

وهو سامح خلاص

ناس أصلة بصحيح


وبعدين ده اتجاه لوزارة زفت الطين عشان تخلي الناس ترجع للطبيعة وعيشة الكشافة واشعال النار من حجرين
تحسبا يعني لو حد من الشعب راح رحلة سفاري وحب يعمل باربيكيو ومكنش معاه ولاعة ولا غاز ولا زفت

دايما كده ظالمين أسيادنا

الجواز و سنينه said...

و الله يا ممكن يا اخويا
الناس طبعا هيه اللى غلطانه كاعاده
زى كده بالظبط لسحابه السواء كان السبب فيها الناس
و كل مشكله بتحصل حتى لو كل سنه بتتكرر بيكون فيها السبب
مش حكومتنا الظريفه بلاش النظيفه
(:
المفرض ان المشكله دى بتحصل كل سنه و لا مره اخدوا احتياطتهم
مش مهم الناس تموت فى طوابير الانابيب و السولار و العيش
اكيد الغلط فينا طبعا
و عجبى

ست البنات said...

السلام عليكم
ويلكوم باك مومكن....ربنا يكرمك بجد
كلام جميل وربنا يعيننا ويعين الغلابة
وحشتنا تدويناتك

ستيتة said...

طب من وجهة نظرك
نشيل وزير اسهل
والا نشغل البيوت بالكانون ..ونركب حمير ؟؟؟؟؟؟؟؟؟؟
مفروض اننا شعب صبور مهاود
واحنا بندور على خادمة ريفية نطلع على طريقة عمل الكانون
ونشتري حمار
لأن شيل الوزير حقيقة صعب صعب صععععععب

كل سنة ومامتك طيبة
سلم لي عليها كتير السلام
وهات هدية حلوة
يعني لا عارف تجيب لها شغالة
ولا أنبوبة
ولا تمون لها عربيتها بعصير القصب
أمال بنخلف الصبيان ليه يا دي النيلة؟ :)

bentelghrob said...

هششششش هشششششش كده كخه الامور دى متمشيش كده والمدونه ليها وداااااااان ،صباح الفل يااثتاذ ممكن
بق تغيب تغيب واول مااجى اسال عليك واعلق يقولوا دى فى المعتقل
بوست جرىء منك لكن تفتكر الحل ايه
الحل ايه قول لى ازاى نعوم على وش الفته زيى ماانت مابتقول
مش عارفه اقول ايه غير ربنا يوفق الدنيا على بعضها بس كل فرع وله جذور وانت لو دورت فى الطين هتتعب وتتسخ علشان تنضف لازم تنضف الجذور ووزير الزفت دى طينه كتير
يعنى(no comment)
تحياتى.

فكرة من الزمن ده said...

مش ممكن
لا ممكن
انت شايل هموم على قلبك ليك فكها والدنيا تمشي
وبلاش النفساويات السوداوية بتاعتكم دي
الدنيا جميلة ومصر ام الدونيا
وكل حاجة تمام بس انتو بصو للنص المليان
مليان ايه مش مهم المهم انه مليان وخلاص حتى لو مليان هم وغم وكآبة
تحياتيياممكن وينصره على من يعاديه هاي هئ

سمكه واحده said...

بقي بعد اسطوره تطلع لنا بأنوبه
ياسي ممكن مكنش العشم
بعد الفتره دي كلها عاوز تفجر في وشنا انوبه وغاز كمان تقول بيوووو
منه له روح ياشيخ وتعالي بسرعه

هي جت علي وزير الزفت طب ووزير سره من الدنانير اللي
متعرفش انه كان ال ايه مأجر شقه في قصر بالف جنيه في الشهر في الزمالك والقصر قمته ب91 مليون وده تبع الاوقاف القبطيه وبعد فتره اشتري القصر كله بمليون ونص بسسسسس واخد بالك حتي لما كان مأجر فيه شقه كانت بالف وفي الزمالك ده منطقي!!!
وعنده كمان عقبال املتك قصر في الفيوم
تكلفه تشطيبه بس 15 مليون جنيه علي 6 فدادين لا وخد بالك علي ايه محميه طبيعيه وطبعا حضرتك عارف ان وزاره البيئه الجميله بتجرم البناء علي اي محميه طبيعيه القانون بيجرم ده بالحبس 6 شهور ولكل متر غرامه معرفش كام بالدولار يعني غرامه الوزير حوالي 25 مليون دولار تفتكر هيطبقه القانون

مسمعتش عن الاميره السعوديه اللي اشترت 10 افدنه للصحابها الاميرات السعوديه يستجموا فيهم ومشفتش اللي اشتروا 295 فدان متوسط سعر المتر بحوالي 230 جنيه للمتر

طب متعرفش ان الوليد بن طلال واخد 100 فدان بسعر 50 جنيه للفدان يابلاش
متعرفش ان الوليد حبيب قلبنا عاوز يأكل الشعب المصري طماطم ويهيصهم كاتشب وبيقول هيحول توشكا لمنطقه صناعيه وزراعيه ويعني يزرع طماطم وياكل الشعب كتشب ابسط ياعم هتهيص كاتشب اهو
وهيطرح 50 في الميه بسعر التكلفه لدخول مصر كشريك متعرفش انه بيقول ان خيرنا عيكوا يامصر وان احنا عندنا 40 في الميه من تراث مصر في الافلام عندنا في مصر فنادق ياشعب عندنا في كل حاجه في مصر في النطلق الزراعي والاعلامي والبنوك استثمارات ياولاد ال
ارحمونا بقي وبلاش حقد احنا موكلنكوا ومنضفنكوا
وبعدين منقعدش نتهم كل حاجه في اسرائي ولاد عمنا ده احنا حتي قريب
يا اخي عيب عيب
بلاش حقد بقي مالك ومال بتوع البترول ارحمونا بقي ده انتوا شعب يستاهل
اللي يجراله صحيح
تعرف ياممكن بجد انا بقالي اكتر من اسبوع لا والله بقالي فتره مش اسبوع بفكر في حجات كتير اوي وبيقولولي في البيت هتجنني يابت احلم واسرح في حجات ياسلام لو يحصل ياسلام لو نعمل ياسلام لو نخلي ياسلام لو معرفش ايه يتغير ياسلام لو نعمل كذا وكذا ونشيل كذا ونحط كذا
او تكون فاكر بقول اعمل ايه في بتنا نشيل ده نجيبه مكان ده
لا انا بكلم عن بتنا الكبير
بيتنا كلنا
بيت الشعب كله
والله انا حاسه من كتر الكبت الي بقينا فيه ان الواحد اتجنن وزهق وبقي يفكر في حجات مش منطقيه
ربنا يولع في الي كان السبب بجاز مش نضيف ويبقي علي وشه طين بردو مش نضيف
(:
طبعا ده الشيطان اللي بيخلي الواحد يجي علي دماغه حجات وحشه ونفكر في الناس اللي موكلنا ومشربنا ومدلعنا نفكر فيهم كلام بطال
استغفر الله العظيم يعني
انا رغيت كتير وعندي كلام اكتر
وقلبت علينا انابيب الجاز

انابيييييييب وحياتك يافهمي تديني بوبه

اهو فهمي ادانا بومبه وقال هي جت عليا انا يا ولا التيييت


تحياتي

زهرة(جنى)الاسلام said...

السلام عليكم
ندعوكم للدخول الى شات مونتى يوم21/3/2010
تمام الساعة العاشرة مساءا
من اجل نصرة المسجد الاقصى

akeed said...

هههههههههههههههههه

اجمل اسم واوقع اسمع سمعته عن اسم الوزارة وزارة الزفت و الطين و طبعاً الاسم ده بدون مبالغة ده ابسط اسم ممكن نطلقه على هذه الوزارة حسبنا الله ونعم الوكيل و مفيش فايدة غير اننا نبدأ نتصالح مع الله ليرفع عنا هذا البلاء .

تحياتى و حمدالله على السلامه استاذ/ممكن

Unknown said...

زفت وطين مره واحده
ماعتقدش اننا نقدر نستحملهم

آه وكفى said...

يا عم ممكن ما المال السايب بيعلم السرقة ويافرعون ايه فرعنك
الراجل صريح رد قال
ملئتش حد يلمني
وهو لائي حد يلمه

بلا زفت

حواء said...

شوف اكيد كل حاجة اتغيرت والدنيا بقت صعبة اوى وكلنا عارفين كدة والحكومة لكن مفيش اصلاح ولا عندى امل عشان كل حاجة بتبقى للأسوأ .. المهم بقى انا حبيت منك الرومانسية والشعر الرومانسى وده ناس كتير مفتقدينه ياريت تستمر فيه

heba said...

السلام عليكم

موضوعك هايل والله بس خدبالك بقى من نفسك احسن انت عارف اللى بيحصل لوحد اتكلم كلمة حق فى الزمن دة بيروح فين بس تصدق العيب مش فى الزمن العيب فى البنأدمين اللى مابقوش فى تفكيرهم غير ازاى ننهب اواى نستغل ازاى ننصب وضميرهم مرتاح فكرين ان دة كل حاجة وان مافيش رقيت عليهم بس فى رقيب اكبر منهم هو ربنا لمايروحلو بقى يبقى يقدمو اعزارهم بس ربنا دايما بيسامح فى حقة لكن حق غيرة لا واحنا والحمدلله مش مسامحين اى واحد مسك فى البلد دى وحسبى الله ونعم الوكيل

تقبل مرورى

heba

شهد الكلمات said...

اوجه خالص الشكر و تقدير للسيد زفت الطين اللي خلاك تخرج من قوقعتك و بياتك الشتوي اللي استمر اربع شهور و يمكن اكتر

فينك يا باشمهندز روحت فين مش بتنزل حاجة خالص لية واحشتنا اشعارك جدااااااا و لماضتك في موضوعاتك
ابقي اتلم بعد كدة و بطل تغيب الغيبة الطويلة دي
;)

و بعدين سوري على التاخير في الرد و الله انا بقالي يجي عشر ايام و اكتر مش دخلت ع النت خالص و طبعا لسة داخلة النهاردة و شوفت انك منزل البوست ده من اسبوع فامتزعلش ع التأخير بقي

حمد الله ع السلامة و ياريت ماتغبش تاني عن المدونة

ببياي بقي
:))

صفــــاء said...

طيب والله افكار افتكاسات رااائعه
ولا احلى من كدة
فعلا وزير زفت الطين
بس بجد تفتكر انهم عملو كدة فعلا عشان يأدبونا لما قضيه الغاز راحت المحكمه ؟
طب ويأدبونا ليه .. هو اصلا كان اتحكم فى غير صالحهم ؟
ماا لمحكمه كتر خيرها رفضت الدعوى لعدم الأختصاص
يبقى ليه الذل دة
دة حتى الأنبوبه بقينا نعاملها معامله الضيف العظيم فى البيت وبعد ما كان اى حاجه نولع البوتاجاز
بقينا مش بنولعه غير للشديد القوى وعشان مانزعلش الأنبوبه مننا تقوم ترفض تشتغل

بوست جميل ودمه خفيف جدا

تحياتى لك

لــــ زهــــــراء ــــولا said...

بقى بياكل استغفرا الله العظيم تيك اواي ودليفري وهوت دوج وكومبو وجمبري بانية وبيتزا !!!! استغفر الله العظيم
استغفر الله العظيم
هي حصلت للبيتزا ...دا حتى اللي عملوها ايطالين ..رحمتك بينا يارب
ههههههههههههههههههههه

انا بجد مش عارفة اخرة الوضع اللي احنا فيه ايه دي بقة كول سلو خااااااالص وهوت صوص كمان

زهور الامل عندها حق انبوبة الغاز بتكون ناقصة ومبتقضيش وربنا يسامحهوم بقى

إمرأه من ثلج said...

المشكلة مش فى وزير بعينة أو وزارة بعنها

دى مشكلة حكومة وشعب شعب مش فاهم حقة او فاهمة ومش بيطالب بية

وحكومة نايمة اكلة شاربة من قةت الغلابة

مع تحياتى

وسعيدة بمرورك بمدونتى وأتمنى دوام التواصل

ذو الوجه المبتسم said...

السلام عليكم

كلام حلو وجميل

لكن الحلول ايه ؟؟؟

وهل هتتنفذ ولا لا

نحياتى

hana said...

زفت وطين وهباب وأطران
إحنا ممكن نعمل كوكتيل جامد أوي
واهو الخامات بوفرة عندنا هههههههههههههههههههههههههههههههههههههههههههههه

مش عارفة الشعب المصري هيلاقيها منين ولا منين

تسلم إيدك ممكن

بوست هايل

ودي
و
إحترامي
هنـآ

♥نبع الغرام♥♪≈ said...

الوووووووووووووووووو

انا دخلت مدونه كلها تهيس ولا ايه يا جودعااااااااااااااااااان


مسائك سكر يا احلى من السكر


هههههههههههههههههههههههههههههههههه

نورت مدونتك يا جميل
وسمعنى سلام التيت الواد بيحب البت
نورت مدونتك


وكمان نورت مدونتى يا قمر

Ali Mahdi said...

ازيك يا ممكن؟ فاكرانى ولا لا؟ عموما انا عارف انى غبت كتير جدا وانقظعت عن التدوين لمدة طويلة وسافرت بريطانيا اعمل ماجستير بس قولت ابص كده على المدونات ولقيتك لسة موجودة وبتكتبى

كمان لقيتك كتبتى تعليق زمااااان عندى وشكرتينى لانى كنت تالت ولحد يعلق عندك وده شجعك على الاستمرار. انا سعيد جدا انك لسة مكملة واهو الواحد من خلال مونتك وغيرها بيعرف الشباب المصرى بيفكر ازاى

انا كمان عايز ارجع ادون واكتب بس المرة دى من برة مصر وعايز انقل واقارن بين اللى بشوفه هنا فى بريطانيا واللى بيحصل فى مصر

معلش طولت بس انتى رجعتينى لايام زمان

بالتوفيق ان شاء الله

Anonymous said...

وحشتنى

سمسم

momken said...

زهور الامل
ــــــــــــــ

تعليق جامد اوى يا زهزر الامل

واضح انك مدرمغه فى الازمه

(هى عربيتك بتشتغل بالسولار ولا ايه

دمتى بخير


تحياتى

momken said...

الزهرة البرية

ـــــــــــــــ

ازيك يا جودى

طبعا انا متابع الدنيا على جناح يمامه ومعجب اوى بقصتك ومتعاطف مع ليلى...وبحب طريقتها فى معالجه المشكلات

تحياتى

momken said...

gogo!sf
ـــــــــــ

الله يسلمك يا سموالاميره جوجو

من عنايا ياستى مش هغيب تانى

حقك عليا ياجوجو اذا كان فى اللفاظ اثارت حفيظتك لكنها لغه الطريق


بس فى حاجه
الناس لو قاطعت كل شىء تمنه غالى بلاضافه لمقاطعه السلع الامريكيه
وطبها الاسرائليه
واكيد البريطانيه تضامنا مع القضيه الفلسطنيه وشعب العراق
نضيف لده مقاطعه السلع السويسريه
والدنماركيه والبلجيكيه...لنصره الرسول

يبقى كده مش فضل حاجه تتاكل
هيتحول المواطن المصرى لكائن ترابى وهوائى
يعنى يتنفس ويموت ببساطه

منورانى يا جوجو تحياتى

momken said...

Just waiting
ـــــــــــــــــ

يعنى انتى جايه تهدى النفوس ولا تولعيها حريقه


دى ان اقتراحك هينشف ريقنا اكتر ماهو ناشف

منورانى


تحياتى

momken said...

فتاه من الصعيد
ــــــــــــــــ

واضح انك جايه تهدينى
بس لو اعتقلت يبقى اكلى وشربى على حسابك

الحكومه بتعتنا حلوة وزى الفل
بس مش فاضيه تحل المشاكل هى دى كل الحكايه

الرجل لسه عريس ياعالم ولسه فى
الهانى مون ومتمرمغ فى برطمان المربه
سيبوة فى حاله


تحياتى

momken said...

قلب ينبض لله
ـــــــــــــــــ

انتى منورانى يا اطيب قلب بينبض لله

الوزراء عندنا دايما هادين ومبتسمين ودايما بيتكلموا عن المشكلات باحتقار وده دليل على انهم اكبر من المشكله ومسيطرين على الوضع

يعنى الناس كانت بتموت فى طابور العيش ووزير التموين يقول مافيش ازمه

امال مات ليه يقولك قضاء وقدر يعنى هو لو كان فى مارينا وعمره خلص مش هيموت


وبعدين بالنسبه لموضوع التحيه
انا عاوز تحيه غاليه
ومافيش انفس من الجاز
يبقى مساء الجاز

هههههههههههههه
والله انتى عسل بتجرجرينى وحده وحده لحد متدخلينى العنبوكه


تحياتى

momken said...

ليله شتاء

ــــــــــــــــــــ

منورانى فى الجوله السريعه دى

بس ليه كلوكوا حطين الوزراء فى دماغوا ما عندكم المحافظين وخصوصا بتاع القليوبيه الى عنده بلد اسمها البرادعه بتشرب مجارى وهو منتهى الهدؤ وممكن ينال جائزة الدوله التقديريه لحسن الاداء

ارزاق


تحياتى

momken said...

reem
ــــــــــــــــ

اهلا بيكى ياريم ومتشكر جدا لسؤالك عليا

انا معاكى وواخد بالى من التوقيت بس مش عاوز اككون لائيم فى استنتاجى واتمنى اكون مخطى

لان القضاء هو الحائط الاخير زى ما بيقولوا
ولو انفرط عقد القضاء يبقى خلصت


بالنسبه للوزاره دى مجرد بدايه وعندى وزرات تانيه كتير لو الوزاره دى اخفقت فى القيام بدورها



منورانى


تحياتى

momken said...

سما
ــــــــــــــــ


طب خالى حد غيك يا سما يقول كده

داا اعرفك من زماااان اوى وانتى لسه اد كدهوة

وكنتى ثورجيه من يومك

واسوان كلها بتعمل الف حساب لنشاط سما السياسى وشعرها العاطفى كمان


منورانى ياحلم الجنوب



تحياتى

momken said...

مجداوية

ـــــــــــــــــــــــــــ


فوتوجونيك......هههههههههههههههههههه
والله دانتى عيكى حجات
دى وشه كلله حبوب شباب وديفوهات بس ماعلينا طالما انتى شايفه فوتوجنيك يبقى نجم بوسترات علشان خاطر مجده المعداوى

ده جاى بوسطه جامده جدا

اه نسيت بالنسبلك يا مجداويه ممكن تمونى عربيك من عند عزة
او من اى بتاع مناجه فى ميامى اهم كتير

علشان فرغلى ميكونش عليه ضغط


ودستور يا اسيادنا


تحياتى

momken said...

الجواز و سنينه
ـــــــــــــــــ

انا متفق معاكى جدا والله

وغلط نفسى وغلط الشعب كله
وعلشان كده كل واحد فى الشعب لازم ياكل الى جنبه قم على قفاه علشان الشعب يصحى


طاخ...طااخ...طاخ

اى



تحياتى

momken said...

ست البنات

ــــــــــــــــــــــــــ


منورانى ياست البنات وطالما دعيتى للغلابه يبقى بتعديلى


ولا يسعنى الا انى اقول امين


وربنا يصبرنا او بفرجها علينا

افرجها يااااكريم


تحياتى

momken said...

ستيتة حسب الله الحمش
ــــــــــــــــــــــــــ

تعرفى انا بقيت معروف فى مكاتب المتستخدمين الى بيوفروا شغالات
من كتر ما روحت عندهم لطلب شغالات
مش بيقعدوا كتير مع والله امى برغم شغلها برضو بتساعدهم كتير جدا
وفى حجات كتير مش بنخلى الشغاله تعملها

بس المشكله ان الشغاله عامله زى لعيبه الكوره محترفات
بتتفق على اجر ولو قدرت تتقف على اجر اكبر شويه مبتفكرش لحظه بتسيبك بدون سابق انذار
وهوب البيت يتقلب راسا على عقب

فيوم هبقى اعمل تدوينه على مغامراتى فى جلب شغالات


منورانى

momken said...

bentelghrob
ـــــــــــــــــــــــــــــ


ايه هو الى هشششش هششششش


ايه علبه بيروسول جايه تعلق عندى

وبعدين انتى خلاص خدتى نفسك وشديتى حيلك عليا


على اعلعموم ياستى هشينا وسكتنا

والف حمدالله على السلامه
والف مبروك نجاح العمليه الجراحيه
وربنا يمتعك بالصحه والعافيه دائما

وضحكتك تملى الدنيا

منورانى يابت الغروب



تحياتى

momken said...

فكرة من الزمن ده
ـــــــــــــــــــــــ

والله فعلا عندك حق والمفروض ننفض ونسقع ونكبر الدى

ونعيش زى اناس ماهى عايشه

بلا هم

بس نص الكبايه المليان نصه التانى مسروق ومنهوب
ماعلينا نخمس فى النصف المليان


تحياتى

momken said...

سمكه واحده
ــــــــــــــــــ

اهلا يا توتى...ازيك منورانى انتى وكل اهل اسكندريه

معلش بقى ياتوتى استحملينى احيانا مش بكون رومانسى وهموم الشارع بتظهر على ملامحى

بصى ياتوتى بالنسبه للوزير بتاع فضيحه قصر الزمالك انا مرضيتش اتعرض له لان الجميع عارف انى اهلاوى وممكن يقولى ببساطه وانت مالك انت او يقلب عليا الجهور بدافع انى عنصرى وضد الزمالك وبعادى الساميه

اما الامير وليد بن طلال مقدرش اجى نحيته علشان ممكن يحول المدونه بتعتى لشريط كاسيت ويذيعه فى روتانا
او يحول المدونه لفيلم وثائقى
الراجل زى الفل

اما بالنسبه للكبت فانتى اصلا ولوده كده الحكومه بريئه

انتى جايه تحبسينى ولا ايه

اما عن الشيطان فبرضو بلاش نجيب سيرته علشان مرشح للوزاره الجديده
وهتكون وزاره نا على زيت حار


منورانى يا سمكه


تحياتى

momken said...

زهرة(جنى)الاسلام
ـــــــــــــــــ

نعتذر عن تلبيه طلبكم لظرف خارجه عن ارادتنا

اما عن نصره الاقصى فندعوا الله ان يقدر لنا طريق للجهاد والنصره

فما اخذ بالقوة لايسطرد الا بالقوة وليس للسياسه او الشجب مكان فى الموضوع


تحياتى

momken said...

akeed
ـــــــــ

الاستاذ اكيد صاحب المدونه الشهيره والنجم الامع فى عالم التدوين شكرا لتشجيعكم وكلماتكم الجميله


تحياتى

momken said...

esraa
ـــــــ

يا اسراء هما موجودين بالفعل لكن باسم الدلع

او لو جاز التعبير بلاسم الحركى

وادينا متحملين بفضل الله
ومقضينها عيشه


تحياتى

momken said...

آه وكفى

ــــــــــــــ

انا كنت عارف انه موجود من زمان لكن معرفش انه من ايام الاسره السادسه

ياخبر هو يوعى على فرعون

دى قديم اوى


منورانى


تحياتى

momken said...

حواء
ـــــــــــ


اى راجل فى الكون لايستطيع ان يقول لحواء الا
سمعاً وطاعه


تحياتى

mira said...

ازيك يا ممكن
حلوة اوى الاقتراحات اللولويه اللى قلتها
ياريت ننشرها عشان الناس تعمل بيه يمكن نستريح شويه
يعنى نحط عصير قصب فى العربيات
ونطالب بتكوين وزارة الطين الحلوة دى اللى هاتعمل كتيييييييييييير عشان لبلد واللى فى البلد
واحنا كلنا معاك يا ممكن
وربنا معاك ومعانا
بس يارب نرتاح بقى
تحياتى
ميرا

Anonymous said...

السلام عليكم

موش شايف البوست عندي ليه :)

طيب جرب تتصفح بالفاير فوكس :)

تحياتي

Anonymous said...

بجد مش عارفة اقولك تحفة اد اية

كل الللى اقدر اعملة ان ترفع لك القبعة

الله عليك يا ممكن

momken said...

heba
ـــــــــــــــ

ده بالزمه كلام يا هوبه

انا اقول الى انا اوزة ولو اتمسكت اقول عليكى على طول واقول انك انتى الى وزتينى وحرضتينى اجيب سيره الناس الطيبه دى

اما بقى لو فشلوا يمسكونى وعاملوا مكأفاءه ليلى يرشد عنى بلغى انتى وابقى اقسمى معايا
الحقيقه لو كنت اضمن امانتهم واحترامهم لكلامهم كنت اا بلغت عن نفسى وكوشت على المكافأه لوحدى

وبعدين نتى جايه تحسبينى عليهم عندى هو انا ناقص يا هبه
روحى يا شيخه وتعالى بسرعه

تحياتى

momken said...

شهد الكلمات
ــــــــــــــــــ

يعنى جايه متاخره وكمان لسانك سبقك
ولا بلاش قدام الناس

اقصد يعنى لسانك حضرتك سابقك

حضرتك شكرك وامتنانك وصل لاصحاب الحق يا فندم
ام عن غيابى فانا على سفر
وسفرى هو سبب تقصيرى وغيابى ياستى

وعلشان خاطر الست شهد مقدرش ااخر وكلام حضرتك اوامر يا ستى

انا عن موضع اتلم
اتلمينا


تحياتى

momken said...

صفــــــاء
ـــــــــــــــــــــــــ

ههههههه

طب ربنا يستر يا صفاء وربنا يكتبلى عمر وافتكس كمان شويه

الحقيقه يا صفاء الوزاره دى من حظها انى متربى كويس ومبعرفش اشم خالص خالص خاص

تعليق فطسنى من الضحك يا صفاء

تسلم ايدك

تحياتى

momken said...

لولا وزهراء
ـــــــــــ

اه يا زهراء
بياكل والعياذ بالله كلوسلو...وزينجر سوبريم....ووتشكن الاجريك

دى غير النيجرسكو الاسباجتى والازانيا

الحقيقه يازهرا تعليقك يفتح النفس

انا عاوزك كل يوم تعلقى عندى وقت الغدا


نفسك حلو فى التعليق


تسلم ايدك


تحياتى

momken said...

إمرأه من ثلج
ـــــــــــــ


الناس الغلابه بتكون خايفه من المجهول

الناس الغلابه مش عارفين اننا دلوقى فى اسواء الاحوال وليس هناك ماهو اسوا

يعنى اى حكومه هتحاول تبهدلنا اكتر من كده مش هتقدر

لكن الناس المتدهوله فى لقمه العيش ودفع الحجات الغريبه الى فرضهها ابن بطرس غالى مش فايقه تشوف قدمها ولا تعرف الى بيحصل لها

انتى نورتينى


تحياتى

momken said...

ذو الوجه المبتسم
ــــــــــــــــــ

انا قدمت حلول والله
اما بقى لو لاقدر الله مش عجباكم حلولى

اتفضلوا ورونى شطارتكم



تحياتى

momken said...

hana
ــــــــــــ

كوكتيل كمان

انتى ككده عاوزة تناسى فرغلى فى اكل عيشه

يبقى حتى فرغلى مش هنعرف نمون من عنده
ده كان الحائط الاخير

وملاذى الوحيد


الشعب المصرى مفروض يتوكل على الله علشان الحكومه تجيب شعب محترم تحكمه


تحياتى

momken said...

إبتسامة ملاك
ــــــــــــ


سلام كبير اوى للناس الى لسه جايه
وقابل ياعم الناس الى جايه من البندر

وسلام تلاتات تلات من هنا للشلالات
ودوش على الزار وارفع الشعار

انتى والله منوانى
وشرفتى مدونتى المتواضعه


الرد بتاعى مليان اسفاف

ههههه


تحياتى

momken said...

Ahmed Moghazy (Ibrahim)
ــــــــــــــــــــــــــــــــ


طبعا فاكرك يابو حميد

عودا احمد ياسيدى

اما عن شكرى ليك فده حقك
وده من باب رد الق الى اهله

ومن لا يشكر النناس لا يحمد الله


بس فى حاجه مهمه اوى يابو حميد

ممكن ده مش مؤنث خالص
ومش عارف جالك الايحاء ده منين


منورانى يا مان


تحياتى

momken said...

Anonymous
ـــــــــــــ


وانتى كمان وحشانى جدا


ممكن

momken said...

mira
ـــــــــــ

نرتاح ازاى بس يا ميرا والناس تعبانه

انت وحضرتك من الثوار والزعماء
ولازم نتعب علشان الناس الغلابه
ونفتكسلهم وزرات تانيه تريحهم


مش تريح عليهم


تحياتى

momken said...

قيس بن الملووووح
ــــــــــــــــ


ياعم الناس الى عندك اكبر ممن بابا اساسا

وانا سنى و مركزى وثقافتى اقل من انى ااقول رائى فى مشكلات قراء حضرتك

بس برضو حاضر ده شىء يشرفنى



تحياتى

momken said...

فتاه من الصعيد
ـــــــــــــــــ

كانت مشكله بسيطه وتم العامل معها


نورينى




تحياتى

momken said...

Anonymous

ــــــــــــ

طب البسى القبعه بسرعه علشان ميجلكيش برد


ومتشكر ياستى على الاحترام الجم



تحياتى

موجة said...

مساء الزفت والقطران
هلا فيك مستحيل

عامل ايه
بوست تريقة معتبر

ندا منير said...

والله مصر بقى حالها ميتوصفش
شوف لدرجة ايه
مبقاش ليه تعبير نقدر نوصف بيه مصر
وللاسف كل حاجة فى مصر بقت غلط وصعب حلها

وهما مش راحمين فى اى حاجة

وبالنسبة لمشاكل الانبوبة فهما غلوا الغاز جدا بقى تقريبا بيركب ب 12 الف ودا طبعا محدش يقدر عليه الا الاغنية
والانبوبة مبقتش موجودة الا نادر
مع ازمة السولار

يعنى حتى لو فى ازمة فى الانوبة طب ليه يغلوا الغاز بالشكل دا
يعنى مش راحمين ولا راضيين يسيبوا اى حل للمواطنين او مخرج ومنفذ ليهم

زهور الامل said...

اين انت يا ممكن يا ولدي

اظهر وبان عليك الامان

يارب تكون بخير

زهور الامل said...

وبعدين خد هنا

انت بتتريق عليا علشان معنديش عربية

بكرة يا سيدي احوش من مرتبي اللي مش بيكفيني مواصلات واشتري الاحدث من العربية

وهو توكتوك هايونداي 2010 واحنسك بيه ومش هرضى اركبك فيه خااالص (وش مطلع لسانه)

تحياتي

Remas said...

صباح الفل والاوركيد

ازيك واخبارك ايه

انا مبسوطة بئا جدا ان الصورة بتاعة بوست شم النسيم عندى عجبتك

اصل انا حبيتها اوى لما شفتها مش عارفه ليه وانت الوحيد اللى خدت بالك منها
ميرسي يا فندم جدا ليك
وبتنورنى بجد

Unknown said...

اين انت يا ممكن؟ .. مافيش بوستات جديدة ليه؟ .. ممكن تكتب حاجة جديدة بقى؟ .. ممكن يا ممكن؟؟؟؟؟؟؟؟

:)

heba said...

الله تصدق انابقالى كتير مادخلتش قريت كلامك دة بس انت عاوز تبلغ عنى مااااااااااشى روح انت بقى وماتجيش بسرعة طيب لو كدة هنتفق اتفاق ان اناهروح ابلغ عنك وهما لازم يعملو مكافأة بقى اقوم انااخدها وادى بقى للورثة ههههههههههه عشان لاانت ولا انا هنلحق نتهنى بيها ههههههههه زى غبى منة فية احنا ندخل من هنا والبوليس يدخل من هنا ونتمسك هنا ايه رايك


heba

gogo!sf said...

اليأس موجود...والامل مفقود

وربنا موجود...والف مبروك

عاشقه الاحزان

sweet angel said...

اااااااااااه

عنيااااااااااااا

لو سمحت ظبط اللون

جارة القمر said...

ممممممممممممممم

طيب احنا نقول ايه

انتو في نعيم لسة

انا عفكرة عينيا تزغللت ماشفتش انت كاتب ايه غير بالعافية


بس اسلوبك ممتع


يسلموووووووووووو

لــــ زهــــــراء ــــولا said...

مشاء الخير يا ممكن
رغم انك طلبت ان تعليقى يكون وقت الغدا بس معلش المره دى وقت السحور
المهم انت فينك مش بتظهر فى المدونه عندنا من وقت لما حكيت على كتاب تاجر البندقيه
ياترى انت زعلان على الكتاب اللى اتقطع او على انك مش قراته فى وقتها
على العموم نحن فى انتظارك عن قريب ان شاء الله
وقت الغدا او العشا او الافطار المهم تشرفنا بالزياره

زهــــــــراء

سواحة said...

فعلا ممكن يا ممكن

مش فيه وزارة اسمها التعليم و مخلصة على التعليم و التربية
و فيه وزارة اسمها الشئون الاجتماعية و مخلصة على الشئون و المجتمع
ووزارة اسمها الاتصالات و مخلصة على الاتصالات بين الناس و حدش بقى يسال فى حد

يبقى لو فيه وزارة زفت الطين و تخلص على الزفت و تسيب باقى المشتقات جميل بس من الاثار الجانبية الى لازم نفكر نعالجها ازى لو خلصت على الطين ؟؟ الى بيخلص فعليا من عدة محاور من ساحل لسيناء لنحر البحر لتوشكى :-(

صدى الصمت - عاشقة الورد - said...

الحقيقة عجبتنى قوى كلمة نهاركوا جاز !!!
أحييك على مدونتك الجميلة
أول زيارة
دمت بكل الود

Anonymous said...

السلام عليكم ورحمة الله وبركاتة

ياريت المشكلة تقف عند وزير الزفت وبس المشكلة أكبر من كدا والرضوح للواقع المرير

موضوع فى غاية الأهمية

أدعوك لزيارة مدونة مجرد انسان ودوام التواصل

أحترامى وتقديرى

الحب الجميل

Hadota ... حدوتة said...

طبعا الموضوع كبير والازمة طايلة كل حاجة مش الغاز بس
بس لما قريت المقال دا تفائلت شويه .. شعان الواحد كان صعبان عليه بصراحة

حقائق عن تصدير الغاز المصرى لا يعرفها الجميع


http://www.facebook.com/?ref=home#!/photo.php?pid=5354330&id=110578249514&ref=mf

momken said...

موجة
ــــــــــــــ

مسائك جميل يا موجه
-هو الى هنعمله فى الناس هيطلع علينا ولا ايه؟-

شكرا على الزياره والتحيه

تحياتى

momken said...

ندا منير
ــــــــــــ

لو سابو المواطن فى حاله يبقى هيفقدوا اهم صفاتهم فى انهم حكومه باركه على قلب الشعب

ولازم تشكمه وتحكمه وتعلمه الادب

منورانى يا ندى


تحياتى

momken said...

زهور الامل
ــــــــــــ

طيب لما البليه تلعب معاكى والفلوس تبقى فى ايدك زى الروز ابقى افتكرينى بطبق


وياريت تبقى تفسحينى بالتوكتوك....اخد لفه يعنى

وبعدين مال لسانك يا زهور؟؟؟؟


تحياتى

momken said...

reem
ـــــــــ

صباحك تيوليب يا ريم

انا الحمد لله بخير

اه الوان البيض جميله اوى ولو انى مش باكل البيض بس ميمنعش انى استمتع بشكله

انى زوقك عالى اوى

دمتى رائعه



تحياتى

momken said...

إنـســـانـه

ــــــــــــــــ

حاضر ياستى قريب اوى هعمل بوست جديد

واعتبريه وعد


تحياتى

momken said...

heba
ـــــــــ

الحقيقه ان مبسوط من الخطط بتعتك اوى يا هبه

واضح انى حطيت رجلى على اول الطريق الصحيح

منورانى



تحياتى

momken said...

gogo!sf
ــــــــــ

ايوة ايوة

والدخل مولود والخارج مفقود
وعبود على الحدود

وربنا يتمم بخير


تحياتى

momken said...

sweet angel
ـــــــــــــــ

المشكله عندك يا سويت انجل
اضبطى الريزليوشن بتاع المينتور بتاعك

والف سلامه على عنيكى ياستى


تحياتى

momken said...

جارة القمر
ــــــــــــــــ

انتى كمان مش شايفه؟؟؟

دى طلب جماهيرى بقى



حاضر ياستى هغير الوان دى خالص

ومتشكر على كلامك الجميل


تحياتى

momken said...

لولا وزهراء
ـــــــــــــــ

يازهراء اهل اسكندريه ليهم عندى وضع خاص جدا يعلقوا فى اى وقت يحبوة

ويقولوا كمان الى يعجبهم

انا ياستى باجى عندكم كتير بس مش بلاقى بوستات جديده


دمتى بخير




تحياتى

momken said...

لولا وزهراء
ـــــــــــــــ

اه صحيح

اعتقد فى مشكله فى المدونه بتعتكم من تاحيه التقويم

لان الريدر مش بيعرف يقراها

ولا الريدر بتاع المدونه ولا الريدر بتاع بلوجر

بيقول انه اوت اوف ديت

تحياتى

momken said...

Wanda
ــــــــــ

اخيرا لقيت حد بيايد فكرتى

انا هقف فى ميدان التحرير واقول بعلو حسى


(بقينا اتنين يا كلاب)


تحياتى

momken said...

صدى الصمت - عاشقة الورد
ـــــــــــــــــــــــ

انتى منورانى

وبعدين نهاركو جاز دى اقل حاجه عندى... الالفاظ الجميله دى عندى فى جعبتى كتير اوى بس مش عاوز ابوز مفرداتكوا


اسم مدونتك جميل وبيحرضنى على زيارتك


تحياتى

momken said...

الحب الجميل
ـــــــــــــــ

علم وجارى التنفيذ يا فندم



تحياتى

momken said...

Hadota ... حدوتة
ــــــــــــــــــــ

اهلا باخر تعليق


متشكر على الزياره والمعلومات




تحياتى

صيدلانيه طالعه نازله said...

و الله يا ممكن بناء على ما تقدم من اقتراحاتك اللولبيه
احب اقولك اننا فعلا محتاجين وزاره زفت الطين دى قوى
اصل احنا الحمد لله ربنا ادانا الزفت من وسع و الخير الحمد لله عم و فاض و زاد عن حاجه البلاد
و فضلت افكل ايه اللى ناقصنا يا بت يا علا ايه اللى ناقصنا يا بت يا علا
لقيت فعلا انه الطين يا ممكن
اوعى تكون فاكر و العياذ بالله انى قصدى عليك
ابسليوتلى نوووووووووو
انا قصدى الطين اللى خلقنا منه و اليه نعود

و شوف بقى اما الطين يكتر الخير حيعم علينا ازاى و تبقى سنتنا طين و الحمد لله

و بعدين موضوع استعمال عصير القصب بدل البنزين فكره شغاله اخر حاجه
و بتدل على عقل واعى و شغال يا سى ممكن
بعدين مع الوقت حتظهر عربيات تشتغل بعصير الخوخ و عربيات بالكوكتيل و حنلاقى عربيات غاليه بتشتغل بالبلاك ليبل او الاسكوتش

و بالطريقه دى حتزدهر زراعه الخوخ و الكنتالوب و كل مكونات عصير العربيات

و محلات العصير حتكتر و طبعا كل ده حيساهم فى تشغيل كوادر شابه كتير واحد بيعصر قصب و التانى بيصفيه وواحد بيفول العربيه بالعصير
خير يا ابنى و حيعم

و من هذا المنطلق بافكر اعملى كام محطه عصير يوووووووه قصدى كام محل عصير و اهو يبقى عندنا نظره مستقبليه و مشروعات تخدم المجتمع

ما تيجى نتشارك انا و انت و نعمل سلسله محطات تموين بالعصير
و اوعدك يا ممكن حنهييييص و الامور حتبقى فل على مانجه

ياريت بقى الاهلى يفوز النهارده و الا اكيد حيكون ردك على الكومنت بتاعى زفت مقطرن و الحمد لله
بس للاسف الاهلى دخل فيه جون فى اول ثانيه

ربنا يستر
ممكن يا ممكن اروح اشوف الماتش و لا مش ممكن
دعواتى ليك و لكل الاهلاويه ان ربنا يجبر بخاطرنا النهاردهو ميشمتش فينا زملكاوى واحد

صيدلانيه طالعه نازله said...

ياه كل ده تعليق
ده انا رغايه قوى
و مكنتش واخده بالى
من مواهبى المدفونه دى
كلها
قولى امشى بقى لاحسن انا طولت كتير

Unknown said...

شركة تنظيف بالرياض
شركة رش مبيدات بالرياض
شركة مكافحة حشرات بالرياض
شركة مكافحة النمل الابيض بالرياض
شركة نقل اثاث بالرياض
شركة ترميمات ودهانات بالرياض
شركة ديكورات بالرياض
شركة تسليك مجارى بالرياض