Wednesday, August 15, 2007

واثق من نفسك.......ولا مغرور


صباح الخير
والله وحشتونى جدا
واقسم بالله انى احبكم جميعا فى الله


عاوز انهارده نتكلم فى حاجه شغلانى
ياترى حد قبل كده اتهمك بالغرور؟
طيب حد اتهمك بضعف الشخصيه؟
طب بلاش حد قالك ان شخصيتك مهزوزة شويه؟
طيب فى حد قليل الزوق جدا قالك انك عديم الشخصيه؟
احنا كتير بنحكم على ناس بانهم ضعاف الشخصيه
ونسميهم شرابه خرج......او نقول انهم دلدول....او امعه
او حتى خروف لو بنتكلم عن راجل ضعيف قدام زوجته القويه
طيب كويس
ايه الى يخلينا مندخلش فى الدايره دى
ايه الى يخلينا واثقين فى نفسنا.... وفى نفس الوقت مش مغرورين

احبابى الثقه بالنفس مكرمه وخلق حميد بيتحلى به الافراد بين الناس
وبيكون زى تاج يضيف كتيرا لمن يتحلى به
مش هطول عليكون احنا هنتكلم عن الثقه بالنفس وازاى يكون كل واحد فينا واثق من نفسه

.........
الاول لازم نعرف ان
الثقة في النفس مش ثابته وغالبا بتتأثر بالظروف اللي حوالينا …
يعني مثلا صحيت من النوم لاقيت الجو كويس ولاقيت
تقدير من (والديك- شريك حياتك- جيرانك…) ولاقيت الناس كلها مبتسمة في وشك..
أكيد هتشعر بالثقة وإنت نازل من بيتكم.. صح؟

لأنك هتحس إن لك دور مهم في حياة الناس دي…

لكن لو نزلت لاقيت واحد طرطش مية من الدور السابع وإنت ماشي في الشارع..
هيكون إحساسك إيه؟ هل ثقتك هتفضل زي ما هي؟؟


"أحمد" كان متعود يروح النادي كل يوم يلعب اسكواش..
وكان بيغلب كل منافسيه وكان ده مصدر فخره..
لكن في يوم حصلت له إصابة في الرباط الصليبي
والدكتور نصحه مايمارسش الرياضة دي تاني..
هل لما يقابل الناس اللي كانوا بينافسوه في الاسكواش,
هل هيتعامل معاهم بثقة زي الأول؟
كيف تزيد الثقة في ذاتك؟
أولا لازم نعرف إن الثقة دي مش ثابتة زي ما قلنا..
يعني الطبيعي إن ثقتك النهارده مش زي بكره مش زي بعده..
المعدل بيطلع وينزل.. ده الشيء الطبيعي..
اللي احنا بنعمله هو إن الثقة دي تبقى مرتفعة طول الوقت..
ممكن تنخفض شوية.. ساعتها تنفذ الخطوات اللي هنقول عليها دي

خطوات زيادة الثقة
..
ابحث عن نقاط القوة..
فيه حاجة ظريفة جدا مخنا بيعملها…لو فيه حاجة إنت متفوق فيها, غالبا بتحس إنها شيء عادي وبديهي بالنسبة ليك..
وإن أي حد ممكن يعملها..

فممكن ماتحسش إنها نقاط قوة عندك أساسا..
لي صديق اسمه "نادر".. كان متعود يكتب قصص ساخرة من واحنا في المدرسة..
وكان مستوى القصص دي رائع في رأيي..

طلبت منه انه يعمل بلوج وينشر فيه القصص بتعته وفضلت الح عليه علشان يواف…
عارفين عمل إيه؟!!

رفض قال إنه مش موهوب قوي وإنه مايستاهلش ينشر القصص بتعته للناس..
!! وقال إن دي فرصة أكبر منه
طبعا فضلت أزن على دماغه وأتبع إستراتيجيات التفاوض واقتنع في النهاية..

وافق ينزل قصه عند بلوج واحد صحبنا..

عارفين كانت إيه النتيجة؟
لما روحنا البلوج بعدها لاقيت الجميع معجبين بقصته وأسلوبه..
لحسن الحظ كان معايا "نادر" ساعتها وقرا كلام الناس عن أعماله أكيد متخيل الثقة اللي هو كان حاسس بيها… صح؟


عايز أقول إيه؟
اللي عايز أقوله هو إنك لازم تبحث عن نقاط القوة اللي عندك
ممكن تكون نقاط القوة دي حاجات إنت حاسس إنها عادية وإن ممكن أي حد يعملها
لو فيه نقاط قوة إنت عارفها أصلا.. ابحث عن غيرها..
ابحث عن الحاجات اللي إنت بتعملها عادي جدا
وممكن ناس كتير حواليك مش عارفين يعملوها.. اعرفها مهما كانت بسيطة اكتبها واقراها بتمعن.. عملية كتابتك ليها بترسخ المعتقدات دي في ذهنك أكتر
اكتب نقاط قوتك في ورقه فلوسكاب.. خذ وقتك وفكر..
ثم اكتب هذه الأشياء مهما كانت صغيرة في نظرك..
هل تنشر البهجة في قلوب الأصدقاء؟

هل تحب مساعدة الآخرين؟
ما هوايتك؟؟

ماذا تجيد؟؟

بماذا تتميز؟؟

اكتب كل هذه النقاط هنا لأنها ستساعد على إكسابك الثقة والقوةفي نقاط القوة
فيه قانون في العقل الباطن اسمه (قانون التركيز)..
القانون ده بيخليك لو ركزت على حاجة هتغطي على الحاجات التانية وهتنمو وتزيد
اوصف شخص إنت بتكرهه.. اكتب صفاته هنا


اللي حصل هنا؟

إنت بتكره الشخص ده فمركز على الجوانب السيئة اللي فيه..
في حين إن أكيد فيه جوانب كويسة.. أكيد يعني
..
عمره ما جامل حد؟؟

عمره ما ابتسم في حياته؟؟

عمره ما ساعد حد في حياته؟؟

أكيد عمل حاجات كويسة إنت عارفها بس الحاجات دي مش جاية على بالك
لأن (قانون التركيز) خلاك تركز على الجوانب السلبية بس..
بعد ما عرفت نقاط القوة اللي عندك, ركز انتباهك عليها..
خليها دايما في بالك وإنت بتتعامل مع أي حد أو في أي موقف في حياتك..
لما تركز في النقاط دي هتلغي نقاط الضعف اللي عندك…
لو "محمد علي كلاي" ركز على إنه مش عبقري زي "أينشتاين" كان أصابه الاكتئاب!!
لكنه ركز على نقطة قوته واللي خلته يتفوق في مجاله..
"I’m the greatest" ! لاحظ إن كلمته الشهيرة كانت:
مفيش حد كامل في الدنيا دي..
اللي عنده فلوس ممكن يكون ناقصه شخصية جذابة..
ممكن واحد عنده قصر يزعل إنه ماعندوش جزيرة..
واللي عنده جزيرة يزعل إنه ماعندوش اتنين..
واللي عنده جزيرتين ممكن يزعل عشان ماعندوش سلطة مثلا زي الملك الفلاني...
لو الناجحين بيفكروا كده ماكانوش اتقدموا خطوة...
ركز في اللي عندك وخليك مؤمن بيه وبقوته.. هيوصلك للثقة التامة في النفس..
لكن لو ركزت على نقاط ضعفك ده هيكون الحاجة اللي بتشدك لورا وتعيق تقدمك..
وتدمر ثقتك في نفسك..
الاختيار في إيدك إنت!
نقاط قوتك أهي
اقراهم بتمعن.. حطها في محفظتك -في درجك
في شنطتك أو علقها في غرفتك..

وجود النقاط دي أمامك وقراءتها بترسخ المعتقدات دي في ذهنك أكتر..

وارجع هنا اكتبهم تاني لو حبيت تعدل حاجة



التقديـــر


كلنا محتاجين للتقدير..

فاكر لما كانوا بيصفقوا لك في الفصل؟
فاكر لما نجحت وأهلك كانوا فرحانين بيك؟

إحساس رائع مش كده؟

كتير مننا الدافع الرئيسي وراء حياتهم هو البحث عن التقدير..
عايزين الناس تحترمنا -تفخر بينا- تعجب بينا طول الوقت.. صح؟

طيب..

ده شيء جميل جدا ومطلوب..


لكن فيه مشكلة بقى

..
ماذا لو لم تجد التقدير المطلوب بعد أن أنجزت شيئا مهما؟

ماذا لو توقف أحدهم عن تشجيعك ومساندتك؟
هل ستستمر في الإنجاز والنجاح بنفس الدرجة؟
هي دي المشكلة..

إنك بكده تكون ربطت نجاحك بظروف خارجية مالكش تأثير عليها..
بقيت كده عامل زي الريشة في مهب الريح..

تجيبك شمال تجيبك يمين..
!!مطرح تقدير الناس ما يوديك
لو توقف التقدير من الآخرين ممكن تتوقف عن الإنجاز
وتفقد الثقة في نفسك..

طيب إيه العمل بقى في المعضلة دي؟


فيه حل عبقري يعتبر خدعة للعقل الباطن..
عشان يخليك ماتحتاجش التقدير من الآخرين..
وزي ما إنتم عارفين, فيه طرق بنخدع بيها العقل الباطن
عشان يخلينا نحس بالأحاسيس اللي احنا نقررها..

هطل صح؟

إنتم لسه شفتم حاجة؟

طريقة خداع العقل الباطن كي نتوقف عن طلب التقدير الذاتي من الآخرين:
الطريقة دي بسيطة جدا وهتخليك يبقى عندك اكتفاء ذاتي من التقدير
ومش هتكون محتاج تشجيع طول الوقت من حد..الطريقة بسيطة جدا وممكن تستهيفها..
لكن مش ممكن تتخيل مدى تأثيرها.. الطريقة دي هي

:
إيه ده؟

أنا طولت عليكم..

نكمل المرة الجاي;

45 comments:

rack-yourminds said...

شوف يا عسل انا هسجل حضوري هنا لاني بجد كتابة البوست ارهقني

وكمان نعسان كتير

بالليل ان شاء الله هاجي وهشوف موضوعك

بعتذرلك يا عسل

ولو اني عارف موضوعاتك عسل زيك

تحياتي يا باشا

انا اول واحد يعلق

المدون الذهبي في كل حته

semsem said...

السلام عليكم

اولا
احببك الذى احببتنى من اجله
وانا كمان يعلم الله انى احبك فيه فليجمعنى واياك فى رياض الجنه

تانيا نيجى للبوست

من غير زعلى انا ارهقت فعلا من قرايه البوست ده
ممكن يكون العيب فيا
يس متهيالى كان محتاج اختصار اكتر على شان توصل للناس بسرعه حاول توصلهم باقل الكلمات الممكنه
والبوست بصراحه طويل وبيتنقل بين حاجات كتير بتلف فى محور واحد اه بس بيشتت

نيجى بقا لموضوع البوست نفسه
وتعليقى عليه

بعض الناس تستمد احترامها وثقتها بنفسها من نظرات الاخرين ..وهى دى المصيبه
ففكرة ان ترضى كل الناس فكرة مستحيله ولو وضع الشخص نفسه فى هذة الدائرة سيصير عبدا لمن حوله

كنت يوما قرات هذه الجمله

لاتجعل سعادتك وتقديرك لذاتك معلق بين يد الناس فلن يمنحك احد اياها الا انت ؟

وان تقبل الناس لك او عدم تقبلهم لا علاقه له بتقدريك لذاتك

فالناس مختلفين دايما

والناس حولك كعرائس الماريونيت ..انت المسئول تماما عن تصرفاتهم معك ,فهى لا تنطلق -غلبا - من تلقاء نفسها ..بل انت الذى يصر على جذب الخيط الخطا !

وفى النهايه بقيا قول
رحم الله امرى عرف قدر نفسه

وقدر نفسه هنا
تعنى امكانياته ومواهبه وخبراته
الذى لابد ان بستغلها وتكون هى مصدر فخرة بنفسه لانها هديه الله اليه

والسلام عليكم
رائع ياممكن كاعاده

شمعة أمـــــل said...

يااااااااااااااااااه
استنى كده اخد نفسى شويه
ايه يا ممكن كل البوست ده
انا كنت هسيبه لما شفته لكن لما قريت جزء منه بصراحه كنت عايزه اعرف هيوصلنى لايه
فكره البوست فلا موجوده فينا يعنى حكايه ان الناس اللى بتقابلهم او الاحداث اللى بتحصلك ممكن تخليك واثق من نفسك مرة وممكن تخليك مرة تانيه مش قادر تثق فى نفسك وفى قدراتك
ونقطه ان الواحد فينا بيبقى عنده نقاط قوة مش حاسسس بيها فده شئ صحيح
معظمنا فعلا بيعمل حاجات وبيبدع فيها بجد بس لانها شئ عادى بالنسبه ليه مش بيحس انها مهمه لكن اعجاب الناس بيها هو اللى بيخليه يحس انه عمل شئ مهم
لكن بصراحه انا متغاظه اولا من حضرتك لانك مكملتش الموضوع وانا بصراحه فضوليه جدا لدرجه انى مش هعرف انام غير لما اعرف الطريقه اللى بتقول عليها لخداع العقل الباطن
اما السبب التانى هو انى احتمال اغتال wahed
لانه فى كل حته بيسبقنى ويقول انه المدون الذهبى وشكلى كده هعملها قريب
اترحم عليه بقى
وخلى بالك على نفسك لانى لو معرفتش باقى الموضوع مضمنش انا ممكن اعمل ايه
فاهمنى يا ممكن؟ ;)
اوعى اكون طولت عليك ههههههههه

rack-yourminds said...

شوف يا ياباشا

انا كتير بشوف ناس تلاقيهم شايفين نفسهم قوي وغرور وثقه في النفس ملهاش حدود

أقعد اسأل نفسي الثقه والغرور اللي هما فيه ده بيرجع الي ايه بجد معرفش لو تعرف قولي

والعكس فيه ناس تلاقيهم كلهم موهبه

لكن ثقتهم بنفسهم ضعيفه برده مش عارف ليه لو تعرف قولي

أما مسألةالتقدير من الاخرين

فأعتقد انا رضا الانسان عن عمله ونجاحه ومجهوده هو اهم كتير من تقدير الاخرين وان كان تقدير الاخرين مهم برده وبشجع

لان زي مقلت ممكن نجاحك وانجازك الاخرين لا يقدروه وده بيحبط الواحد وانجازه بيقل

لكن لما يكون المعيار هو رضا النفس عن نجاحك ومجهودك فده احسن من تقديرالاخرين

موضوعك جميل يا باشا

ومنتظر الباقي

rack-yourminds said...

بقي عاوزه تغتاليني يا بيرو

يا بنتي دانا لو نفخت فيكي اطيرك ههههههههه

تحياتي يا ممكن

عين ضيقة said...

ياراجل؟

بعد كل ده والمرة الجاية؟

ماشى ياعم
عموما جهد مشكور
بس ياريت بعد كده تحاول تختصر شوية
عنيا بظت من النت والله

وشكرا على زيارتك

سلام

momken said...

wahed
ـــــــــــ
منورنى ديما وقد تم تسجيل حضور المدون الذهبى
والف سلامه عليم مستنيك باليل يا باشا

تحياتى

momken said...

semsem
ــــــــــ
اهلا بيكى ديما يا فنانه انا عارف انى طولت وقولت كده فى اخر البوست بس المقدمه دى كلها كانت مطلوبه

انتى تعرفى ان ابن خالدون عنده كتاب المقدمه بتاعته اتناشر مجلد وايه من القطع الكبير
والكتاب نفسه اربع مجلدات
الكتاب اسمه مقدمه ابن حالدون
طبعا تسمعى عنه
انا كانت غلطه عمرى طول حياتى انى بتخطى المقدمه فى جميع الكتب
اه والله كنت بقلبها
حتى اكتشفت ان المقدمه هى الكتاب
انا برضه بتعب وبزهق من البوستات الطويله جدا
بس انا نسيت نفسى وانا بكتب

تحياتى

momken said...

شمعة أمـــــل
ــــــــــــــــــ
بيرو انتى منورانى وسورى على نهجانك وتعبك والجزىء التانى ان شاء الله مس هتحسى بطوله خالص
لان هخالى فى كل سطر حاجه بتحبيها
انتى بالذات اما بالنسبه لواحد
فانا عارف انه راجل جدع وهو طبعا واحد من الشله سواء قبل او رفض ومرضاش حد يقتله ابدا
والى يرشه بالميه ارشه بالبيبسى

تحياتى



wahed
ـــــــــ
والله انت سكر وانا عارف انه خطفت نقط سريعه من البوست بس انا واثق انك تقدر تلم البوست من النقط الى اطلعت عليها
كلامك كله انا متفق معاه فيه
بس انا هنا بحاول اساعد بعض الناس الى ثقتهم محتاجه بعض الدم
كمان الناس الى متصوره انها واثقه فى نفسها وهى مش كده لكنها فاهمه غلط
وبتعتقد ان الثقه فى النفس تعنى الجهم والتكشيره او فعل اى شىء غير مسئول بدعوة الثقه بالنفس
تحياتى

wahed
ـــــــــــــ
هههههههههههه
نفخت فيها على اساس انها شمعه يعنى؟؟
طيب يقى اوقع لو قلتلها لو نفخت فيكى اطفيك
ههههههههه
ماشى ياعم الجامد ربنا يكفينا شر رياحك
طبعا انا بحب واحد جدا وبهزر معاه علشان محدش يهدى النفوس بينا الراحل حبيبى
انا احبك فى الله يا واحد

تحياتى

momken said...

عين ضيقة
ــــــــــــــــ
انا اسف على التطويل وعارف ان العين الضيقه بتتعب من البوست الطويل انا برضه كده يمكن عينى ضيقه برضه؟؟؟
انا اتشرفت بانى ازورك واتسفدت جدا واتشرفت بزيارتك ليا واتهجت جدا
انتى نورتينى

تحياتى

rack-yourminds said...

راحل مين يا سكر انا لسه عاااااااااايش ههههههههههه

حراااام عليك دانا لسه شباب هههههه

انا كمان بحبك في الله يا ممكن

تحياتي يا باشا

شمعة أمـــــل said...

طيب خلى الراحل حبيبك ينفعك
ونشوف اخرتها
وعايز ترشنى بالبيبسى عشان خاطر واحد؟
طب انا مش بحب البيبسى ممكن ميراندا؟

david santos said...

I passed to congratulate it with its work and to desire a good August to it in vacation.

momken said...

wahed
ــــــــــــ
راحل اه انا الدغ ياعم ارتحت
وبعدين روح اتخانق قدام بيتكوا بقى احنا عاوزين ننام


شمعة أمـــــل
ـــــــــــــــــ
هو انا استغنى يابيرو هو انا خلفت الا بيرو دالادب بيرو والجدعنه بيروا الطيبه بيرو
وبعدين البيبسى دى كانز مش صاروخ يعنى هيعجبك اووى

تحياتى

momken said...

david santos
ــــــــــــــــــ
انت منورتى بس مش عارف ليه انت ديما بتعلق فى موضوع تانى خالص غير الى انا كاتبه.... يمكن اتنين غيرنا؟

صاحب البوابــة said...

العزيز ممكن

سأكون متواجداً ان شاء الله في مسرحية وينكى في ساقية عبد المنعم الصاوي

اتمنى ملاقاتك هناك

تحياتي عزيزي

tweety said...

انا كان نفسى اكلم فى موضوع ده من زمان هى دى كانت مشكلتى ما عنديش اى ثقه بنفسى وانا كنت اول المصابين نفسيا وعصبيا كنت حاسه انى ولا حاجه لحد لما عملت واقفه مع نفسى وحسيت انى ليا وجود ممكن اعمل حاجات كتير وده بفضل اصحابى

semsem said...

يا استاذ ممكن باشا
----------------
خليك كده دائما تدخل ناس بنا ماله ابن خالدون فى الحكايه بتاعتنا دى

وبعدين انا قلت ان اللى ارهقنى مش طول البوست هو طويل بس انل قلت ان كان ممكن اختصار حاجات كتير هتوصل لنفس المعنى

وبعدين ما انت عارف انى بحب اقرا كلامك طول يا عم براحتك

ان يس كنت بقول وجه نظر

وانت رحت سايب تعليق قد كده ومسكت فى الحته دى

ماشى يا ممكن باشا


موافقه
بس ابقى اقرا تعليقاتى الطويله ذى ما انا بقرا بوستاتك الاطول


خلينا كده كل ما تتزنق تجبلى حد من برة يتخانق معايا

انا هاخد ابن خلدون ده بقا رهينه عندى لحد ما تيجى انت بنفسك

الصقر الجارح said...

اولا السلام عليكم
وبعدين البوست طويل جداجداجداجداجدا
انا شبه اتعميت من القرايه
بس الحمد لله انا محدش قلى بس انا عارف نفسى مغرور الى حد ما بس متواصع جدا
ومن غير ليه

نـــــــور said...

ماشاء الله بوست متميز فعلا وجميل

ويستحق عناء القراءة .. لأنه طويل شوية

بس جزاك الله خيرا

بنت القمر said...

منتهى الثقه بالنفس انك تكتب بوست طووووووويل اوى كدا ونفسك الناس تقراااة بصراحه سبت تلته الاخير

momken said...

صاحب البوابــة
ـــــــــــــــــــــــ
انشاء الله انت فين ياعم انت
بقالك اربعه وعشرين سنه مزرتنيش

تحياتى

momken said...

tweety
ـــــــــــ
انا متشكر اوى على زيارتك تابعى الجزىء التانى من البوست وانشاء الله هتستفادى جدا
الجزىء التانى فى كل سطر هيكون معلومه مهمه جدا

نورتينى

momken said...

semsem
ــــــــ
ماشى خالى بن خالدون عندك ومعاكى مواعيد علاجه ومواعيد الرضعه بتعته
يتربى فعزك ياسمسم
نورتينى

momken said...

الصقر الجارح
ــــــــــــــــ
ماشى ياعم وعمال توقى صقر صقر صقر
وفى صقر بيتعمى
ايه صقر من جمعيه الوفاء والامل؟
الثقه والغرور بينهم شعره دقيقه هواضحها البوست الجاى علشان خاطرك

انت نورتينى

نـــــــور
ـــــــــــــــــ
متشكر جدا لزيارتك
ومتشكر لتشجيعك جدا انشاء البوست الجاى هيكمل البوست ده وهيوضحه جدا
ابقى شرفينى بالزياره

تحياتى


بنت القمر
ــــــــــــــــ
اهلا بيكى ومتشكر على المجامله الرقيقه
انا اسف على التطويل
بس البوست الى جاى هيعوض التطويل ده وهتحسى ان الى قرتيه له لزمه انشاء الله

تحياتى

hana said...

الحقيقة بوست هايل وممتع جدا
بطريقة حوارة الجذابة واسلوبه
الشيق فى العرض
وبجد فكرة بوست مهمة جدا لنا جميعاا

تحياتى وتديرى

momken said...

hana
ـــــــــــ
اهلا بيكى يا هنا ومتشكر على كلامك ووعد الجزىء التانى هيعجبك جدا يا قمر

انتى نورتينى
تحياتى

مدونـــة الــمــنــبــر said...
This comment has been removed by the author.
Hadota ... حدوتة said...

السلام عليكم
ازيك يا ممكن
اخيراحصلت المعجزة
نزلت بوست جديد ؟؟
دا فى حد ذاته فرح


لا وكمان بوست كبير نقعد نقرا فيه كام يوم .. انت شكلك كده عامله عشان نصبر نفسنا بيه لما تغيب عننا كتير
كل يوم نقرا حتة صغيرة عشان ميخلصش
ههههههههههه

موضوع البوست جامد وبيأثر فى ناس كتير وبيفرق معاها اوى

موضوع ايه شكلك فى نظر النفس سواء ان كانت شخصيتك قويه من عدمه فانا اعتقد دى بتختلف من شخص للتانى .. يعنى الناس عمرها ماهتتفق على نمط معين لشخصية حد ممكن تلاقى الناس شايفة واحد طيب بعضهم يقول دا شخصيته ضعيفة وبعضهم يقول دا عبيط وبعضهم يقول دا طيب
وكذلك اصحاب الشخصية القوية .. ساعات نقول دا مفترى او شرير او شخصيته قويه
دا بتختلف من شخص للتانى

زى منت قولت الثقة مش ثابتة وكل يوم بتتغير وبتطلع وبتنزل
بس عارف اهم حاجة ان الواحد يبقى عارف نفسه كويس وباصص لنفسه صح
ومش يقارن نفسه بحد
يعنى مثلا مقولش انا وحشة عشان فلانة دى حققت نجاح اكتر منى
او فلوس اكتر منى

كل واحد بيختلف عن الاخرين فى التربية والنشاة والشخصية والظروف
وبالتالى مفيش مجال للمقارنة عشان تنقص من قدر ذااتك

ونقاط القوة دى مهمة اوى وبتحصل معانا كلنا
تلاقى نفسك مثلا متميز فى حاجة او مبدع فى حاجة فى حين انك مكنتش واخد بالك ان دا تفوق او ابداع
بس الفكرة فى اللى ينمى نقاط القوة عنده ويحاول يطورها باستمرار مش مجرد لقى نفسه متميز يقولك انا كد هويس.. مينفعش

كمان لازم البنى ادم يدور على حاجات هوا بيحبها بس مش فيه
ويبتدى يتعلمها ويتعود عليها
وبالتالى هيحس قدان نفسه انه انجز وتزيد ثقته فى قدراته
واكتساب العادات الحسنة ممكن يكون من قدوة حسنة او صديق او اخ


والتقدير دا مهم جدا .. بتفكرنى باللى كل شويه تكسر مأديف جوزها او اللى يكسر من نجاح ولاده
فيه ناس بوز فقر كده
يقولك بلاش اديله التقدير عان ميشوفش نفسه عليا
ناس مريضة
كان عندنا مهندس فى الكورس يقولنا انا عارف ان الكلاس دا عمره ما هايفلح منه حد
ولما سالوة بتقول كده ليه
قال عشان احفزهم على التفوق
:D

ساعات بيكون عامل تحفيز بس فى الغالب بيقلب على اسوأ وخاصة فى عمليات التعليم
لان الانسان فى الاخر بقول طالما انا كده كده وحش يبقى بلاش اطور نفسى واخلينى وحش ويحاول يتقمص الصورة اللى الناس بتقول عليها كنوع من الانتقام منهم


وبالتالى انا هستنى الطريقة دى اللى بتقول عليها
لانها هتساعد كتير اوى من ضعاف النفوس اللى ممكن ينهاروا امام الاحباطات

تحياتى ليك يا ممكن
البوست دا تحفة من اوله لاخره
صدقنى لما شوفته قولت يالهوى دا كبير
بس لما قعد قريت مبقتش عاوزاه يخلص


ربنا يوفقك للامام دايما
ومتتاخرش كده تانى فى البوستات الحلوة بتاعتك

خلى عبير وواحد يبطلوا خناق
وهاتلى بيبسى كانز زى بيرو
ممكن يا ممكن ولا مش ممكن؟؟
بس عشان اشربه مش ترشه عليا
هههههههههه

سلامات يا ممكن

smraa alnil said...

هو انت لسة هتكمل تاني

علي جثتي
:)))

بصي يا سي ممكن
كل الكلام اللي انت بتقول عليه دة صح مية المية
واناشخصيا وصلت للمرحلة دي اني مش كنت واسقه في نفسي ولا اللي بكتبه

وكنت بخاف
واول ما نشرت كلامي لقيت استحسان من الناس ودة اللي شجعني انزل اي حاجة بقي
لو عجبت يبقي كويس ش عجبت من الثقة اللي اخدتها من الناس بقول المرة الجاية هحسن الاسلوب

اهم حاجة الثقة

وبعدين الواحد منا عشان مش بيعرف ياخد علي الناس بسرعه
ممكن يتهموه ان مغرور عشان مش عارف يتكلم معاهم
جايز يكون فاشل اجتماعيا والناس مش فاهمة دة

momken said...

Hadota .. حدوتة
ـــــــــــــــــــــــــــــــ
متتكلميش عن البوست الطويل علشان انتى كل حاجه فيكى طويله اصلا
حتى الكومنت بتاعك طويل
طبعا انا متفق معاكى جدا فى كل الى قلتيه
وعلشان كده عملت البوست ده
انا بستفيد جدا من الكومنت بتاعك يا حدوته
نحياتى


ــــــــــــــ
smraa alnil
ــــــــــــــــــ
متتكلميش عن البوست الطويل علشان البوست الاخير بتاعك طويل جدبرضه مع انك حاولتى تكسرى حده طوله بتغير الالوان لكنه طويل اوى بس ممتع
انتى نورتينى ياسمراء
تحياتى

Fatma El-Zahraa Mohamed said...

السلام عليكم و رحمة الله وبركاته
انا ها استنى التكملة بتاع المرة الجاية على شان اقول رائى فى الموضوع كامل، و ان كنت اتمنى ان لا يكون بنفس الطول و اكثر تركيزا. اما عن الثقة فاعندى منها كتير الحمد لله لكن المشكله فى الناس اللى بيفتكروا انها غرور عندك حل

Anonymous said...

شكرا على درس الثقة بالنفس ده وفعلا ساعات بيبقى الواحد شاكك فى نفسه ومعندوش ثقة وللاسف تلاقى ناس بدل ما تعمك وتوجهك تحبطك اكتر

فى القلب said...

أنا مكسوفه وانا جايه متأخره كده
بس ده لدواعى سفريه على السريع كده
أنا قرات البوست وأستفت منه جدا
بس ليه الاكشن ألى فى الاخر ده طب ممكن بقه البوست الى بعده بسرعه
عشان أنا بجد عايزه أخدع عقلى الباطن فى حاجات كتيييييير اوى
وعلى فكره
انا كمان بحبك فى الله جددددددددددا والله على ما اقول شهيد

Anonymous said...

بص يا ممكن انا بصراحة مش مع اراء الجماعة اللي بتقول انك طولت مش مجاملة ليك ولاحاجة لاني معرفكش معرفة شخصية بس في مواضيع مينفعش نقول فيها كلمتين وبس لازم نطول فيها اطالة من اجل الافادة تحياتي ليك ولموضوعك

momken said...

لعب عيال
ـــــــــــــ
ربنا يكفيك شر الغرور
اغلب الناس بيكون عندها سؤ ظن وده مشكله كبيره
انا علشان خاطرك هانزل الجزىء التانى يوم الاتنين

انت نورتنى
تحياتى


hend
ـــــــــ
عندك حق الناس مبقتش لها طيبين منهم الى ما بيصدق يلاقى الى قدامه فريسه علشان ينقض عليه
بس الاصحاب مفروض يساعدوا بعض فى اوج القصور
دى دور الصديق
منورانى يا نودى
تحياتى


فى القلب
ــــــــــــــ
ولا متاخر ولا حاجه داحنا لسه وش الفجر
انا انشاء الله هنزل الجزىء التانى يوم الاتنين الجاى
احبك الذى احببتينى فيه
تحياتى

قلوب حائرة
ــــــــــــــــ
يارب ربنا يجبر بخاطرك انى خليتى معنوياتى فى السما بعد الناس الى
اشتكوا من طول البوست والله عندك حق جدا
بس برضه مافيش مانع من شويه اختصارات
الناس معندهاش وقت لطول القرايه

كلامك اسعدنى جدا
ربنا يكرمك
تحياتى

klmat said...

البوست فكرته جميله جدا
حاقولك رأيى لما تكمل
فى انتظار الباقى
تحياتى وسلامى

ابو العربى said...

استفدت كتير من الموضوع ده يعنى فى حاجة برضو لعدم الثقه ممكن تحس انك نازل الشارع من غير بنطلون وده ناتج عن اهتزاز فى الشخصيه وعدم القدره على ثبات الثقه فى النفس
تحياتى

momken said...

klmat
ــــــــــــ
هحاول جدا اخلى الجزىء الاتانى يعجبك علشان يهمنى رئيك
متشكره على تشجيعك جدا
نوؤتينى

تحياتى

ضد الظلم
ــــــــــــــــ
من غير بنطلون ده من عدم ثقه او ضعف شخصيه ده من شده الحر
ان شاء الله الجزىء الجاى هيكون اهم من الجزىء ده

تحياتى

البِـئرُ والظمّأْ said...

سلام الله عليك يا ممكن
يل رب تكون بخير و بصحة جيده
على فكره البوست ده جامد جداااا
انا شدني اسم البوست.. واثق ولا مغروور؟
على فكره كتيير بيفسر الثقه في النفس ده غروور
و انا واحده منهم
جميا موضوعك قوي
و مستنيين نشوف الكتيير منك
و على فكره احنا مش زهقنا ولا حاجه من طول البوست لانه فعلا ممتع
حلوو قوي كمان فيك متابعتك للبلوجات ب استمراا ر
ربنا يوفقك
سلام ...زيزي

الحلم العربي said...

ايه ده يا ممكن ؟؟؟؟؟
انا عايزة الطريقة دي دلوقتى حالا ...بعد ما كنت في قمة التركيز تقطع عليه حبل أفكاري كده؟؟؟ ماشي ماشي

موضوع جميل جدا جدا و فعلا محتاجينه كلنا و انا اولكوا ...ربنا يجعله في ميزان حسناتك

تحياتي و ما تتأخرش علينا في الجزء الجديد

momken said...

Meekness
ـــــــــــــــــــ
عليكم السلام ورحمه الله وبركاته
ربنا يخايكى متشكر اوى على الكلام الجميل والحمد لله ان البوست نال رضاكى
ان شاء الله البوست الجاى يكون اقوى واقصر

تحياتى


الحلم العربي
ـــــــــــــــــ
انا متفق معاكى جدا وانا كمان زيك بالظبط
ربنا يجعله بقايده

مش هتاخر فى الجزىء التانى عينى
تحياتى

Anonymous said...
This comment has been removed by a blog administrator.
Unknown said...


شركة بيت الاحلام للتنظيف
شركة تنظيف بالدمام
شركة تسليك مجارى بالدمام
شركة مكافحة النمل الأبيض بالدمام
شركة شفط بيارات بالدمام
شركة تنظيف خزانات بالدمام
شركة تنظيف شقق بالدمام
شركة تنظيف فلل بالدمام
شركة رش مبيدات بالدمام
شركة كشف تسربات المياة بالدمام
شركة مكافحة حشرات بالدمام
شركة تنظيف مجالس بالدمام
شركة تنظيف كنب بالدمام
شركة تنظيف موكيت بالدمام

شركة عزل اسطح بالدمام
شركة عزل خزانات بالدمام
شركة تنظيف منازل بالدمام
شركة تنظيف منازل بالدمام
شركة مقاولات بالدمام

Unknown said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر